Halloween party ideas 2015

HMAR STUDENTS’ ASSOCIATION
GENERAL HEADQUARTERS: CHURACHANDPUR, MANIPUR
MIPUI KUOMA NGENNA

April 28, 2011

Ei thuoituhai hmalakna le sawrkar hotuhai ditsakna zârin HSA Campus, Rengkai, Churachandpur, Manipur-ah Tribal Hostel Complex (nuhmei le pasal ta ding a hran ve ve) bawlna ding NEC (North Eastern Council) chun, Manipur State Sawrkar fethlengin, tulai el khan, cheng Vaibelsie 4 le maktaduoi 7 (Rs. 4.7 crores) zet a mi pek a. Manipur Chief Secretary, Pu DS Poonia-in, December 27, 2010 khan a hmun ngeiah Hostel lungphun hawngna chu a nei a; sin khawm, March 28, 2011-a inthawk khan ṭan a lo nit ah.

Hieng anga ‘project’ lien hi, ei ram le hnama dinga thil la um zen zen lo le, um nawk el ding khawma beisei intak tak a ni a. Hostel hi eini ta ding bik lieu lieu a ni chie naw a chu, ei hmun le ei rama inṭhut a ni meu si leiin, a sawrtu tak ding le a hmang ṭangkaitu tak ding chu ei nih tho tho a nih.

Ei Hostel dinga hin, lekha inchuk nuom le thiemthei, ṭhahnemtawk tak sie ei tum a. Dan pangngai anga um-man (fee) ruok chu naupang tin hai anthawk ei beisei vawng naw ding a nih. Chuong ang hamṭhatna chu Manipur-a inchuklaihai chauh ni lovin, Mizoram, Assam, Meghalaya, Tripura le hmun dang danga mihai khawma an chang ve ngei dan ding lampui ei dap bawk a nih.

Sin ei ṭan mek le inruol hin, mipui thaw thei dinghai chu HYA hotuhai leh inrawntu peia thaw a ni a. Tuithaphaia Branch tinhai ta ding lem chun inhlawna remchang siem pek ei tuma; anni khawm an nikhat tha hung thawlawm ve dingin ngên le beisei an ni bawk. Hieng ang Hostel hi Hmarkhawlien, Muolhoi, Aizawl le hmun dang dangah nei ve pei dan ding lampui ei dap a, hlawtling ngei dingin beiseina insângtak ei nei bawk.

Tuta ei buoipuitak Hostel hi ei bawl zo pha chun Warden, Cook, Sweeper le Chowkidar hai thla hlaw nei dingin lotheilova ei ruoi a ṭul ding a ni a. Chu chu hre zingin, December 29, 2010-a HSA Executive Council inṭhung chun,, hi Hostel enkainaa hmang ding le naupang inumtir dinghaiin midang le hmundanga an seng zat neka tlawm seng siin inhoitaka an um theina ding beiseiin “Hmar Students’ Education Fund” indin dingin a rêl a. April 9, 2011-a Council nei nawk ṭumin HSA member tin le mipui lai chu ‘fund’ a ding chun a hnuoia ang hin pawisa sum dawl dinga ngenna siem ni sien tiin thutlukna a siem bawk a nih. Hieng ang hin-

1. HSA member, Class X le a hnuoi tieng po, Rs. 10/- seng.
2. HSA member, Class XI le a chung tieng po, Rs. 50/- seng
3. HSA member ni kher lo, inchuklaihai hmakhuo ngaituo le inhnikna nei phawt phawt, Rs. 150/-

Hieng anga ei sum dawl dawkhai hi a pung um dingin Bank-ah sie ning a ta. Chu pawisa pung chun, ei Hostel nitin mamaw a phuhruk ding bakah, ei Hostel a hin, naupang rethei le harsa, lekha inchuk nuom le thiemthei si hai chu, thangpui le sawmdawl ei tum a nih. Hostel le Fund enkawl dan dinga ṭul le pawimaw danghai chu a hnunga rêl le ngaituo la ni pei bawk a tih. Hi hmalakna hi sukpuitlinga a um theina dingin mi po po kuomah HSA Branch le Joint Headquarters-hai fethlengin ngenna le inhriettirna ei hung siem a nih.


HSA General Headquarters aia ngenna siemtuhai:-

Sd/- 
(Dr. John Pulamte)
President

(Lalthlamuana Hmar)
General Secretary

(Rochunghnung)
Jt.Secy.(Hostel & Building)  

Post a Comment

Comments not related to the news or article may be deleted.

Powered by Blogger.