Halloween party ideas 2015

L-Keivom-USA-KhawzawlahBy L. Keivom, Inpui.com Columnist

Kum 2006 khan Baibul inlet hrampui ka zo hman tah leiin, kan nauhai Helen Ruolsingpui, Wellington (New Zealand) a um, a unu Margaret Thangmawi, London (UK) a um le an sangpa a mi tlum tak James Lalropui Keivom, New York-a um hai chu thla ruk sung, July-December inkara kan suok dingin kan nupa le kan naupa David Lalhmingsang leh rem kan ruot a. New Zealand-a inthokin k
an tran a. David ruok chu USA le UK-in visa an pek nuom naw leiin chuong ram pahnihai chu kan nupa chauhin kan sir a. Kalman ringota khom nuoi nga chuong kan seng niin ka hriet. Hun le sum sengso ringot zawnga hisap chun penson ringa khawsa ta ding chun thaw awm khom niin a'n lang nawh. Amiruokchu, Isu ngeiin, "In ro umna taphotah in lungril khom a um hlak" (Mat 6:21;Lk 12:34) a ti ang khan ei nauhai hi ei ro nei sun an ni leiin, an umna le khawsakna hmun taphot chu, ieng anga hmun rinum le inhoi khom ni sien, ei lungril le ngaituona a fukna, ni tina ei trongtrainain a deng mathlawn lo chu a nih.

Penson hmaa kan lo hisap dan chun Delhi lum zuol hun sung po, thla ruk vel chu kum tin kan nauhai kuoma chawl hadama inzin a ni a, mi tam takin an thaw hrim a nih. Amiruokchu, ka penson phaa ka bawzui dinga sin ka lo siehai chu a muol muola an intieng hnawk el leiin, ka penson tuk kha sin ka thaw tak tak tran ni a nih ti ka hriet suok chauh a nih. Chuleiin, ka naupa James le kan inhmu nawna khom kum sari zet a lo ni ta hiel a, tlangvala ka maksan kha nuhmei a nei hnung kum thumah kan inhmu nawk chauh a nih. Nauhai, a mi tlum tak nawk nghal nuhmei nei ding chu pa tak la dam zing chun iengkim relpui ding ni awm tak a ni laiin, kan hman hlol si naw leiin a remchang ang anga lo thaw dingin ka hril a, Court hmaa ei kristien zabili kum 2010 July-a Anneke le an innei lai thla khom kan umna sengah computer hmaiah kan lo thlir el lem a nih.

Uong thilah tiemtuhaiin mi lo ngaipek naw hai sien. Nau pali- minu 2 pasal 2- kan nei lai hin a upa tak Margaret Thangmawi (Mawi Ltd London) tak le a naupang tak James Lalropui hin, a thra a siein, an mi puo bik a. An tum a ru a, hmathlir le ruol elna an nei a, miin an thaw thei chu thaw ve thei dinga inngaina lungril an put a, an tum hlenna dingin rinumna le harsatna ieng ang khom an tuor pei. Pathien lungsietna zarin an chengna mingohai khawvelah an thilthawna tieng lawmman dong rawn pawlah an la thrang pei a, thrang thei dingin sŭn le zăn an thokrim bok a nih. Sienkhom, intărlar hi an nuom zawng a ni naw leiin, an lawmman dong a tam lem hi a hnung daia kan lo hriet chauh hlak a nih. Tu lai hnai August 15, 2013-a New York Press Photographers Association Incorporated haiin 2013 Thomson Reuters Award Best in Show an pek dam kha a nu birthday le inzoma lawmpuina thu hril dinga a hung telefawn truma kan inbiekin fangsona fe ding a ni thu le lawmman a dong el thei ti thu a hril vuot a, kan hriet chauh a nih. A hun nei po po a hmangna chu a sin le inzoma inchuk ding umhai inchuk ngat ngat a ni top.

Mit tharin
Kum 2006-a thla thum chuong kan cham sungin New York Diary 1-8 chipchier takin ka ziek a, chuonghai chu a trul tongkhong naw chun hril non ka tum nawh. Kha hmaa New York, abikin Manhattan Financial District ka fang changa ka nghok tak chu ring liek vang vanga bilding insang ena tang ngai zing kha a nih. Tuta trum ruok chu an in dizain thiem dan hai, an hmangraw hmang thratzie hai, an bawl uluk dan le mawizie haiin ka mit a lak a, ni danga concrete jungle anga ka lo hmu hlak kha tukver danga inthokin ka thlir a, "hieng lai hi chu a thra naw deu ie" hang ti ding a vang kher el. Sumdawngna iemani chen a tlak hnuoi leia kompani tam tak tla sehai dawr hmunhai kha an hluo sip nawk deuh vong ta a. Khawvela sumdawngtu lien 500 chuongin Manhattan-a a lŭn zuolna lai hi an hluo sip a, an insim chun khawvel a hritlăng nghal el a nih. 

Hiptu chi hrang hrang
Tuta truma kan zin sunga bi chieng ka nuom laia pakhat chu: ieng leia thralaihai hi USA hin a hip bek bek el ning a ta? ti hi a nih. Chennai-a ka rawipa naunu hmel thra tak el, engineering inchuk zoa a pa company-a thok chun ni kum khan Tamil tlangval, USA-a sinthaw, ft 6 inch 2-a insang chu pasalah a nei a. A pasal hi nau mal, a pa company lien taka lu nina chela khawsa neka Americaa um thlang lem tlat a nih. Chu kan titinaah mak tiin a san ni awma an hriet ka'n don a. A tarpiin a donna chu: zalen tak le khuokhirtu um loa khawsak a nuom lei a nih. Mi tam lem hi sum hlaw dinga fe an ni laiin, an reng chun an lo ni vong nawh. A zalenna boruok khelah, mi taima le lungvar nei ta dingin khaw lai khom intham lungawi ngai loa kaisang theina lampui a'n hong dei duoizie dam; khaw lai khom fak le dawn ding du du hang ban phak ela a um hner hnurna hmun a nizie dam; a thlawna naupang lekha inchukna ding sikul thra a um khep khupna hmun a nizie dam; nghatna tieng hmun inchep, bal le tirdakum neka dit tawka huon cheimawi ang ngot hmu ding a umna ram a nina ringot khom hi thlakhla tham chu a ni ta hrim hrim.

Darkar khatah sinthawtu hnuoi hnung pawl khoma dollar 10-12 (cheng 600-700) a hlaw theina ram a nina ringot khom hi ei ram leh chu hang tekhi sin chi khom a ni naw hrim hrim. Bei chaua mihriem hi hring thei ni sien chu, anni ta dingin sakhuo buoipui a ngai ta nawh. Sakhuo an ngaisak ta naw thu ei hril vet khom hi anni ngirhmun chenve-a khom hin um ve ta inla, eini lai kristien hmu ding um ta kher nawng ei tih. Tipaimukh Biela chenghai po po sum le ro nei let tam hi dawr chikte-a khom hmu ding a tam. Chuong ang ngirhmuna khawsa si eini rawiin mani taptebulah insan puom le rawl ki suksang a..."Ka ngaidan chun..." ti am, "Kei very very ICI" ti dam, "Kei EFCI, RPC, EAC, HLS..." ti dama ei hang inhrosak hin thupui phur fe dingin ei ngaia chu ei hnuk hrui bak chu a lo kei fan awm naw ie!

L-KeivomNew York-Maryland
New York-ah ni hni sung hmun hrang hrang sira ka naupa James le kan invak hnungin, kum 2011 August-a muol lo liem tah, kan tupa Rev (Dr) Paula Pakhuongte nauhai chengna khuo Frederick, Maryland State-a um, car-a fein a ram khawpui Washington-a inthoka minit sawmli vela tlung thei, an President-hai chawl hadamna Camp David tia an ko tlang thruta khaw mawi tak ela chun tu le tehai le Zo hnathlak mi tam tak hmun khuora khawsahai chu zu kan dingin November 9, 2013 Inrinni khan ka naupa James leh a nuhmei leh car-in kan inthok thla a. Km 385 a hla, darkar 4 le minit 19-a tlung thei ni sien khom lampui hmun remchangah a khat tawka kan chawl pei leiin ni tlak tawmin Paula nau upa tak Lalhminglien Pakhuongte in, 1226 Palladian Way kan tlung a. Hi in hi kum 2006-a kan inzin truma kan cheng tlangna inpui tak a nih. Hi trum hin ei hla sak thiem Lalruotmawi khom zan khat a hung riek nghe nghe a, kan hlim tlang hle.

Paula naupa dang, a tlum tak, Lalhmingthang Pakhuongte chun kum 2006-a kan inzin trum hin Tahan mi Khin Htwe nuhmeiin a nei a. Sungkuo neinunga inthoka hung a ni leiin sawt naw te sungin in thra tak el an inchawk a, intum an suok a, chu ina chun Paula khomin a hun nuhnung tak a hmang liem a nih. In dang pahnih an inchawk sa bakah sumdawngna thra le hlawk, a khawpui laili West Patrick Street-ah Beauty Salon, CALI SPA ti-a an ko chu an inchawk bok a, Lalhmingthang nuhmei chun a enkol a, massage (inhmet) thaw malamin ka ke a mi sukfaipek nghe nghe a. Customer enkol seng lo an nei zing niin an hril. Anni unau hi ralthuom le indona hmangruo siemnaa sinthaw an ni a, aram mi nina an hmu hma khan ram dang mi hieng hmuna an sor um sun an nih. Lalhminglien khomin sum lam rawn theina Real Estate tieng lut dingin hma a lak mek. Frederick-a hin Zo hnathlak danghai khom kum sari sung hin an lo pung a, in an lo nei fer fur tah a, lawm a um takzet. Punghai hi Chin Hills tienga unauhai deuh vong an nih.

keivom-us-visitResthaven: Paula thlanah
A tuk November 10 chu Pathienni a ni leiin zingbu fak khopah a fe thei po car panga sipin Paula an vui liemna thlanmuol panin kan suok a. Hi thlan hmun hi Resthaven an ti a, company lien tak el, hmun hrang hranga invuina ding thlanmuol inchaw a, thlan hmun zor a, mawi taka kumkhuoa enkol zuituhai ta a nih. Frederick-a Resthaven hi US Route 15 sira khaw puo tienga um, kum 1961-a acre 25-a lien ram an inchawka an tran a ni a, tu hin chu Frederick khaw sunga ringot khom acre 90 chuong ram an nei tah. An thaw dan chu, thlanmuol ding an siem a, plot hrang hrangin an siem a, mani thlan hmun ding le sungkuo thlan hmun ding chenin inchawk lawk le nei song thei a nih. Inchawk lawk chun a man a tlawm a, thi hnunga inchawk chun a man let tamin a to. Inchawk lawk chun India poisa cheng nuoinga-in thlan hmun pakhat inchawk thei niin an hril. Paula khomin a thi hma kum khat neka sawt a ni laia a thlan hmun hi a ditna lai tak a lo inchawk lawk a na, a vuina ding prokram chenin fel thlapa a lo duong sa vong a ni thu le a thi hma ela a hmunah fe a, lungtlu taka a en fel nawk vong thu khom a naupa Lalhminglien ngeiin a mi hril.

A thlan kan va sir ni hin khuo a'n thieng thra hle a, sienkhom khawhai thli a hrang vut vut a, favang hnukhawi, FALL an ti hun, thing hna a tril nasat lai a ni leiin thli chun hnatrawng a len dar chum chum a. Paula thlana dingthrathruona ka kun lai chun ka lungrilah thil tam tak a hung inlang a. Damlai thli chun mihriemhai hi hmun tin le ram tinah a mi len dar chum chum a. Ka tupa Paula khom Pherzawl tlanga inthokin Tuithraphaiah, chu taka inthok chun Kawlphai (Kabaw Valley) le Rangoon (Yangon) ah, chu taka inthok chun USA-ah a len lut a, a taksa, hnatrawng ang chauh tah chu hi Frederick thlanmuola hin maksanin, ropuina ramah a lut a nih ti dam ka zuk ngaituo chun, mihriem ngaia chuh thil ropui le vangnei ti naw ruol a ni nawh.

Pherzawl suok, USA leilunga vui tuok hmasa tak a nih. Chu chu thlirna tukver pakhata inthoka thlir dan chu a nih. Amiruokchu, ka tupa Paula kha hung tho nawkin, kan putu-in titi inlang, kan thu chai ding pakhat nia ka hriet chu: Pherzawl mi, a leilung le khaw suok, a thralbea inthoka pieng, America leilunga vui liema um khan Pherzawl am a chawimawi America? Pherzawl pa kha'm a vangnei America? Bethlehem suok, Jerusalema vui liem khan a ieng khuo am a chawimawi lem? Van ram lekhabu an ti hih a um tak tak a ni chun, Paula address le identity innghatna chu Frederick ni loin Pherzawl a
ni naw thei nawh. Pherzawl pa, ropuinaa lutin kotsuoa Frederick a hmang el kha Frederick ta dingin chawimawina a ni a; Pherzawl pa taksa, Frederick leilunga phuma a um el hin Frederick hi hmun inzaum-ah a siem a nih.

Damnaw kan
Thlanmuola inthok hin Baltimore-a damnaw kan dingin kan inthok suok a. Ama hi Rangoon-a 1986-90 kan khawsak laia inpui nghaktu taka kan nei Rev. Lal Sawithanga, a nauhai kana hung, stroke a nei leia an at, Maryland University Rehab Centre-a an sie, khuo la hre mumal lo, a dam khawsuok ding am ti khom hril harsa a nih. Ama hi pa tumru, Mizorama inthoka Kawlramah hung lut a, Burma cheng hni le a chenve chauh le Rangoon-ah lut a, nasa taka sin thaw a, lungvar leh thranga ngirhmun siem, Rangoon khawpui lailia in nei a, kohran indin, amain lekha inchuka M.Th chen tling phak, pawl nei sang si loa lekha thiem, lekhabu tam tak siema sut, Billy Graham lekhabuhai inleta suttu, khawvel voi tam fang suok tah, mi invong fel, pa rawn kai a nih. 'Unaupa' ti ngota inko hlak kan ni a; taimak le ringum inchukna dinga sikul thra tling takzet a nih.

ICU-a inthoka an hung lak suokna a la sawt naw a, a thil hrietna a la mumal naw a, a kut voi tieng a thunun naw a, a trong thei naw a, a meng pei bok nawh. Hmu rin a um kher el. Ka rawla inthokin a mi hriet a, kam petin hang trong suok a tum a, a thei si naw a, a lung intarin a na a, a mitthli a far zoi zoi a. Hringna hi a lo va hang derdep de aw!

Tu le tehai malsawmpekna
A tukah New York tienga kir nawk el kan tum leiin mipui inpawl khawmna nei dinga an rot khom chu an lo intung lawk nasa hlea chu neipui lo a, mi tam rak lo, kel pum khat fa tawk ruol le pai le sungkuo inhnai zuol chauh fiel a, tu le tehai malsawmpekna hun serh hmang chu thrain ka hriet a. Chu hma chun hun tepter takah Lalhmingthangin korchung mi rochung a nuom tlat leiin dawrah a mi va la tlanpui a, suit singthum man a min chawkpek a, lawm a um ruol ruolin inphalam a um khop el. Kum 2006-a kan inzin trumin a u Lalhminglienin suit a min chawkpek bok a. A lien hret leiin a hnungah rongbawltu, kan nauhai pakhat, a ta dinga thrui ang ela inrempui thlap chu ka rochung sawng a, a rongbawlna hmun tinah hak takin a nei a, thilpek trangkai le vangnei tawp a nih.

Zan bu fak khopin darkar chenve thu tintang ka hril hnungin, ka tupa Paula nauhai po po, an nuhmei, pasal le an nauhai chu kut insuitirin ka'n ngir huoltir a, Mosie-in Israelhai kuoma an um dan dinga a dit thuro a'n cha, Deuteronomi 28-a chuong, Thu awina ra le thu awi nawna ra inzieknaa mi chu thu awina ra po ka tiem suok a, a dang thu awi nawna ra chu in tienga ngun taka hung tiem dingin thu ka'n cha a, an renga chungah a ruolin, Hmar trongin, keini an puhai ditsakna le malsawmna chu Pathien kuoma trongtraiin kan hlan a. Hieng thil hi mi dangin ieng angin am an thaw hlak ti ka hriet naw a, ka lungrila hrepuitu thlarauin a mi hril angin ka thaw ve mop el a nih.

Ni khat dang
November 11 tuk zingbu fak khopa New York pana suok el dinga inngai kha kan suok hmain puon thrui thiem, Japan rama puon thrui inchuk suok, Pu Lalhruaia nuhmei Laldani kuomah kan zu fe leh titi malamin kan ti nek daia sawt kan um a. In tieng kan hung inlawi leh photo session puithu taka nei dingin James-in a thlalak thuomhnaw po po phor suokin STUDIO a lo siem rup el a. Thla la dingin an hang inko khawm a, an hang lak seng sung khan hun a lo lak sawt ni ding a na, kan suok hmain Paula naunu pakhat, nau nei trep tah Thanmawii le a pasal Lalvunga hai nupain restaurant-ah sunbu mi fakpui trep an tum si leiin, inhmaw lo deuin kan la hang fak a. Kan fak khop tawm, sana ka zuk en leh zan tieng dar 4:30 a lo ni der tah a. An mi tlum tak Lalhmingthanghai innei champha voi sarina a ni bok leh, zanah la lawmpui dingin an in inhoi takah kan riek lut a, kan cham chu a ni nawk der el. 

Pherzawl le Zoram khawvel lungril le thlarau put a, ei ditsak le ngainathai le mi ngainatu le mi ditsaktu bula cheng hi a lo inhoi takzet a nih. 

(November 14, 2013; Camp: New York)

Post a Comment

Comments not related to the news or article may be deleted.

Powered by Blogger.