Halloween party ideas 2015

GUWAHATI HMAR CHRISTIAN FELLOWSHIP

(An Interdenominational Evangelical Fellowship)

CBCNEI Compound, Pan Bazar, Guwahati ‐ 781001

clip_image003

To

The Moderator/Secretary,

Independent Church of India

Sielmat, Churachandpur, Manipur

Subject: Delhi khawpuia ICI binga inkhawmna siem chungchang

Lalrama thawpui dittakhai,

Ei Lalpa Isu hming thienghlimin chibai kan bûk cheu.

Independent Church of India, 63rd General Assembly thurel Resolution No 5. dungzuiin, ‘Delhi sungah remchang hmasa taka kohran pawl bik hminga inkhawmna nei ta dinga thurel’ chanchin hi kan lo hriet ve a. Hmar Christian Fellowship, Delhi hi Delhi khawpuia Hmar tawng hmang haiin tawng thu leia Delhi Mizo Inkhawm huna inkhawm ngai lo tam tak an hung um ta leiin kohran pawl bik um lovin Delhi Hmar Christian Fellowship tiin kum 1988 khan indin a lo ni a. Hmar hnam tlawmte mi hnung hnawta ei um zing lai Delhi ah kohran pawl bik um lova kum 25 deu thaw inthuruol tak le hrat taka rawngbawlin hma an lo lak khu mitinin ei lawmpui chau ni lovin, nasa nawk zuola hma an sawn theina dinga tawngtaipui tuhai ei nih a. Chuonglai zinga hi thu hung inher suok hin nasa takin lungril a thawng a, pawi kan tih a. Eini laia inremna le inhmangaina, inditsak tuona khawpui lien haia a um hi a suksiet nasa hle ding niin kan hriet a, pawi kan ti takzet a nih. Chuleiin, lungril takin a hnuoia thuhai khu ngun nawk zuola Hnam pumpui huoma Pathien ram thlira in hung ngaituo thar ngei Pathien hmingin kan hung ngen cheu:

• Hmar Christian Leaders’ Forum huoihawtna hnuoia Hmar Gospel Centenary 2010 declaration No. 5 na khan hieng ang hin kohran thuoitu popo haiin ziek le sign a nih a. “Khawpui hmun hran hrana Hmar Christian Fellowship indin theia a um hi lawmum kan tih. Hmun danga khawm indin theia a um pei tha ti a nih. Hmar Christian Fellowship hai le Kohran pui amani pawlpui amani hai inkara iengkim inkalna um lova Networking system tha tak neia rawngbawl le sinthaw tlangna ei nei thei peina dinga hma lak a pawimaw”. Hi declaration hi inza taka, Pathien ram le Hnam pumpui huopa hma ei lak nawk zuol kan nuom.

• Hnam pumpui huopa Hmar Christian Fellowship, Delhi in rawngbawlna an nei khu nasa takin Pathienin mal a sawm a, sorkar sinthawtuhai le inchuklai haiin an tangkai pui emem a. Pathien rama nasa nawk zuola hma an lak theina dingin pawl tinin a hma neka nasa lema ei thangpui nuom a um hle.

• Kohran inthena tam taluo leia khawtin ah indaidanna um hi ei hnam tadinga ei thangmaw bawk a ni leiin, khawpui lien lem haia lungruol tak le inthuruol taka rong ei bawl tlangna le inkhawm kawpna hi keidar lova siem hrat lem dingin hma la thar nawk lem inla.

• Khawpui haiah Hmar kohran pakhatin ‘kohran pawl hminga’ inkhawmna ei nei a ni chun a kakhawk ding hi thil ditum lo le ngai ngam lo khawp a ni ding a nih. Pawl tinin inkhawmna a hranin India ram khawpui haiah hung nei ve tum ngei an ta. Ei lim ding chu ngun taka ei ngaituo chun ‘Setan lawmzawng tak – inthedarna le innghir innghona’ a hung ni ta ding a nih.

• Hlapawl sak khawp um lo KTP, rongbawl thei taktak khawp lo pawl kohran hung suok a ta. Chu inthena lungril chun HSA, HYA, Welfare Society hai chen a hung nghawr nawk ding a ni leiin, Pathien hminga hi thu hi a thei hram chun keikir nawk dingin kan ngen takmeu cheu a nih.

• Thangthar kohran hung inthang duong pei dinghai lai, inhmangaina le inlainatna chi the nawk sau sau inla. Chuchu thangthar kuoma ei ‘thilpek’ (gift) ropui tak a ni kan ring tlat bawk.

• Khawpui lien haia project pawl tinin an neihai hi kan lawmpui zing lai, Pathien hminga inlawi khawmna ‘Fellowship’ tha tak ei nei hi tluong taka a fe pei hi ei duthusam a ni ngei kan ring tlat bawk a.

• Pathien thuoina zarin tuhin khawpui hieng Delhi, Pune, Mumbai, Chennai, Bengalaru, Ahmednagar, Silchar le Guwahati hai ah Pathien thuoina zar lieu lieu in HCF/HWS hai ei nei a. Naupang tete haiin anni le anni in enkawlin theitawpin Thlarau rama an hrat theina dingin hma an lak hram hram hai hi, pawl chi le lungril tukhawma ‘tu’ lova tawngtaina leh ei sana, hma ei lak seng kan nuom takmeu a nih.

• Hieng khawpui kohran haia pawl binga hmun zu suot nek hmanin kohran lien deu hai hin Pathien hminga Pastor dam deputation a in tir hi mi tamtak lungril le beiseina khawm anih

Chuleiin, ICI hotu dittakhai kuomah hi ngenna tlawm tak kan hung siem hi, ei hnam le ei ram chauh ni lovin Pathien ram a lien lema thlirin (larger context) a thei hram chun, lunginsiet taka mi keikir pek nawk dingin Pathien hmingin kan hung ngen cheu a nih.

Lalrama in thawpui

clip_image008

(Rev. Dr. H M Songate)

Chairman

 

clip_image006

(Dr. Chawngrolien Chonzik)

Secretary

Copy to: RPC- NE I, EFCI, EAC, PCI Vongzawl Presbytery, Hmar Fellowships at Indian Cities

Post a Comment

  1. Lalhmingtha hrangateDecember 22, 2012 at 11:48 AM

    Guwahati Hmar Christian Fellowship, in thaw tha! inhnina ropuitak hi Unau ICI haiin inhlawtling tir hai sien la cheu Kristmas Pathien thlarau malsawmna ropui tak le lawm thlang theiin inla nuom a um hle.

    ReplyDelete
  2. Hi thusuok hi a tha ve tho laiin kohran indin chu tha ka ti lem. Asanchu, kohran chu hnam a ni nawh a, hnam ang zawnga ei Kristien inthuoina hin Pathien hmel a hlie lem hlakin ka hriet. ICI hai hin nasa nawk zuola rongbawlna hma an lak tumna lo do rak hin Pathien ram suklien tumna lo dang tum ni hlau rawi ei tih fimkhur a tha hmel.

    ReplyDelete
  3. Vengtieng a kohran a inhnik ang in khawpui a chu a context a lo dang dai el anih. Inngaituo rou KA ICI Hotu popo hai..pathien hming in

    ReplyDelete
  4. mi var tak tak ka sawn hai khawm an lo var bek bek naw ngei, ka ang vawng an lo ni ie. national capital hi varna a lo ni chuonglem ka lo sawna chu! haha

    ReplyDelete
  5. KOHRAN EI HAU ANG HU IN EIRAWNGBAWLNA, HMASAWNNA EI HAU BEK IN AN LANG NAWH A, THEI SIEN CHU PUM KHAT A LUONG ZAI REL LEM INLA...... DELHI AH CHAU NI LOVIN.... NUOM AVA UM DE AW !!! VANRAM AH KHAWM PAWL IN DIN EI TUM EL AWM HI TIE ?

    ReplyDelete

Comments not related to the news or article may be deleted.

Powered by Blogger.