Halloween party ideas 2015

Pathien thilsiem dân khawm hi a lo mak ve ngei! Khawvêl a hin mihriem hieng zozai ei um a, mizie chi hrang hrang ei nei tâwl bawk a. A ṭhen mi tluongtlam deu, ṭhenkhat khir deu le lulul deu dam an um bawk a. Ei thil ditzâwng le nuom zawng hai khawm inanglo tak tak an ni tâwl. Thlîrna tukver sukzau a, ngaituona danglam tak neia hang thlîr chun, khawvel a mihriem chêng hai kuhi nuizatumna tak khawm ei um tâwl hle. Amiruokchu, hienga mizie chi hrang, lungril inanglo, ngaituona hran hran nei hai insuikhâwm hin hringna ei inpêktawn chu a lo ni zing el. Thuvarin, “Nga’n an tam an thipui a, mihriemin ei tam ei dampui” an lo ti hlak ang hrimin, a tama ei tam na na na chun kawng ieng ienga mani chu ei lo inthaṭhnempui tawl hlak tho a nih.
Ṭawngbau ei hmang dân hlak hi inang tâwl lo a na. Mipakhatin ṭawngbau pangai deua a hmang kha, mi ṭhenkhat ta ding chun ngâinaw tieng ngaia lungsenpui tham dam a lo tling thei hlak bawk. Mihriem hai hi ei umna le khawsakna izir hin ngaituona hai an dang thei a. Chuong ang bawkin, ṭawng hmang dan hai dam hi a lo dang ṭhet ṭhet thei bawk. Nikhat lâi khan function pakhat kan neina ah nunghak pakhat, “I mi hriet hlak am?”ka hang ti rawk chu ka ti hma ka ngai rawng rawng el a nih. A mi hriet naw ngang chu ni ding a na ama hlak chun “aw ei” a lo ti ve hmak el. Ka hmai a mâwk ve ang reng khawp el a. Kan pahni chau kha ni inlang chu, chu lâi kha lâia kha ti a la hang inhril kuol met khawm inhawi deu a ta. Ṭhalâi ruol tam tak pungkhâwm laia nunghâk hleitling ṭha ve tak, tu’m ka ni ti a mi hrietna dinga a kip a kawia la hang titipui kha chu ka thisen hratna’n a ngamnaw a ni tak el awm ie! Khanga ngaituona muoi chuoia ka um lai khan, vîng deu pumin “Ka hriet hlak che ni uo” ka hang ti ta khawng el a ni kha!! (hehe…)
A khawhnunga ka hang ngaituo sunzawm chun, kei khawm ka zâwna pêk dâna khan âwm naw kan ti letling lem a. Mâwl khawm a mi lo ti viu awm de aw ka ti hiel a. Ama kha chieng taka ka hriet ang tluk khan a mi lo hriet naw/hriet ta naw kha lo ni ding a na. A mi hriechieng lo hai kuoma “I mi hriet am?” va ti ringawt khawm kui chu, an lâk lien tum a mi lo ti el ding am aw…? annawleh, ama le kan inhrietna le ama khawma a mi hriet thei dân hril hmasa lova, khanga direct taka nunghak hmelṭha, tlangval tam takin an lo thlîr zui zing zâwna ka va pêk el kha mâwl le inthlaw a mi lo ti awm ngei deh! ti hai dam chu ka ngaituo sunzawm neu neu a. Mi inlar (Celebrity) dâm ni inla chu indawn hran ngai lovin an mi hriet vawng ding a na. Chuong nak sapah, a mi inlar lem kuoma a mi hriet le hriet naw van dawn el kha chu thil chieng zawngsak dinga ṭha lo tak niin ka hriet. Chuleiin, hieng ang ngirhmun hi ka tawng nâwk chun, “Ana kha lai (inhriet hun/in hmelhrietna) I hmel a lo tha in I nal ta khawp el!” annawleh, “Ana I tleirawl deu deu khawm a hawi el a!”, ldd. hai dama inbiekna ṭan ta dingin ngaituona ka siem pha hiel a. Mi tam tak mi hriet theina dinga hang intheparpui ding talent ṭha tak hlak ei nei ve si naw a!!!
Tuta lei kher khawm ni chuong lovin, ṭawngbau ei hmang dân hi fimkhur chu a ngai ve tho in ka hriet. Entirna dingin, mi’n “I mi hriet hlak am?” an mi ti chu anni’n hrietna an mi nei tina a ni el a. Chieng taka hrietna ei nei el naw a ni khawmin, “Ana ka hang hriet el theinaw bak che a, tu’m/a tu tak kha’m in ta lie?” ti ang dama hang dawn chun, a dawngtu tading khawma a hadam deuin anlang a, an inhriet dân khawm phur takin a hril zawm ngei beisei a um bawk. Amiruokchu, bawng tâwk taka, andawntu hnar kir rak khawpa dawnna pek ruok chun, hmabak peia dingin ngaituona ṭha lo tak tak khawm inneitir theina ani ve tlat.
Khawvêla mihriem hai hi a fel tak le fel naw tak, a var tak le mâwl tak, a hrât tak le chau tak khawm ni inla, kawng ienga’m ani bêk chu ei inpawimaw tawn seng a. Hmelhriet nei tam hai chu thil ngaituo inhawi an ti hlak bawk. Chuong ang bawkin, ruolṭha le hmelhriet tam tak siem tum ei tiu a, ei ruol hlui hai hrietna tienga tlasam deu hai khawm inhmelhriet thar pui peiin, a tama ei tam hi dam khawsuokpui tum ei tiu.
Guwahati: 12th December, 2013

Post a Comment

Comments not related to the news or article may be deleted.

Powered by Blogger.