Halloween party ideas 2015

By Pu Ramthienghlim Varte, Senior Anthropologist, Shillong

Thingtlang pa ei ni leiin khawpui hmun hrang hrang sawrkar sin annawleh thil dang dang thaw’n um inla khawm tlangram nun hih ei hlimpui, hril ringawt khawmin khuo a sawt vawng vawngel hlak. Thu le hla kungpuihai khawm an talent hnukpui le thu le hlaa thlarau baptisma chang a, zun thanga hla mawi tak tak le nunghak-tlangval inhmangaina ( Love Story) chanchin amani le ngainuomum le thu kulmut tak takhai an lak khawmna bupang chuh tlangram nun hi ani zie.

Chuleiin, keikhawm, kum 20 chuong sawrkar sin ka thaw hnung khawma  nun khawsawt lungleng changa ka chul ramfangna ani zie hlak a. Hi kawrvaihai le ei nunphung danglamna thu-inril le an hrietphaklova ei thuruk jnthup nun hlu chuh ani reng.

Chu thuruk chuh an hriet leiin Mizoram a Ofisar lien le Politicianhai khih a tamlem chuh Farm nei deu vawng anna, sungkuo’n weekend hmangin an farm house ah an fe hlak a, an lungril sawlna le khawpui boruok rikhai dengtlaknan an hmang hlak. chuongangin Meghalaya khawm anni tho. Sumdawngna tukver a tlir ding khawmin sawrkar sin maksana an hlawkpui khawp hieng Atkawra, Kuva, Zawngta, Mawt, Thingfanghma, Khanghmuk le dang dang kung a singtel ching a, thapui suoa farm nei tam tak an um. Chuleiin, ka ruol haiin hun-awl nei chang ofis le khawpui boruok riktup  sie hrea an farm House a an mithuoi chang an thilchinghai inzawtin ka lawmpuiin kan hnar thei em em el a,  iengtikam Farm ka neive phak ding aw ka ti vawng vawng hlak reng a nih. Farm siem a sumdawngna tiengpang ngaituoa a hlawk ding tiengpang chen chen chuh ka hisap phakve em em naw a. Sienkhawm, tlangram nun phamve theina ding ram nei a thingtlangpa taka nun hei intawi chuh farm ka nei nuomve nasan anive tawpel.

Pi le puhai chun ‘Bei am sei Rundung” anlo ti hlak a. Beiseina chuh mihriem nuna inphum, tawp chin neilo ani leiin  rundung nekin a sei lem dai a nih ka tih.. Chu beiseina a kalo zamve chuh Farm nei a tlangram nun chen a khawvel hlim taka hmang hih a nih.

Thil reng reng beisei taka eilo kurinkukpui, hni le buoipuihai hih siemtu Pathienin a theinghil ngai naw a, phunnawi lova nghak hi a that zie chuh an virkuol an virkuol a, keikhawm ka vel a hungtlung tah ning a tih. Kum 2012  May thla khan ringphaklo tieng dai a inthawk ka beisei sukpuitlingna ding lampui a hung inzam rui el a. Beiseina insang taka kalo tlirve hlak le ka duthusam chuh Farm nei ani tlat leiin a tha ding le dingnaw  kan ngaituo buoi hman der nawh a. Office thil a Saiha, Mizoram a ka um lai  nisienkhawm phone a inbe paw’n ruoltha le unauhai zarin ralkang a inthawk a muola  muolpui khat zet ramri siemfel sa vawng  ram tha em em el ka Farm ding an milo ngaituo pek a farm nei chuh ka ni el. Mak deu a nih. Mobile phone tangkai zie kata dinga hrietzing tlak chuh nive tang a tih.                                              
                       
KA FARM HOUSE CHUH
A hmun chuh  Shillong a inthawk 67 kms. a hla Umlapher, Karbi Anglong District, Assam a ni a, Hmar In 13 vel le  kohran pawlhni ICI le EFCI an um. Kum 2011 a article STEERING FAIL ti thupui a hmanga ka ziek khawm khah hi ram leilung hmu nuoma ka ramsuokna thu le hla ani nghe nghe.

Leh, a chunga ka hril ta angin,  Mizoram a kan zin Shillong ka tlung le inruolin Ofis chawl ka lak sawk sawk a, riek dingin kan put suok nghal a. Hi kum hin sungkuo thumin Aithing bil annei a, kei khawmin Mound 20* hmun ka vat a, vat faina hmun pova chun  Khanghmuk ka ching bit vawng bawk a. Ruoltha zarin Mano kak, Ruo, Far thing le Thingrai alo um tasahai leh  ka phun bawk a. Nikum 2012 khan Farm House, a dung 28 feet, a khang 15 feet a lienin ka bawl a, tukum Zawngta mu 2000 bawrvel le Bangalore zawngta mu iemani zat Hotupa C.Songate IRS-in ami pek ka tu bawk.

Enkawltu ding mifel tak Pu L.Thasanghai nupa an um a, a rama lo um sa reng Mawt, Kawlthei le keiin ka ching thar thingtlang tlai le hmeruo lak ding a um lai ana, a ra hmasa dam, sawma pakhat le dang dang thawlawm ding a um deu zing a, ka farm ka kan changhin in tieng kan lawisan el thei ngai nawh. Dawnkhaw, Fanghma alo inhlum remrum hei hmu dam chuh nun hih a mukin a hlim sawng sawng el a nih.

Thingtlang nun inhawi zie hih ka khawsak le seilienna hmun an fuknaw leiin naupangte ka ni lai ka nu, ka pa le ka puhai hrilna ka hriet bak chuh ka pu’n Saidan tlangram Lungpuizawl bula lo a nei khah mit ngei a ka hmuphakve a nih. Chuleiin, tuta ka farm a tlaihna hieng - Umzik, Maihna zik, Aithing par, Behna, Anphui, Dawl, Dawnkhaw, Fanghma le dang dang kan hei  lak khawm a, namthlak a kan bum a, vuoilo dingin mawt hna or hnathielin kan hei tuom a, Mawt za (mawt hna hlui a hnuoi tienga tlepthla tah) annawleh, hnangin ka hei khit pei a, inrik deu awl a in hei inlawi chuh intienga mi buktu an tha bawk, thafan a umin pheikhai an hawi rik tup tup ngei el.

 Ka farm a hin rannung sawisak ka khap, a hmun thuma thea hmunhni vel rampui ala ni leiin rannung an zalen a, an huong-in-tau a, a ki dang danga zingkar nisa hungsuok lawm a siemtu kuoma an SALAM bukna rawl mawi  insuo chuh weekend hmanga kan fe changa nu le naupang ri intung veng vung leh in ang tawkvel mei a tih. A mawiin a ngaithlak an hawi a, zingkar a hun taka mi keitho tu hriselna le dam sawng sawngna a nih. Sana a ngai nawh.

Tukum chuh Aithing Mound*22 vel ka tu a, hienglai a an thawdan chuh a puihlui an phawrdawka, an zawr hlak. Chuongangin kei khawm kan phawrdawk tir a Mound* ah Rs *Mound khat  40 kgs. a nih.

3,800/-( Kg khat pei ah Rs 95/- Quintal khatah Rs 9,500/- tina a nih) a ka hei zawr chuh Taithu, Churachandpur District, Manipur a kan umlai ka pu’n “Mound ah chengkhat khawma zawrna ding kan vai” ati khah ka hrietsuok rum rum el. Mound Rs 5,000/- ( Kg khata Rs 125/- Quintal ah Rs 12,500/-) dam a nih an la ti tah deu deu.

Khanghmuk chuh bul 300 chuong ani a, kumhni a upa nisi hlamthum dam ani tawl tah a a der sik/tlam ding a um thei nghal. Kumnawk chuh a der ka sik tanve tak tak thei tading a hawi. Thuhrilthiem haiin  a thu-inril deu an hawlfuk deu chang a “Haleluia ! Lalpa ropui raw seh” anti ang deu hin ka farm ka fang chang tlaihnahai duottakin ka zut a, siemtu kutsuok ropuizie inzawtin to tawk tawk a thuhriltu, thuhrilthiem  an ni hlak a ‘Lalpa ropui raw seh’ ka ti nuomve deu zingel hlak a, an hawi dan chuh a muk  a nih.
19th July, 2013

Sunzawm ding: KA FARM HOUSE-II (Lunngaina Sumpui )

Post a Comment

  1. Thlalak i nei khiet naw maw? Hmu nuom a va um de!

    ReplyDelete

Comments not related to the news or article may be deleted.

Powered by Blogger.