Halloween party ideas 2015

Ziektu: Darsanglieng Khawbung

Ei thupui en chun, kei hrietna tienga insit umtak le mani khawm inhre fumfe lo ta ding chun, a ropui taluo deu chu ka ti. Nisienlakhawm, ka lungril a kan vawi em em hlak, hei hrilsuok lo a ipbo el ding chun a pamhmai ka ti em leiin, inzak-inphak khawm dawn loin ka hung phulsuok bawr bawr el tum a nih. Ei officer lien hai le mi ropui lem min fui theitu hai ziek ding a hatak a ni lai zingin ei tumtak ziekfû naw inla khawm lo ngaituo fûk tum hram hram el ro. Mi chupa khapa ngaidan ti le an awng kauchek laksawng khawm ka tum nawh. Kei hin ngaidan le ziek nuom dan ka nei ve nih. Mi dang khawm a an ngaidan an ziek ve tho si a le!

Hun iemanichen liem ta a mi ti ti na chun, Hmar hai chun chenkhat an nei chun zu dawnna dingin an hmang an mi ti hlak a. Chanchinha meiser in a mi hung kâng hnung lem khan chuh, rawngbawlna tieng nasatakin hma ei lak a, khawvel mithiem le remhriehai in ro an mi rel khum a, ei nuomna tieng le nuom naw na tieng khawm hril thei lek loin an mi petleng an mi petleng a. Hmun tum tum a in zarpharin, ram le hmun bîk khawm nei thei lo khawpin semdarin ei um zing bawk a. Umna hmun le ram in a zir naw lei le chîngdan an angnaw lei amani ding ei hriet bik ta le, lungruolna zion tlanga leng diel diel khawm intak ei ti deu chu an tan naw ma ni ka ti deu. A rawng ei inbawl le ei phatsan ngailo Remruottu chun hun ieng tika mani chu mila suikhawm ngei ngei a tih, ti hih kei chu kan hnemna umsun chu a lo ni ta a ni(?)

Tuhin, beiseina thar nei thei dingin khawvel ke pen ruolin ke ei hung pen an met met ta ni in an lang a. Chulaia, hmu thei le hrietthei hung inlang chuh, tulai sawrkar sin le kawmpani lien tamtak a hai hin eini Hmar hming ngei, a awng khawm buoi hak lova hmang thei nasatakin ei hung lutin ei hung pung ta pei a. Hnamdanghai mi er (el niloin) ei ni ta el hai dam hih, Lalpa malsawmna ei dawng inanna ding lampui chu a ni el ta naw ding maw? State Service le Central service a, nasatakin hma eisawn a. Kum hung liemin Civil service a hai khawm hang hung la nawk pei hei tum nawk inla atam thei ang invawrlut nawk thei inla chuh, nuom a um nawk zuol awm. Tulaia, hahnemngaitaka coaching ei thawna ra hai le midang ta dinga malsawmna hnâr ni dinga hang ei hei lak hai hriet le hmu chang hin chuh, hmar ka ni hi, ka lo ni naw pal kan lau rum rum el!

Kum liem ta a, Manipur State Service le Assam State Service a eini mi tling le interview la hmabakhai hei hriet lem khan chuh, lawmna mittui a luong hiel thei chu tie. Hienglaizinga, thil danghanglakna dinga ha a ka I hriet  chu, Mizoram hih hmun danga ei unau hai ang in Central le State a hai hma hung sawn in, hung in vawrlut sup sup ta hai sien la lem chu, ei ta ding hin Ram hi tiemsa a um puitlingna lampui hih, inzâmzut el tang a ti ka ring. Nang I hmuna kei ka hmuna ti in ei umna hmun senga inthawk nawr tungin, Ruonglevaisuo, hmun ngei a sawn ruoihena bêlpui hei in khuk hlut hlut chu chak ava um ta de. Chu ding chun, nang le kei hi tuta hang la thei ding le mawphurtu tak chu ei nih.

Chuleiin, inchukna mawl hi thlada loin, a neka nasa nawkzuolahang eilak hi a ul takzet a, mithiem le mivar, inchuk suok ha tak tak nei ei hung pung pei chun, hma hung sawn eita, insawiselna le intum intuona khawm hung tlawm tiel tiel bawk a tih, ti hi ka ring dan nghet bur chu a ni ve tlat mai mai a. Lekha inchuk vartak hai chun, zaidaw theina le mi lungril hriet thiemna nasatak an nei khela, thilha thawdan ding lampui le mi infuidan thiemna, lungril varna an nei sa hlaka, asawiseltu ringawt nilova, a lampui dang kawkhmutu, mi puitling le rawntlak ni ngei dingin inchuklaihai hin hang la thar nawk zuol ei tiu. Lekhathiem anga inlang, sinhatak nei, lungril le mani anthawka Hnam ta dinga, chenfakumtak ninaw hi thil inzak umtak lai a pakhat a ni si a. Min, lekhathiem hmangna bo an mi ti ve nawna dingin, in ngaituo nawn rawp bawk hi a ha. Mi tamtak inchuk sang si, hmang tlak lo  an um ve nuol a ni aw!!

       Nang chu pâwl (Kohran) kei chu pâwl ti lova Hnam anga ei ngirsuokna ding lampui mawl hi Pathienthu ti chau naw a chun, ei ngaituona hluo tu tak ni thei sien la nuom a um. Eini le eini eiin milnaw hin Hnamdanghai lawm ei siem lem a, ei hnung tieng an mi nuisaw rân ti hi hrethar inla nuom a um ta takzet bawk. hangruol chu hratna an ti angin, ei hangruol phawt chun, ei neka ropui lem a mi el tu hnam hai lai hin um naw tawp an tih.

 

Post a Comment

  1. Lalhmingtha HrangateFebruary 20, 2013 at 11:45 AM

    Hmar Hnam Ṭhanghar a Hun: A thain a tiem an hawi, Zotui inthieng tak; a hnara hungput hlawt anga a ziektun a lungril taka hnam anvawinaa inthawka a hung inputsuok tir an leiin, a ziektu hi ngaisang a um.

    ReplyDelete

Comments not related to the news or article may be deleted.

Powered by Blogger.