Halloween party ideas 2015

Tv Immanuel Zarzosang Varte , Research Scholar, Dept of Anthropology, North-Eastern Hill University, Shillong, in United Nations, New York, an zinna le inzawma Hmar hnam in ei mamaw hai tiem nuom um takel a hung zieka, lawm a um taket a nih.

Imagine there's no Heaven; It's easy if you try; No hell below us, above us only sky.
Imagine all the people living for today.
Imagine there’s no country; It isn't hard to do; Nothing to kill or die for and no religion too.
Imagine all the people Living life in peace
Imagine no possessions; I wonder if you can; No need for greed or hunger, a brotherhood of man. Imagine all the people sharing all the world
You may say that I'm a dreamer but I'm not the only one I hope someday you'll join us and the world will be as one- John Lennon, Imagine

Tuta tuma United Nations (UN) a an hotu thenkhat khat hai zara New York a UN hotulien hai ei hnam le North-East India buoina thu dang dang hai thuah inpawlpui ding le Centre for justice and Peacebuilding, Summer Peacebuilding Institute, Eastern Mennonite University, Harrisonburg, Virginia ah PEACEBUILDING & DEVELOPMENT thuah training dinga mi rambung 39a inthawka fe khawm hai laiah kazu feve le thangvena le inzawma ei hnam
ta dinga inchuk ding a tha ka I ti thenkhat khat hai hang hril ve mei mei ka tih. Mitamtak hai ta ding lem chun thil danglam raka khawm ei ruot dal thei amiruokchu ka thil zu hmu le inchuk hai kha ei hnam ta dingin a pawimaw vieu thei dingin ka hriet leiin tiemtu haiin milo hrethiema hi ka thil hungziek ding hai hi nguntaka mi tiemzo pek hram dingin ka hung ngen hmasa cheu. Leh, hrilsei ta loin ka thil ziek tumah mawl deuin hang tan bur el ka tih.

UN hotu hai vawili lai UN office a kan pawlpuia, UN hai hotu nuin a inah a min thlungtir sunga ama leh kan pahni chaua kan hohlimna a inthawk le Virginia a kan training laia ka thil hmu chu “ei hnam hin tienlaia ei pu le pi hai huna inthawka milungin uoi, miringum, inremna dit mi” ei nina thu a anih. UN hai chun ka ring nekin an milo hrietchieng khawpel, an hotu nu pakhat chun “Hmar hai hi ram hang tia, state or district hai chu in neinaw ngei. Amiruokchu Hmar hnam hi kan lo hriet le hmu dana inremna dit mi le milungin uoi in nia, chuel khela in indar leiin India’s North-East state pali ahin in uma, hnam dang hai kara inremna siemtu le mitamtak damna khawm inni ta hlak. Chuleiin, inngirhmun pawimawna hi theinghil ngainaw ro aw. Midang hai angin invet thlak takin um ve tum thak naw ro. Midang po po nekin inchan hi la hung tha in mi po po inza inla hung ni thei ding anih. Ram in nei naw hi invangneina a ngai lem hlau ro. Hi ngirhmun lei hin hrietthiemna in neia, mi harsatna khawm inhrietthiem lem anih. Nangni in hma thuoiin, hnam dang dang hai keikhawmtu ni tum lem ro. Ram bik innei naw achu Ram nei lien tak in ni lem anih” tiin a mi hrila. Ka hang ngaituo chet chet chun andikna tam vieuin ka hriet chu tie. Diktaka chu, ei indar zau leiin ei hnam hi ram lientak neitu ei lo ni lem hlau anih. Chuel khela ‘assimilation’ ei ti lem hi chu ei hnam tadingin tium lo pawl tak a nih. Ram pakhata mi lo bo inla khawm ram dangah Hmar tawng le nunphung tak ngawka hmang tamtak ei lo um pei tho. Amiruokchu ‘political power’ lem chu, ani ngei, hnam thenkhat hai angin ei hau bek bek naw el thei. Iengpo khawm nisien, ei mithiem tamtak ha’n ei hnam hmusit ang vang vanga inlang khawp hiela, “ei hnam hi chu ei mawlin mihai ei phak nawh, annawleh Hmar hi chu umna thlak khawm anta nawh” tia, thil inti hre deua an ziek le an ti an ti hi chu pawm a um naw khawpel. Kei ka hmu dana chu mihai ei phak nawna or an hnung ei hnawtna ka hriet thak nawh. Chuong nek hman chun miin an mi phak nawna tamtak a um lem anih. Hnam dang dei America, khawm chu UN mihai hmana ei hratna le pawimawna an hmu theia, iengleia eini hin ‘pawsitif’ deuin ei hnam hi ei hmu theinaw am ana? Ei hnam a thatnawna ngawt hmu ei tum chun hmu ngei naw mei ni’m. Anachuh a thatna le hratna tieng hang ngha inla hmu ding tam ve vieu a tih. Mihai ei phak nawna ei hril ei hril hin mitamtak lungrila a I siem thei thenkhat khat hai chu-


1. Inngaitlawmna thanaw,
2. Lunghnuolna,
3. Beidawngna
le thil dang dang a mipui, a ahmasatakin inchuklai hai lai a siem lem dai thei anih. Ei I hriet ding chu ei hratna le changkangna kawng tamtaka mihai in an miphak nawna le mithluk theinawna ding tamtak aum. Chuong hai chu hril lem ta inla, inchophur lem ta inla a tha vieu naw ding maw? Hnam dang dei, tuipui rala ha’n an mi chophur ei hang ngai lem el ta hi chu thil inzak um thlak hle niin anlang. Hrilsei nuom inla chu ei I entawn tak Sap hai neka ei chang
kang lem na tamtak a um ve tho anih.

Virginia a kan training naa ka tawk tawka ka zu hriet pakhat la hang hrilsa nawk ka ti aw. Tiemtu hai milo hrethiem hram ro. Course pakhat “Conflict sensitive development” ti kan thaw lai chun kan Instructor Bill Lowrey, Director, World Vision chun hieng hin course la hai po ami hril- “Inveng tieng inkir pha chu thil pakhat hrezing ro. Chu thil thenkhat khat hai chu:


1. Mani rawlri chau hrenuom loin mi rawlri khawm hi hriet a tul.

2. Mani ngaidan chau hi BIBLE ang ela indika ngaia, midang ngaidan le hril ngaithla peilo, mi po po mani ngaidana inhmin tum vawng hi Hotu thawdan ding ani nawh.
3. Mi thuhril ngaithlak dan hi inchuk ve a tha.
4. Hotu chu a hril nekin mi thuhril ngaithlak le thiem taka mani ngaidan tha le fela a I hriet hai le midang ngaidan dang dang hai hmet kawpa Praktikal nuna hmang th
ei dinga siem thiem.

Hi thu hi hrezingin India ka hung pan nawka. JFK a inthawka vuongna’n Mumbai ka hung vuongtung malamin le Mumbaia inthawka North-East India ka hung pan lai le tuchen hin kha Bill Lowreyin ka hung tawma a thuhril kha ka lungrila a chamzing. Ka hang inngaituo chun a thuhril kha ei hnam thuoitu (keikhawm thangsain) haiin ei baksam le ei inchuk le hriet ding makmaw niin ka hriet. Mani le mani indittawk le hre inti seng hi eini thlangpuia, a bikin Sap ram le ramdang danga fe thei tawk chin (a ziektupa ngei keikhawm thangsain) hai lem hi chu ei ngaituonain Thlapa ei tlung zing theia, amiruokchu mit meng kurin ei ke in hnuoi a tawk thei naw deu vawng niin anlang. Hril ding ei haua, thiltha tak tak khawm ei hriet rawn tawl hle. Anachuh a thle nazawng kha rangkachak alo ni kher ngai si nawh. Ei tawngrawn tawl taluo bawk leh ei hriet rawn taluo leiin mipui haiin an mifak phak tanawa, chuel khelah mipui hai tawngna ding hun le ei tawngna ding hun andei thei ngai tanaw anih. Mipui hai khawm, ienganga mawl ei ti hai khawmin thu tha tak tak le ngaidan tha tak tak anei ve anih ti hi khawtlang, kohran le politik thuoitu haiin ei hriet ve a tul khawpelin anlang. Kan training naa kan I ngaipawimaw em em pakhat chu ‘Everybody has an idea’ (mi po poin hriet le ngaidan tha tak tak an nei vawng); ‘give them a chance to speak and hear them well for, in them, lies real power’ (an tawngna ding hun pe ro chun, nguntakin an thil hril hai chu ngaithla ro asanchu annia hin thilthawtheina tak tak chu aum lem anih) ti hai hi anih. Mihriem ienganga mawl, Changkang le tha khawm mizie sungril taka kawptlat chu ‘recognition and acknowledgement’ anih. Hieng thil pahni hai hi hotu haiin ei theinghil le hmu hmai ani vei vei chun ei ram le hnam le ei sakhuona tienga hai hmasawnin lungruol takin leng ngai naw mei nih. Chuleiin, inchawimawi thiem, inzatawn thiem, inchophur thiem le inhrietthiem tawn hai hi ei hnam mipui, a biktakin thuoitu haiin ei thaw le changchawi nasa hle a tul.

Chuonganga ei thaw chun tulai inremna le muongna khawvela aum theina dinga mihaiin an ngaipawimaw tak ‘Local Capacity Building’ hi hlawtling takin ei thaw thei ve ring aum. Mipui hai hi Hnam le Pathien rawngbawlna kawngah rawl le pawimawna hotu haiin ei pek tak tak hma chu tukhawm hlimin in hawiti chuong naw mei nih. Chun Nuhmei hai hi Hnam le kohrana pawimaw tak anni ang bawkin, a biktakin inremna le muongna hnamin ei zawng le dapnaa hin, insunga inthawka a hung suok dawka pasal hai lai zalen taka an inzep ei phal le hung thangve dinga ei thuhne hmakhat chu ei sinthaw hai hi hmasawn thei tak tak naw nih. Nuhmei leiin rambung a sie theia chuong ang bawkin nuhmei lei bawkin rambung hi siemthat in aum rawp hlak bawk.

Rwanda, Africaa inhma meta hnam le hnam buoina namenlova an tuok, mi a nuoi tel that le rimsi taka an um tum khan an nuhmei hai hmalakna lieu lieu a tuchena inremna le muongna an rama aum pha anih. Nuhmei thilthawtheina hi thuoitu haiin ei theinghil naw a tul hle anih. Kan training naa ka ruolnu pakhat Angelina Maua, Kenya, Africa mi chun “Immanuel, in rama I kir phaa, inremna le muongna kawnga in hnam leaders hai le hma inlaknaah in hnam nuhmei hai ‘peace processes’ thil reng renga hmei ngai thak naw ro aw” tiin amin cha ngawi ngawi. A thuhril le ama nuna ngei a inthawkin ram le hnam thilah nuhmei pawimawzie le an thil thawthei zie ka hrieta inthawk inchuk ding tamtak ka hmuh.

Chuleiin, hotu haiin ram le hnam ei thuoina kawnga hin iengtiklai khawm ei I hrietzing dinga ka dit ve chu mitina um le mihriem eini sung po poa mani chitah thikthusie taka ei kengkaw le ngiet tlat (zealous needs and interests) zing hai chu:

Acknowledgement
Recognition
Self-esteem
Self-actualization
Welfare
Personal identity

Personal freedom/liberty
Personal Safety and security
Belonging and love
Distributive justice
Participation
Trust

Khieng a chunga mi po po hai khi ei ram le hnam thuoitu haiin ei hriet le hmuzing sung chu ei rorelna le hmalakna hai fesuol mei mei ngai naw nih. Chun, khi a chunga zieka um points hai bawk khi mimal thil chau nilovin, hnam levela ding khawma hnam tinin humhal ei tum seng hai anni tho a nih. Chuleiin, chu chu hrezingin, hnam le hnam levela khawm ei hnam tadinga ei nawr hai po po ei hmutheina ding lampui umsun chu hnam dang hai ‘needs’ le ‘interests’ hai hrietpui le hrethiemtakin midang khawm ei ‘issue’ a ami ‘support’ tu ding ei zawng/laklut a tul anih. Chuongnaw chun ei khat chova ei damna ding ei ngaituo ngur ngur chun hieng anga ‘multi-ethnicity area’ rama um eini lai hin Hnam dang haiin an mi ‘oppose’ ngat ngat ding anih. Mi dang haiin an mi oppose sung chu Manipur, Assam or Mizoram ngirhmun (situation) a chu ei hnam chau zalenna, muongna or damna hmuthei ngai naw’m ei nih. Midang hai thlawpna ei hmu theina ding chun an ‘needs’ le ‘interests’ hai hrietpuia, hriethiemna le lungril lientaka ei um le chang hi anih.

Ei issue hai hi hadam tak le hrat taka ei nawr theina ding chun ei hnamin hma lain, hnam dang hai lai ‘foreign policy’ huopzau (holistic) deua le hrat taka ei hnawt a tul. Chuongang policy ei thawthei dan pakhat chu Churachandpur district ah Hmar tading chau niloa mitin (Churachandpur tribal po po) ta dinga thil tha pakhat tak (entirna mei mein 6th Schedule for Churachandpur district) hang phursuok thei inla chu ei Suopui Unau pakhat khawm a mi support naw ding le a mikal ding an um ring a umnaw tieng pang anih. Chu nek hman chun “Hmar hai ma ma” ti’n iengkim ei thaw na ah (entirna’n Tipaimukh issue) ei ‘allies’ an hung ni thei dan a um lem el thei anih. Hi ngaidan hi tulai ‘multi-ethnicity area’ hmun tamlema hnam dang dang kara buoina hai chingfel le inthuruolna umdan ding UN le midang dang haiin ‘practice’ thei anichun tha vieu dinga an ring chu anih. Ka ngaidan taka khawm thil thei chu niin ka hriet amiruokchu tunam hma lak ding ti ruokchu a hriet antak. Ei hnamin chuongang deua hmalak dam hi ei thei tak duoi ding am aw? Thuvar in “Hausakna nekin hmingthatna thlang lem rawh” a ti angin, ei hming thatna ding lampui chu ei dap a ngai anih. Hmingthatna aum chun hausakna khawmin a zui hlak bawk.

Ienganga hrat khawm ni inla, makhata ngir thei ei um nawh. Tulai khawvel a lem hin chuh Suopui Unau (Common history nei po bek) hai hi chu thang khawm a hun tah. Chu thangkhawm theina dinga hmala theitu chu HMAR hai hi ei nih. Hmar laia khawm HMAR INPUI (Hmar Supreme House) hi a la ni nawk zuol. Tuta Tipaimukh khawm hi Hnam dang (a bik takin ei Suopui Unau hai) hai thangpuina le thlawp ei mamaw takzet. Chu thil chu hriet chieng a hun hle tah.

Tuta ei hnam thuoitu thenkhat haiin Hmar contiguous area po po lak khawma UT nawr a rawt thuok thuok khawm hi Hnam dang (a bik takin ‘Contiguous area’ sunga cheng) haiin an mi thlawp naw chun thil harsa vieu ning a tih. Chuleiin thildang po po (ei Hnam bing issue hai) ei thaw hma’n ei hnam le hnam dang ei kawl le kienga um hai po poin an sawrthei ding le thatpui thei ding thil ‘generalized’ deu a hma ei la lak phawt hi a ngai awm de? Chu thila inthawk chun ‘inter-ethnic trust’ hung suok in ‘allies’ ei nei ding anih. Chuonga ei thawthei chun Tipaimukh dam hi eita dingin sie theinaw nia, chu nek hman hman chun ei ta dinga thil tha tak (a bik takin changkangna tieng pang) tamtak a hung um lem ding anih. “Thil tha” ei hang ti hai chu hril nawn ngai lovin ei hrietseng tho ring a um. Ei khat chaua eini le eini inhumhal ei tum chun thilthei ni naw nih. Amiruokchu Unau Suopui po po thangkhawma thil ei thaw ani chun ei Hnam chau nilovin, Suopui Hnam dang hai po po khawmin an thatpui pha hiel ding anih. Hieng anga ngaituona hi ei sakhuona leh khawm an zul hle bawk anih.

Ei hnam hmasamwnna ding chun \huoitu hai hi intuoithar ei ngaia, ei mipui hai kawlah training lak ei tul.

Development (Hmasawna/Changkangna) Hi Iem?

Leh, hril lai nghal nghal, thildang tieng hang pakai zawk kati aw? Tiemtu hai lunginsiettakin nghawk loin mila tiem pek hram hram ro.

Development hi Lucy Mair in a ziek dan chun “Ram hnufuol deu met haiin ramdang, khawsak le ngaituona tienga an chunga um an I ring hai anga um tumna anih” tiin a lo hrila. Hi um tumna hin khawsakna, khawtlang nun le inkeihruoi dan, kohran inkeihruoi dan, thiemna tieng le thil dang a huop saa. Hi zul hin hang fe in ei I entawn tak Sap hai hi inkhina hmawla la in ieng kawnga’m ei entawn le entawn naw ding hang ensin tum ei tih.

Sap hai ei entawnna ding thil pakhat chau:

Sap rama ka zu fe sunga ka lungril natna le pawimaw em em a ka I hmu kei le kei kan dawn kan dawn chu “Iengleia an ram hi a fai in amawi b$k em em el am ana?” ti hi anih. Chutaka ka ngaituo ka ngaituonaa hung indawk pakhat, a dawnna ni awm thei a ka I hriet chu ei ‘development consciousness/awareness’ hi anih. Sap hai ram chu chuong taluo lawm lawmin amawi bik le tha bik khawmin ka hriet nawa. An ram thing le hlo hai khu eini laia ei thing le hlo hai neka a that bikna a um chuong bikin an lang nawh. Amiruokchu ei hang enkuol vela, an thing, hlo le par hai khu a mawiin a nal b$k angin an lang tlat. Hi thil hi a san ding awm taka ka I ngai chu a mipui ha’n an zir lei anih. An inkawl le vel hai khu an uksak in an hmu kim em em a. An chei peizing anih. Development fund a hung huna chau an khawtlang mawina dingin hma an lak naw khawpel annawleh an inkawl le kieng sufai dingin an rama tu’m anih mi inlar deu piengchampha an nghak naw khawpel.

Hi kawnga hin Sap hai inpak an umna bek bek. Thil reng reng hi, a biktakin insukfai, thienghlimna le mani kawl le kieng sukmawina kawngah, mi thaw dingin an hla nawa, chu nek hman chun, mipakhatin a hmun hnawk a sukfai hman naw chun a in kawl le kieng hai pakhat takin a va sukfai pek el anih! Chuong anga tlawmngaina le ‘consciousness’ chu eini lai chu ei putin ei thaw teu nawh niin an lang. Tuilam, inkawl le kieng annawleh khawtlang lam sukfai or siemthat ding chun Mahatma Gandhi piengchampha annawleh development fund ei nghak kher kher nuom hle. Mani ah insukfai, insukthienghlim annawleh mani kawl le kieng sukfai dingin sum le pai a tul kher nawh. Sawrkar pa a hung inrawl khawm a tul kher nawh.

Anleh, hang fe pei inla. A chunga ka hang hril khi eini lai iengleia a um thei naw am ana ti zawna hang siem sin inla, dawnna dang dang laia pawimaw deu dawnna pakhat chu hla bek a zawng a ngai nawh. Pansak panthlang, laibung le laibung, khuo le khuo, kohran le kohran, pawl le pawl, unau le unau iengtik lai khawma in lalna, thuneina, pawisa le mani hlawkna dinga thil dang dang beisei le dit leia ei insel, invuok, intumtuo, inthat, inlawt tuo le kawngtin renga inghir in ngho na hi anih. Eini le eini ei buoi taluo a, ei kawl le kieng a mawina, a mawinawna, mani mawina le mawi nawna hmu hman talo chuh! Insel, inthat le ei sung thua buoina hai leiin thil dang reng reng thluoka hmun chang ta lo a.

Ei sung thua buoina, ei insel le insukbuoi hi darkar tlawmte sung chau khawm vawi le khatin hang chawl ruop inla, chun hang ngha kuol vel inla, ei lungril a insukbuoi le hmasielna baka thiltha thenkhat khat chau bek khawm aum theina dingin hmun siruok inla chuh hmu ding hau hleng ei tih. Biekin, artikul annawleh Publik lai chova thuhril hang bansan zawk inla, mani le mani in en chiengin, theory khawvel hi hang insawn san dep ta inla praktikal nuna hin hang lut thei tawl ta inla chu a va tha awm de… Sap hai an changkang hrat em em nasan chu Praktikal nuna an lut lei chau a nih. Eini khawm chu nun(Praktikul nun) a chun iem ei lut thei ve naw na ding san ? Nuom tak tak inla ei theinaw bik nasan um dingin an lang nawh. Sap hai chu anni sunga innghir in ngho na hi a tangkai nawzie an hrietchieng em leiin an kawl le kieng mihai thatna le thatnawna an uksak nawa chuleiin anni le anni in ‘develop’ na ding le an kawl le kieng thlir kuolna kawnga an lungril an pek hman tlat anih.

Sap hai ei entawn nawna ding thil pakhat chau:

Sap hai hi changkang hlein, Highway laia hmunhnawk pakhat chau khawm dehawn a Dollar 200 fine thei ania. An lamlien hai khawm a tlun in a nam tha hle. Ei airport haia vuongna tumna pucca road hai nek hmanin a nam tha tawl el naw dim anih. Intin deu thaw in Car annawleh inlirthei chikhat bek annei deu vawnga. An In hai, an khawlaidung hai an hawiin a theinghlim hle. Hieng po po lei hin an nitin khawsakna khawm hang en chun an hawi hmelin a hadam hmel khawpel. Amiruokchu hang belchieng tak tak chun lungsiet anlo um khawpel. Khawvel inhawina le mawinain an nun a hluo bit zo tah. An Pi le Pu thurosie hai hlak hriet khur neita lo hai, Hnam thil hieng tradition annawleh custom hai hlak chu hriet hlak nei ta lo, American Red Indians haiin an la kawl tawk tawka.

Tuta eini’n Pi le Pu damdawi ei ti hai dam hi chu Red Indians hai bak tukhawmin hriet annei tanaw reng reng. Kan ruolnu pakhat Ms. Shelby, Eastern Mennonite University a Lecturer sin thaw mek leh Shenandoah national Park-ah nikhat ram kan hang invaknaa Pi le Pu damdawi le Pi le Pu nun tamtak kan hohlim kan hohlimnaa chun hienghin a mi tia “Nangni chu in va vangnei b$k de aw…In Pi le Pu hai hrietna le theimna inla kengkaw tlata, keini chu kan inhmang vawng tah. Thlatu bul hang sui ding ringawt khawm, tamtak chun sawngthum chen bak kan hril thei nawh. Chuel khelah, in Pi le Pu hai hrietna le theimna naupang in praktikala I hriet chau khawm hi USA a Professor tamtak haiin an I nei le thluk lo anilem dai. Keini chu kan culture kan inhmang tak leiin insung pawimawna, pansak le pantlang inhmangaina le inlaichinna, thil neihai intawm duol duolna hai le khawtlang nun le hnam sukinhawitu le mihriem hi ‘social being’ ei nina suklangtu le sukhrattu hai po po hi atam lemin kan hrietphak ve ta nawh. Chuleiin, hienga kan fezing anichun ‘American Society’ tuta ei I hriet hi hunsawtnawtea chu ala bovawng ding anih. Keini chu khawsakna le ‘changkang lemna’ khawvel suok (Slave) kan ni tah.

A tamlem chu inah sungkuo le hlimtaka umkhawm nekin kan thawkna hmunah kan um rawn ta lema, kan milem biek chu ‘work and office’ hai hi an nih. Hi lei bawk hin “sungkuo” le “nupa” taktak hang ti ding hi kan tlawm deu deu tah. Society a dam theina tak ‘sharing’, ‘caring’ le ‘love’ hi kan thlasam hle an tah”. Hi thu a hril lai tak hin ka lungril chun anni ka lunginsiet laizingin ei vangneina ka hrietsuok thara, ka lungril a lawm khawpel. Amiruokchu, ka lawm laizingin eini khawm ei fimkhur nawa, tuta Sap hai umdan, thawdan ti ngawta ei insung, kohran le khawtlang thila ei thaw le ei zui anichun (zui khawm ei zui mek anachu ei I zui le thaw hai chu hrilsei nawng ei tih. Mani le maniin chuonghai chu ngaituo dawk lem el ei tiu) thatna nekin sietna ei hnai lem vieu chu ka ring.

Ka ngaituoin, ka hang ngha vel a, Sap hai nun le khawsak dan hai ka hang hmu chun “hieng ang nun intep le khawsakna suoka (Slave) intang, khawtlang nun le insung nun mumal loa um hi ‘development’ or ‘changkangna’ anichun ka nuom naw tawp” tiin ka lungril chun thuthluk ka siem ta anih. Bible in “Pawisa sum ngainatna hi suol tinreng bul anih” alo ti hi chu avan dik em em de aw…pawisa sum hi suol annawa, pawisa sum ngainat hi suol ani lem. Chuongang bawkin changkang tumna hi suol annawa, changkangna ngainat taluot hi suol ani lem. ‘Changkangna’ hi ei ngaina taluot leiin Kohran le thlarau rama khawm Sap hai ang bawkin ei thlak hnuoi pha reng annawm anih? Biblea Milem biek a ti kha ei ta ding chun Pawisa le ‘changkangna’ hi annawm anih? Ei hnamin changkang ei tumna luot luotin Sap haiin an I thawsuol ang ang ei thawve ding chu a hawi khawpel.

Changkang ei tumna luot luotin pawisa ei ngainaa, pawisa ei ngaina luot luotin mi kuta innghatna a lien tiel tiela, mi kuta innghatna a lien tiel tiel leiin ei virin ei duam deu deua, ei duam luot luot leiin eini le eini ei buoi ei buoi lem anih. Hnam dang dan \ha hai lak tum le hmangthiem tum silova mihai angchara (stereotypes) ni ei tumna lei hi annawm anih Kohran, insung, politiks le khawtlang nun khawm that tieng nekin siet tieng ei pan tiel tiel hi.

Ei hnam nunphung le Pi le Pu hai thurosie le varna hai ei bansan tak leiin annawm anih Laibung le Laibung khawm inngaina taloa ei bawk eini le eiin ei inver? Hi hi thilmak an nawh. Inngainatna a tlawmta em annawm. Chuleiin, ei changkang tum dan hi ‘regressive development’ nilem loin ‘progressive development’ ni thei hram sienla chu tha ngawt atih. ‘Modern’ le ‘tredisawnal’ hi ei thehrang le hmangkawp thiem a tul hleiin anlang. Mihaiin ‘tredisawn’ a kir nawk antum laia eini’n ‘tredisawn’ maksan ei tum hi andik chie dim anih? Peacebuilding kan training naa midang, hnamdang le ramdang dang buoina le an chingfel dan nguntaka kan hang en chun inremna an siemna dinga hmangruo pawimaw taka an hmang le keini rambung 39 a inthawka fekhawm hai khawma’n chuong po po chiktak le chipchier taka kan sawichip hnung chun inremna siemna kawnga hmangruo pawimawtak le chultheilo hai chu ‘tredisawn’ le ‘customs’ ah kan hmu tlat.

Hmasawnna le hausakna hai hi midang, ramdang hai kuta um annawa, mani chita um ani lem.

Awleh, alo sei deu taa, tuta ka ziek lai mek, atawpna tak thlar tlawmte hi inla tiem chun a tawpchen intiem anga ngai thei anih. Ka zuk ziek ta hai po po kha New York, Virginia le Pennsylvania, a biktakin Virginiaa ka training naa inthawka ka hmu le hrietve sun sun ei Hnam tadinga hriet tul le pawimaw a ka I ngai hai ka hung ziek ve ania. Ei hnam tadinga thiltha le hmangthlak ka ziek hai po po kha mani ngaidan alo ninaw pal khawma mani hrietna sukzautu beka hmanga tiemtu hai po po, a biktakin hnam le kohran thuoitu haiin ei theinghil lo ding le a remchang I zira hmang theina hmun hmuna hmang tum seng ei tiu. “Ka ngaidan annawh” ti nun kha pelsanin, “ka ngaidan ani nawa chu uluk tak le chipchier takin lungril hang pe reng reng ka tih. Alo tha tak duoi el thei” ti nun sir tan tum lem tang ei tiu. Hotu le mipui kar umloa thangruola hmalak a hunta takzet.


Post a Comment

  1. This is very good reading. Quite an insight!

    ReplyDelete
  2. India sorkar luhai le lekhabu ziektuhai le chanchinbu mi tam tak thu zieka inthoka an mi hmu dan chun Hmarhai hi inremna siemtu neka helna chok suoktu le hringtu ei nih. Hi hmelhmang hi HPC Movement intrana inthoka ei put tran or an min puttir a nih. Kohran buoina khom a trantu ei ni nawh ti thei a ni nawh. A ziektu tlungna nu hin ei mizie le nungchang a hriet chieng naw leia trong mei mei a ni lem naw maw? Self-praise without content is self-mocking. LK

    ReplyDelete
  3. HPC Movement leia Hmar hai buoina siemtu eini ka ring bik nawh. Chu nek hman chun mani ke ngei ngir ngam hnam ei ni lem ni'n ka hriet.

    Ei hnam mizie hang hril chi ding hin sei tak hril a trul in ka hriet ve nawh... Athei phot chun inremna zawng hram hram hlak mi ei nia, hieng HPC(D) le HNA, le pawl dang dang hai lei hin Hmar, as a hnam, in buoina siemtu put thei naw ma nih. A tam lem mipui hai hi, lo thra bek bek naw inla khawm, lampui indik hraw nuom hlak mi ei nih ni'n ka lo hmu ve hlak.

    Chuleichun, development changchawi zingin mipui a tamlem in hma ei lak pei chun mi khawvel in majority hai an mi hmu hlak ding a nih.

    LC Hmar
    Aizawl.

    ReplyDelete
  4. Pu L. Keivom hin Hmar hnam hi a tir-a inthawka suol, tha lo le inremmna ditlo le nei tum ngai lo reng renga a ngai am ni aw....Kei hlak chun tuta Tv. I. Zarzosang Varte hung ziek hi tha ka ti in andik vieu in ka hmu a. A ziek dan, tawng le thumal hmang a inthawk hin "Self-praise without content" anina ka hmu thak nawh. On the contrary, I do believe the artikul is actually about "honest and positive self-introspection,view and evaluation of our Hnam qualitis with lots of actual and factual contents". Chun LC Hmar in a hung ziek khi andik bawk. HPC, HPC (D)or HNA hai le Kohran buoi lei ringawta Hmar hnam hi helna po po chok suok tu anga hang ngai el hi thil ti um tak, invet tlak tak le mani le mani mawng inhlimna ani lem. A reng reng thua intum lo ni reng inla khawm kha hma po po teh? Tu khawm hin helna po po chok suoktu ei ni thei chuong nawh ni nuom inla khawm. Ei neka inlar le khun antam taluo ringawt. Chuleiin ka neka thiem le var lem ani lai zingin Pu L. Keivom hin tha deuin tiem nawn nawk sienla a tha vieu ka ring. Comments should not be given just for the heck of giving comments.

    ReplyDelete
  5. "Ei hnam helna chawksuoktu le hringtu ei nih" ti comment khi andikna chin um sienkhawm a bak rieu in ka hriet. Tulaia 'helna' ei ti tak, eg. insurgency hi eini chawksuok am annawleh midanga inthawka suok? A 'hringtu' ti taka hin chu einina chin khawm chu aum el thei amiruokchu hi khawm hi ngaituo tham chu niin ka hriet.

    ReplyDelete
  6. hmar ruol hi hnam thra rak lo ani tih hi in hriet a hun an ta aw!!self praise na ding khawm ei nei hlol naw.L keivom hi thil po po a inkhi na hmol fung a hmang ngai naw!!ama hril/sui lo khawm ma hnam bo ral 21st century a Dimasa (hnam hnufuol) vuok tuor,Pathien ringlo Meitei vuok le RAPE hriel hrep sa mei mei ei ni.CCPur phai a khawm MLA thlang dok thei lo hnam in tlaw/kawkbo ei ni ti hi ei in hriek vat naw chun khawvela refugee hnam ei ni mek a, ei la ni vong ding ani!!history Hranglien songate ti hai ziek ei tiem chun hmar hi zo hnathlak a kawi le hnam hmasiel tak,dawikawlok tak hriet thei ani ti hi Aries ,lc hmar ti hai rawi hin lo hri ta vat ta ro.inthim na le mawl na hi ei thi pui na ding a la ni a!!suol sim na le inhriet suok na hi sandamna ani khawvel piellei le van a khawm ,chu chun zalenna CHRISMAS ni lawm um ei nun a a tlung chau ani nih!!

    ReplyDelete
  7. Mitinin (Account neinaw hai khawma) ei ngaidan hai zau taka ei tarlang thei beisei leia Anonymous hi sie a nia, a thei chun Hming le khuo hming thrangsa pei sien nuom a um.

    ReplyDelete
  8. Lienthanglur KhawzawlDecember 27, 2008 at 4:39 PM

    Hmar ei ni leia ei thanaw hrim hrim am, thil chinchang hrie a thiem inti deu hai hin society a ei la contribute tawk nawh? Khawpui a inthawkin ei ngaidan thatak tak hai ei hrilin ei zieksuok a, tum thlangram a hang fe a hril le thaw ei um? ei "Zoram Khawvel"-hai, ei lekhabu le article ziek thatak tak hai hi thlangram pa'n a pawimaw zie le a sung a inziekhai hi a tiemphak vawng kher dim aw? HIV/AIDS ei buoipui mup mup a, khawpui a um le inchuklaihai le ei educated elites hai hin chu a chinchang ei hriet vawng ka ring... Ngampabung, sartuinek, phulpui, rawvakawt etc. a hai khin an hriet ve phak kher dim aw!!! (Ngampabung a lem khin chu ka hrietsuol naw chun lekha inchuk puitling pakhat chau a la um) Khasi-hai in Asia's Cleanest Village an nei a Global Eco-Tourism an promote nasa hle...sorkar hmalak na a ni vawng nawh... an mithiem haiin an ram an chengna an hmangai bik em... Mimal hmalakna a tam lem. Hmar Students' Association General Assembly le Hmar Inkhawmpui dang dang hai mani theory/ies hai an diktak a nih ti ringawt hril tum na a ei hmang sung hin chu thlangram pa tading le ei hnam tading hin chu tangkaina tak tak la nei pha nawng ei ti kei thansa in...Hmar tawng hlak la ziekthiem lo ka na? 'Hmar' ti hi 'Suol' ti na a ni nawh, Hmar ti na a nel... nang le kei a mimal ku hi a nih suol chu... To hell with all the Bull-Headed Mr. Attitudes and Mr. Ego-s.
    Ka theory an ditak i theory an diknaw ti hin lukhawng a nei nawh... ka theory hi an diktawk fet in ka hriet anachu khawmi i theory chu lo rawn veng ka tih ti hi inchuk inla chu tuta ei stage a ding hin chu thatak ei ti...

    ReplyDelete
  9. Dear Mr or Ms. Anonymous,

    Hi I thil hung ziek hi I ziek lai khan in rui I nei met or tuinam anih I lung a suksen laia ngaituona mumal rak nei loa, I lungsen damna dinga I hung thaw hrut chu annaw maw? A hnuoia hin I thil ziek ka copy a ka paste nawk ngat. A umzie a um hlawl nawh.
    "hmar ruol hi hnam thra rak lo ani tih hi in hriet a hun an ta aw!!self praise na ding khawm ei nei hlol naw.L keivom hi thil po po a inkhi na hmol fung a hmang ngai naw!!ama hril/sui lo khawm ma hnam bo ral 21st century a Dimasa (hnam hnufuol) vuok tuor,Pathien ringlo Meitei vuok le RAPE hriel hrep sa mei mei ei ni.CCPur phai a khawm MLA thlang dok thei lo hnam in tlaw/kawkbo ei ni ti hi ei in hriek vat naw chun khawvela refugee hnam ei ni mek a, ei la ni vong ding ani!!history Hranglien songate ti hai ziek ei tiem chun hmar hi zo hnathlak a kawi le hnam hmasiel tak,dawikawlok tak hriet thei ani ti hi Aries ,lc hmar ti hai rawi hin lo hri ta vat ta ro.inthim na le mawl na hi ei thi pui na ding a la ni a!!suol sim na le inhriet suok na hi sandamna ani khawvel piellei le van a khawm ,chu chun zalenna CHRISMAS ni lawm um ei nun a a tlung chau ani nih!!
    Khi a chunga khi a tak taka I thang ngama, I changchawipui ngam tak tak ani chun I pi, I pu, I pa, I nu le I unau le I hnam chanpui hai po po I hrilsiet ani zing anih. Bible I awi awm bawka, a hriet khawm I hriet ve nel nuol ring a um. Chuleiin Bible in "mani nu le pa, mani u le nau belchieng si lo le belchieng dawl loa hrilse tu chung rik dan kha hriet tha vieu a tih. I thilhril khi nangkhawma'n I awi ka ring nawh. Miin khieng ang khin I pu/pa/pi/nu or lainat hai ti chie sienla hai che I lungasen naw chun mak atih. Chuleiin, I awi le pawmnaw ding chu ziek ngainaw la, chun 'facts' hriltum dam I lo ni chun 'facts' hai kha 'facts' tak tak tlingthei dingin HMAR HISTORY distant and recent hai khawm tiem in hriet chieng tum deu rawh. INTHURUOL lo eini hi chu andik thoa, anachu a dang I ti hai le I ti dan ki hai ruok khi chu Hnam tadinga 'blasphemy' a kai thei anih. Chn ei chauna cho en en ding ani bik nawh. Hmar hnam hi negative matter ngawta siem le sip ei ni bik nawh. Hieng ang 'defeatist and self-mortification attitude' hi chu bansan thei hram inla nuom a um ngawt el anih.

    A hmangaitu che,

    Beth Hmar
    Lamka,
    Churachandpur

    ReplyDelete
  10. way to go Beth Hmar, I really appreciate your ideology. It is high time we start looking for practicable options for the socio-cultural, socio-political and socio-economical upliftment of our tribe in relation to the environment we are exposed to.

    ReplyDelete
  11. Hmar hnam in ei mamaw hi tam tak um sienkhawm chuhai laia mi tlawm te hung tarlang ka tih.

    1. Hnam hmangaitu politician ei mamaw: Mimal tukhawm tibik le tumbik ka nei nawh. Ei politician hai hi election hun laia ei ram le hnam ei hmangai ang hin ei tling hnung hin ei hmangai zo ta naw hi a pawi anih.

    2. Christien tha ei mamaw: Hmar hnam hi Christien/ringtu ei in ti a, lawm a um, sienkhawm ei umdan le ei nung chang hi ei en in ringtu tha chu ei ni naw tawp. Biekin a ei mizie le Office a ei mizie hi an angnaw taluo hi a pawi anih. Pathienin ei fakzang na ding a a mi pek ei sing hai hlak thawtha peilo. Ei umna ding a hai hlak um pei bawklo hai ei nih.
    3. Social worker huoisen: Kohran thuoitu hai le Politician an lo ringum tawknaw khawma hmaisana kawk ngam tu ding social worker, hnam a piengthar le huoisen ei mamaw anih.
    James

    ReplyDelete
  12. Mi thiem ei tam deu deu a ngai dan khawm a tam deu deu ani. Anachu mi in an ngaidan thatak tak an hung ziekhai, alo sawisel dan ding cho ngaituo ei la tam khop el. Ei ram le hnam chu changkang sien ei nuom senga, siemthat khawm ei nuom seng ring a um, ngaidan khawm a dang dangin ei nei seng, chulai zinga, miin a that thei dan ding an hril laia, a siet tieng pang lo hril ve tawk tawk hi chu an thaw chie kher ni in an lang nawh. Chu nek hmanin, a suk puitling pui dan ding hi ngaituo pui lem hlak inla, constructive deuin in comment tuo hlak tum lem ei tiu. A then lem hin chu, an hung ziek nawk in lau ni awm takin ei zuk sawisel rak tuma (sawiselna ding ei hriet naw sa sa khawmin). Thu ziektu tam takin an zien naw pha reng bawk ani. Tuta Emmanuel Zarzosangin a hung ziek lem hi chu, mani a hmang nghal thei tamtak a uma, hienghai po bek hi chu, a tiem po hai hin hmang tangkai tum ei tiu. Chu chun a tiem phaknaw hai khawmin ei thil thaw anthawkin an hung inchuk ve thei ring a um. Baua hang khek kher kher hi a poi maw tak ani chuong kher nawh.
    Ramhmangai Khobung

    ReplyDelete

Comments not related to the news or article may be deleted.

Powered by Blogger.