Hmar Inpui in Literature le inzawmin mipui ‘support’ a phut

Hmar Inpui, Gen Hqrs chun Literature “hmasawnna dingin” mipui a inthawk ‘thangpuina’ a phut thu chanchinbu ah an thelar a. Chu thusuok  chu ...

Hmar Inpui, Gen Hqrs chun Literature “hmasawnna dingin” mipui a inthawk ‘thangpuina’ a phut thu chanchinbu ah an thelar a. Chu thusuok  chu a hnuoiah hin hung tarlang a nih. Ngaidan nei thei hai chun in ngaidan hai hril seng unla nuom a um.

HMAR INPUI.
HQTR CHURACHANDPUR, MANIPUR
Dated Churachandpur the 9th September 2011.

Ei chengna khawvelin a zir tak naw leiin Hmar Inpuiin ei hnam le ei society ta dingin ieng thil am a thaw a, ti le ei hmalaknahai po po hril remch^ng lo tam tak a um a. Chulai zing chun mithenkhat, ‘Hmar Inpuiin iem an thaw leh,’ tia Welfare Fund tlawmti khawm pe rin ngawi ngawi le pe nuom lohai khawm an um mek ti hriet a nih a. Hi thil hi Hmar Inpui Executive chun pawi a ti hle a nih. Ei Society hi tam lawm naw inla khawm State panga lai ei lo del ve leiin, ei chengna hmun a zirin mipui harsatna khawm an ang nawh a.

NC Hills-a ei mihai harsatna le Cachar (Assam)-a ei mihai harsatna an ang naw angin; Mizorama chenghai le Manipur-a chenghai harsatna an ang bawk nawh. Ei area hi a lo lienin a lo in-kar-kak deu leiin General President khawm nuom angin Head Quarter a hluo lum hman nawna thu ah pawi ei tih. Iengkhawm ni sien, pawl le association hrim hrim mipui support-na naw chun a hratin sin a thaw hrat thei tak tak ngai nawh a.

Chuleiin, Hmar Inpui Headqurter chun thurawn pekna le sum le paia inthangpuituona kawngah Hmar mipuihai thangpuina (support) a mamaw zing a nih. Tuhin Assam, Manipur, Mizoram, Meghalaya le Tripura chenghai le India ram khawpui hrang hrang (Delhi, Bangalore, Guwahati, Shillong etc)-a chenghai, Hmar tawng hmang danah zai khata ei luong theina dingin Hmar Literature Society, Manipur, Assam le Mizoramhai leh inthuruola Joint Seminar nei tum mek a nih a. Hi Seminar huoihawtna ding hin sum tam tak ei mamaw a. Chun, Literature tieng hma nasa takin ei s^wn a. Assam University-a khawm BA chen Hmar MIL inchuk thei dinga phal pek ei ni tah a. High School le College level-haia khawm Manipur-a Hmar MIL la (offer) nekin Assamah Hmar MIL latu an tam lem mek tah a.

Entirna dingin, Silchar khawpuia college pakhat G.C. College chauva Hmar MIL latu khawm students 300 an lo tling hiel tah. Amiruokchu, harsatna ei renga ei inthuruolna zara ei sutkieng mek ding khawm thil tam tak a um. Entirna dingin Assam University hnuoia Hmar MIL inchuktirtu ding sawrkarin a mi la pek thei hri naw leiin, tukum sung chu hnamin MIL inchuktirtu hlaw ei pek a ngai a.

Chu mawphurna chu ei phursuok thei naw a ni chun, college levela ei tawng inchuk thei peina ngirhmun chu derthawng takin a um a nih. Chuonghai po po le, ei hmalak meknahai mitin hrieta ei puonglang el remchang chie lohai ei phursuok pei theina dingin mipuihai, in thurawn le Finance Department-in in mawphurna tawka an lo rel chu sukdik seng dinga ngen le beisei in nih. Hmar Inpui hmalakna le a fepei dan chieng lema hre nuomhai chun, mawphurtuhai kuomah indawn thei zing a nih.

Hnam ta dinga in thahnemngaipui

Sd/ F.Doliensung. Jt Secretary.

Reactions: 

Related

Press Release 3096370907339291310

Post a Comment Default Comments

  1. FIRST REACTION: Pu L.Keivom via Hmar Yahoo Group

    Hmar Inpui Thupuong hin thil tam tak a mi'n ngaituotir a, bawk dom meua mi tinin a ngirhmun hi ei ngaituo zui thra dingin ka ring. Hmar Inpui indin lai khan ka um ve a, ei indin sanah ei chieng naw a, ei indin hnunga ei hmang tum danah ei chieng naw deu deu a hoi. A Hmar Inpui cheltuhai hi an chieng nawzuol khom a hoi a, a thaw ding thaw loa a thaw naw ding thila inrol buoi chang a nei hlak a hoi.  Non=political organisation ni siin political party po po aiawa ngir ding anga ei beisei chang a tam.  Chu taka khom chun political & non-political kar ei thre danah ei chieng nawh.  Iengkimah Inpui inkhang dinga ei beisei chun thil thei a ni naw hrim hrim a, chu chu Inpui thruoituhai khomin ramri an khang thiem a ngai.
     
    Literechar thua dam, Inpuiin rawl nei tum sien khom a nei thei naw a, a nei ding a ni naw a, nei thei ngirhmuna um a ni bok nawh. Literechar hin ramri a nei naw a, dan iengkhom khang inla, umzie a nei nawh. Tharum hmanga hmet dei tumtu khawvela hin roreltu an suok rawn ta a, a hlawtling an la um thrak nawh. Inpuiin literechar tieng hma ei sawn thu a hril hi literechar ni loin sabzeka ei trong inchuk theina dinga phalna ei hmu thu a ni lem. Ei khawvel hmasawn dan enin, literechar tieng hma sawn nekin hnung tieng ei intawl lem a nih. Chu chu hre si loa literechar thu hriltu chun ei literechar ngirhmun a hriet nawh tina ni thei a tih. MIL sabzeka ei thur suok tam lem hi a thrat zawng taka hril chun literature-by-order a ni a, chu chu ei inphùt leia thu ziek tina a nih.  Hang bi chieng inla 90% vel neka tam hiel hi bel chieng dawl lo, literechar inkhina tling lo a nih.
     
    Pawl ropui enkol ding chun sum ei mamaw a, sienkhom a pawl nina tak le a thilthaw-ah mipui an chieng si naw chun sum hung inlawi lut el naw nih.  Kha hmaa thawluina ang ziezanga sum ei inbituk ang khan fe zing thei bok naw nih. Manipur khawvel ringot buoipui dingin biel danga um haiin sum thaw phur zing naw ni hai. Ei mamaw nia ka ngai chuh Structural Reform a nih.  Inpui ngirhmun le ei hmang dan pei dingah hin chieng hmasa phot ei tiu.  A sikinsawina rem thrat a ngai.  Chuong naw chun, core centre-a ei ngai hlak, Imphal-Churachandpur a inthrung ni lo thruoitu ei hung hau deu deu pha leh buoi deu deu ei tih.  LK

    ReplyDelete
  2. Eini Hmar hai thilhriet dan....
    Thangpuina= sum

    Hienga Hmar Inpui le Hmar Literature Society thangpuina dinga sum mipui ngietna  thusuok a siem hi thuoitu hai tadinga inzak um khawpel. Sawrkar an dawr hne naw le an dawr dan ding an hrietnaw zie a suk chieng zuol in ka hriet ve thlat. 

    Hnam dang hai chu Literature Society an nei khawma, sawrkar dan angin an hnam le lekha  tienga changkangna ding lampui hai an dap a. An dap khelah mipui thangpuina an hni a ni khoma sawrkar chungah an lungawinaw zie suklangna ding chauh in lampui hraw dam chauh an ngiet hlak. Mipui sum ngeit dinga organisation hotu in ro an rel vet hi hnam changkang hai thaw dan an nawh. A pe nuom lo an lo um khawma thil awm tak a nih. 

    Mipui kuoma sum ngen nekin sawrkar hni hai sien la, chutaka sawrkar in thil a thawnaw a ni chun lampui hraw/protest nei dingin mipui fiel hai sienla tu'm a nuomnaw um an ta?

    Ei beidawng pha leh, sawrkar pur nekin mimal in thi le thau senga an hmu suok poisa an sik tawk tawk hang hni el dam chu a mawinaw taluo. 

    Hmar Literature Society hai hin sawrkar in sanction a pek khawptawk ding project an la neinaw ni ah ka ngai. Chu leiin project induonghai sien, sawrkar laipui nawr lem raw hai se. Hi thu insuo a mipui 'thangpuina' an ti hih chu last resort a ding khawma dit um lo thil a nih.  

    ReplyDelete
  3. Force a thil thaw chu dan lo a ni a, Inpui thuoitu hai ngirhmun rikna mei mei a nih. Dan ang takin mi pakhat in a hung kal ve la hung um ngei a ta, chu pha chun mi ri an ri an sawn ding an nawm. Patling zet in mani ta ni lo chungah tharum hmang dam ei lo ching hlak kha a zie nawh. Thanghar a hun ti a hla thiem deu a Zote val in a sak kha ngai el raw hai seh!!!1

    ReplyDelete

Comments not related to the news or article may be deleted.

emo-but-icon

Follow Us

Enter your email address:

Hot in week

Recent

Comments

Advertisement

Hmasawnna Thar

Hmarram: Hmar Online Museum

Virthli

Ruonglevaisuo

Latest World, Nation, Mizo News

File Complaint Online

Chiprang-Blogging

REALTIME VISITORS

item