Halloween party ideas 2015

Ziektu-Timothy Z. Zote, Saikawt T.D. Block, Tuithaphai

Khawvela mihriem a chin a lien, a tar zuorin, tu hnuoia um am ei ni a? Tia zawna chu, ei dawn dan inang nawng a tih. A thenin, inthlang rama chun ei aia ei thlangtling hai hnuoia um ka nih ti dam um ei ta. Dawn dan chu inang naw deu vawng a tih, amiruokchu, dan tuipuia lo inhlieu thang hai ta ding chun fel takin dan hnuoia um ka nih an ti el ring a um.

Hieng ang hin, khawvela mihring hai laia mi keihruoitu chu Human Rights, Nature Laws, Constitution tum tum le society tin-a ei dan nei haiin an mi keihruoiin an mi khuokhir tak a. Chuong neu neu chu hril seng nawng ei ta, a bulpui tak chu dan chi hrang hranga inmat vawng a ni a. Chuonghai chu a mi keihruoitu indik tak chu niin an lang.

Khawvela dan popo hril le ziek seng a ni naw ding leiin, a kawitan thei patawpa tawiin India dan peng laia pawimaw tak pakhat Sixth Schedule tobul (Genesis/formation) le a keihnawi (thukhawchang) chu, ka ziek tawng hmanghai ta dinga bengvarna le hmasawnna sirbi pakhat a lo ni tak duoiin tiin; dan hrietna tieng le khawsakna tienga pasie tak nih inhre zingpumin hei phar suok ei tum chu a ni ve bawk hih. Inzak thei naw ve tak chu i mi ti el thei, amiruokchu, a hre naw hai ta dinga hrietna le ngaituona iemani bek a, a belsa beiseina leiin hei thai ei tum hram hram a ni a. Ka hrietna le tha ka tina ringawt chu to pui tawk tawk thei ding ngirhmunah ka um naw leiin hi a chunga dan le inzawma khawtlang thuoitu, thlangtling hai, hnam thuoitu le inchuoklai hai ta ding a, vawikhawr lo taka dan hmanga North East Tribal Area-a hringnun ei hmang theina a ni ngei ringnain induonga um chu hei phar ei tum lem a ni hi tie!!!

Khawvela hin rambung tam tak a um a; chuong hai chun, pawl pakhat indinin tum tha tak tak an nei bawk a, an pawl hming dingin United Nation Organisation (UNO) an inbuk a. An ni khawmin dan le dun felfai takin an siem. Indeginuos Peoples’ Rights, Land rights ei nei dan hai khawm kim takin an ziek bawk. Chung dan a nei hai chu hril seng nawng ei ta, chu tieng nekin India danpui hnuoia Tribal (Tlangmi) hai ta dinga inhumhimna dinga dan zam pek a, ei umna le inzawma ngaituona ei hmang theina ding tiin, Sixth Schedule le District Council thlurna nei ei tum lem ding a nih.

India ram inkeihruoina dan (Indian Constitution) hi khawvela constitution sei tak le lien tak nia hriet a ni a. Kum 1950, January 25 khan hmang tan a lo ni ta a. Hei sui inthuk met inla, dan buotsai hmasa takah khan Article 447, schedule 8 le part 22 a um a. Part 4 le 26 neiin, January 2006 chen khan vawi 93 lai siem danglam a ni a (amend). Amiruokchu, artcle number thenkhat hi chu constitution amendment

(dan siem danglamna’n) a lo nuoi hmang khawm a um nuol a. Artcle number hi constitution-a a um dan le inchik dan a awlsamna dingin indawt pei a pek a ni a. A part hi dan hrang hrang le bung hranga then a na, schedule ruokchu ram inkeihruoinaa ding dan pawimaw zuol hai indawta sikhawm a nih. Tuta District Council ei inkeihruoina bik dan schedule Council parukna ah si a nih, sixth schedule tia hriet lar a nih.

North East India-a Kumpinu Sawrkar Hmadawm Dan

India Hmar Sak (IHS) British Sawrkarin a hung awp khan, tlangmi (Hill Peoples) hai chengna hmun hai hi danglam deu bikin an lo enkawl a. Hril ding lem chun tam tak a um. Amiruokchu, a tawi zawngin hei sui ei tih. Kum 1965-a Robert Clive –in Bengal ram sung pumpuiah sie (tax) an khawn theina thuneina (Dewany) a nei le inruol khan. India Hmar Sak (IHS) tieng (Assam tia hriet lar ramri hnai chenin British rorelna chun a hung del lien pei a. Garo Hills-a buoina suok leiin, Rangpur-a Magistrate , David scot kha, thil umdan enfie dingin a hmunah, a va sui/tir zo hnu August 1816 khan report a thelut a, Scot -a remruotna hai kha Governor –General –in –Council-a pawmpuiin, Rangpur magistrate thuneinaa inthawk hmun thenkhat kha la hrangin North East Rangpur Civil Commissioner hnuoia um dingin ruohmangna siem fel a ni tah a nih. Chu ruol chun, Regulation X of 1822 dan kha siem suok a nih. Hi regulation (dan thupek) hi Brirish–in India Hmar Sak dam a awp dan ding inkeihruoina dan hmasa tak a lo ni tah a nih

Tlangmi hai humhalna dingin hmalakna tha lem a nih beiseiin, Garo Hills kha sawrkar civil, criminal le revenue Court hai thuneina hnuoia um dingin Garo Hills Act (Act XXII) of 1869 khan a pawm a nih. Hi dan hi March 1, 1870-a inthawk khan Garo Hills ah hmang tan a ni nawk. Jantia Hills-ah hai khawm hmang nawk ve a nih. November 1,1871-a inthawk khan Naga Hills, Khasi Hills le Jaintia Hills-ah hai khawm hmang tan ve a nih.

British sawrkar khan, tlangmi hai hi an ni le an ni hnam dan (customary law), hnam nundan, zierang, (Culture) le an hnam nundan hmanga humhal an ni theina dingin, sawrkar ta ding khawm a, hlawk rak lo va an insengral nawna dingin, hieng ang hin ruohmangna an lo siem a nih. Chuleiin, Lushai Hills-ah khawm Chin Hills regulation of 1896 kha a tul ang peiin hmang le zui a lo nih. ( sunzawm pei ding)

Post a Comment

  1. Lalhmingtha hrangateOctober 10, 2012 at 5:02 PM

    information a hung thawlawm thra khawp el, hung sunzawm pei sien ka nuom ngeia

    ReplyDelete
  2. Kum 1965-a Robert Clive –in Bengal ram sung pumpuiah sie (tax) an khawn
    theina thuneina (Dewany) a nei le inruol khan. India Hmar Sak (IHS)
    tieng (Assam tia hriet lar ramri hnai chenin British rorelna chun a hung
    del lien pei a..... ti hih India ram pienghnung a nisi leiin iengtinam ani thei ding aw !



    Sixth Schedule chungchang hih ka lekha Kan zinna –VII a
    khan tlawmte ka ziek met a hiengang hin “India
    ram Britist sawrkarna ringkawla suokna dar inri le inzawmin hnam hnufuol le
    fuollohai chanvo in anga um danding khah Pu Gandhiji thupui tak ani leiin North
    East India state ( Assam) ram sunga hnam hnufuol, nunphung hrang nei, tawng
    hrang hmang an umve ti an hriet a. Chuonghai chanchin hrechieng dingin
    Sub-Committee on the North East Frontier (Assam) Tribal and excluded Areas ti G.Bordoloi inrawina hnuoi ah indin ani
    a, Bordoloi Commission ti a nih. Hi Bordoloi Commission a Co-opted member
    dingin Lushai hills a inthawk Pu Saprawnga le Khawtinkhuma ruot an nih nghe
    nghe...."



    Chun, ila hung ziek zawm pei ding ani bawk a. CCPur District hih Fifth Schedule am Sixth Schedule ei hmang tihai dam hreit a tha a. Fifth schedule
    le Sixth schedule an angnawna hai dam hih ihung ziek ngei ka ring a, ienglei a
    khang chen Manipur ah District Council election ei nei theinaw am tihai mipuiin
    an hrietchieng theina dingin.

    ReplyDelete

Comments not related to the news or article may be deleted.

Powered by Blogger.