Halloween party ideas 2015

Ziektu: Pu L.Keivom, Inpui.com Columnist

L.Keivom
I tried the broken cisterns, Lord,
But ah, the waters failed!
E’en as I stooped to drink they’d fled,
And mocked me as I wailed.
-Frances Bevan (1827-1909)

May 18, 2014 Pathienni Hmar Christian Fellowship, Delhi chawibiek inkhawmah ka hla dit rop hlak laia pakhat, ‘Ka thlarauin Kristaa chauh, a hmu tah damna chu’ ti hi kan sak a. A chang thumna kan hang tlung chun, ni danga inhnik taka ka lo sak liem hlak kha sak ta loin, banga a thu projector-a an kap kai chu makti takin ka en a. Ka bula inthrung, Baibul (Delhi Version) buoipuinaa a kûl a tâia thrang mi lapuitu H.K.Kawllienthang kuomah, “Tuikhura inthokin tui ei chawi hlak a, a tuikhur chawi chu a va harsa awm de!” ka ta. Chu châng chu a chunga Saptronga a thu ei inchuon, Lusei tronga an inlet dan ang chara Hmar tronga an inlet ve a nih. Hieng ang hin:

Aw Lalpa, khawvela tuikhur,
Chawi dingin ka tlan a;
Sienkhom a tui ka dawn thei nawh,
Thina tûr a lo nih. (KH No.335; SSS 853)

Hi thu hi hang thlir vuot chun indik thluom angin ei ngai seng ka ring. Chu lei taka tu chena ei la som tung pei a ni naw thei nawh. Sienkhom, ngaituona ril hmanga ei bi ruok chun thil awm lo le nuizatthlak deu el a nih. Lusei-Mizo trong le Hmar tronga Kristien Hla Bu buotsaituhai hi hla tienga kohran tinin an suongtawlol thlang khawm an ni vei leh, ieng leia tu chen chena an mi la hmangpui pei am ning a ti aw? Tuikhura mi tui ei chawi a, tu khomin a tuikhur ei chawi ngai nawh. Baltrina tui um a ni ruok chun a baltrin pumin ei khai thei. Tuikhur ruok chu chawi ruol a ni nawh. Tuikula mi tui ei chawi thei a, a tuikul ruok chu chawi thei a ni nawh. Tank-a tui ei chawi thei a, a tank ruok chu ei chawi ngai nawh. Ei mamaw chu tui a nih.

‘Khawvela tuikhur’ ti khom hi ieng tina am ning a ta? ti hi ngaituo tham a ni hrim hrim. Thlarau dangcharna hnem thei lo, khawvel thila ei ngai chi hrang hrang ei inkawktir el thei. Chu chu a phuoktunu hril tum khom a ni el thei bok. Amiruokchu, ‘khawvela tuikhur’ ti trongkam hi a hmang naw a, ‘broken cistern’ (tuibel koi/pop) ti a hmang daih a nih. Eini laia Cabinet Minister ni hmasa tak A. Thanglura chun lekhabu ngainuomum tak el ‘Zoram Politiks Lumlet Dan (Belkeh phuarkhawm, tui pai thei lo) ti chu kum 1983 khan a tlangzar a, a lekhabu hming pahninaa a hmang ‘bel keh’ ti hi a nih ei hla thlir lai phuoktu khomin a hmang le einin ‘khawvel tuikhur’ ti-a ei lo inletpek chuh. ‘Belkeh phuarkhawm tui pai thei lo’ ti trongkam sertu ruok hi chu, mi threnkhat hril danin, lekha inchuk sang lo, thingtlang pa var Vawmphunga, ‘Zoram Tan’ (1969) ziektu a nih.

A phuok dan chu hla thua sie loin thutluong hmangin hang hril inla. Hieng ang hin: “ Lalpa, tuibel koiah tui zongin ka dap a, sienkhom ka hlawsam der a nih. Dawn tuma ka kûn leh an luong hmang pei a, ka trap khek chu an mi nuisaw zui” (I tried the broken cisterns, Lord, But ah! the waters failed! E’en as I stooped to drink they’d fled, And mocked me as I wailed) ti a nih. Pastor Thangngur hlaa,

Lawmna zongin an tlan vel sang tam tak,
Hmu loin thlan thimah an inkhĕlpui;
Ropuina hlim an hnot chu sûm hlim ang,
Hmu le changtu khomin an nei song nawh

a ti leh hi hla chang hi zai khata luong an nih. A thunon, “Krista chauh naw chu tu dang khom, mi suklawm an um nawh…” ti le “Nang ngei Isu ka nei che chun, ieng dang am ngai ka ta maw Lalpa…” ti le a chang danghai khom hi pawi kawm thin ang an nih.

Hla phuoktu chanchin

Hi hla phuoktu Frances Bevan hi Oxford (England) a New College warden le a hnunga Chichester (England) a bishop Philip Shuttleworth naunu, September 25, 1827-a Oxford-a pieng le February 13, 1909-a Cannes (France) a thi a nih. Kum 1856 khan Robert Cooper Lee Baven, bank tienga sumdawng leh an innei a, naupa pathum le naunu paruk an nei a. Nau pakuo zet nei le enkol ni bok sia thu le hla tieng sulhnung sui tham a maksan hi mi chungchuong a nizie tar langtu a nih.  Thu inlet tienga chemkal le thiema hril fâk a ni a, German tronga inthoka thu le hla 92 zet a’n lethai chu bu hrang hrangin a sut a, chuonghai chu thlarau le ngaituona ril chawm chi deuh vong a nih. Thu inlet thiem le thiem naw inkhina pakhat chu an thu inlet ei hang tiem a, trong danga inthoka inlet a nih ti ei hriet naw chun an hlawtling hle tina a ni a, ei hriet nghal ruok chun an hlawsam a nih.

Entirna dingin ka tonhriet pakhat hang hril lang. Trum khat chu Aizawla ka’n zinin Rick Warren ziek ‘Purpose Driven Life’ (1997) kha USA-a inthoka Mizo tronga an inlet, mawi taka sut, ka’n chawk a. A hmingah ‘Nunna Thiltumin a Khalh’ a ni mop el a. Phek khat khom ka tiem suok pei naw leiin ka’n khup a. Pa vengva deu pakhat ka hril leh, “Fawren-a inthoka a ngiel a ngana an hung inlet, Aizawla an sut a na, tiem tlak a ni naw hrim a nih” a ta. John Bunyan ziek ‘Pilgrim’s Progress’ ti, Lusei tronga 1908-a Chuautera le Challian inlet ‘Kristian Vanram Kawng Zawh’ an ti ruok hi chu mingo misawnarihai khoma a Saptronga mi nek hmana thra lem hiela an hril a ni bok a, ei hang tiemin inlet a nih ti rêng ei hriet fuk nawh. Ei thil inlet po po laia inlet a nih ti inhriet tak chu kha hmaa Baibul an lo inlet, tu chena mi tam takin ei la hmang zing hi a nih. Ei hla thlir lai phuoktu Frances Bevan kutsuok, thu le hla German tronga inthoka Saptronga a’n lethai ruok hi chu a ieng khom hang tiem inla, a trong a tluongin a mâm thra em leiin inlet a nih ti hrim ei hriet chang nawh. Thu hrang hrang a ziekhai hi hang tiem inla, a thu a luong thra bakah a thrâm khawm thiem a, ei inring hmain ei tiem zo pei el.

Ei hla thlir lai hi Frances Bevan-in a thu a phuok a, a thluk le miuzik hi James McGranahan (1840-1907) siem a ni a, a thupuiah ‘None but Christ’ (Krista Chauh Naw Chu) ti an hmang a. Kum 1883 khan Sacred Songs & Solos ah an hlu lut a, Lusei tronga inlettu chu Upa Ch. Pasena (1893-1961) a nih. C.Vanlalawma lekhabu siem ‘Tun kum za chhunga Mizo hnam puipate (1994 p.198) hril dan chun hi hla hi Indopui Pakhatnaa France-a Labour Corps-a a fe laia trench khur sunga a’n let a nih. Lusei tronga mi kha Hmar trongin a ngiel a nganin an inlet nawk a, chu taka a chang thumna tlar khatnaa a thu hlap suol chu a nih tuta ei hril mek hi.

Pasena hi lekhathiem hmasa laia pakhat a ni el bakah thu le hlaa nasa taka inhmang mi a ni a, hla inlar tak, “Aw Lalpa, i malsawmna hlu, kan iengkim chungah a’n lang’ ti khom hi a phuok a nih. A tlangpuiin ei hla thlir lai hi a’n let thra hle a, ei bi lai a chang thumna hi a tlol met chauh a nih. A chang hmasa tak tlar khat le hnina hi “Ka thlarauvin Kristaah chauh, Muanna a zawn thrin kha” ti a ni a, chu chu 1988 khan ‘Ka thlarauvin Kristaah chauh, Muanna kim a hmu a” tiin an hung thlak a, a dang chu a pangngaiin an sie. A chang thumna,

Aw Lalpa, khawvela tuikhur,
Chawi turin ka tlăn a

ti-a trongkam indik lo a hmang hi an hmu threlh a nih ti a chieng. A tontira ei hril tah ang khan, tuikhura mi tui ei chawi a, sienkhom a tuikhur chu ei chawi ngai nawh. Tui kang vong sien khom tuikhur chu tuikhur a ni zing. “Ka ringkol chu an hoi a, ka phur khom a zâng” (Mat 11:30) tia awm thluoma Lusei tronga an ziek anga ei Baibula an mi lo siepek, sienkhom ei hang ngaituo chienga indik thrak lo ang deuh hi a nih. ‘Ringkol’ le ‘phurrik’ amanih le ‘rimsikna’ chu thil inzom a ni laiin ringkol le ‘inhoi’ chu thil inkawkalh a nih. Ringkol hadam, inruol rem le phur hadam lem a um thei a, ringkol inhoi a um thei nawh. Sienkhom, kum za kristien intihai khom ei lungril le thlarau mit a la var fie naw chu ni ngei a ta, Isu Krista hril ni rêng rêng lo ei inhriltir zing el chuh a ni hi tie!

Saptronga inthoka hla an lo inlet tam tak hi ei hang bi chieng chun a thren chu a thluk chauh an haw, a thu inang lo hulhuol a ni a; a tam lem chu inlet le phuok an fawm, an khawvel le inhme ding le an mamaw phuhruk dinga an hriet ang zawnga zalen tak an lo thaw ni sien a hoi khop el. Hi thil hi ka tupa Dr. Lal Dena le ‘Nearer my God to Thee’ ti hla tu kum February thlaa kan chai laiin iemani zat ka hmu suok a, mit ei hang inlen deuh lem chun a lo tam khop el. A ieng po khom ni sien, ei hla chang thlir lai hi Saptronga mi leh inmil rak naw sien khom, eini rawi ngaizawng chi-a a hèm kuoi a ni leiin, hieng ang hin rem thra met inla, tuikhur chawiloin tui inchawitir inla, a huntawk el ka ring chu tie!

Aw Lalpa, khawvel tuikhurah,
Tui chawi din ka tlân a;
Sienkhom tui chu ka dawn thei nawh,
Thina tûr a lo nih!

Amiruokchu, la hang ting ei tih, Saptronga a phuok hi hang bi veng veng la, sir hrang hranga inthokin hang thlêk la, a phuoktu nun hlimthla le a tonhriet ni awma inlanghai chu hang thlirpui la, literechar tienga a mawina tuihang khom far thluk thlukin hang sawr la,’thina tûr a lo nih’ tia hang suktawp top el chu a pamhmai deuh naw maw?

I tried the broken cisterns, Lord,
But ah, the waters failed!
E’en as I stooped to drink they’d fled,
And mocked me as I wailed

Tuizem pop ka pana Lalpa,
Siktui reng a um nawh;
Dawn di’n ka kûn, an luong ral pei,
Ka trap, an mi diriem

a hang ti hin mitthlaah hringnun tuizem lien tak le mawi tak, sienkhom a mong pop ni si, chu a hung inlang a. A hmaa Pastor Thangngur hla ei hril tah, ropuina hlim mihriemin ei hnot mur mur chu sûm hlim anga intawl zing a nizie dam, chu chu hmu le chang taa inngaihai khomin a hlima tawite an cheng ti bak chu an chel song thei nawzie ei hmu a. Ropuina mong pop, hausakna mong mop, hlimhlopna mong pop, lungawina mong pop le beiseina mong pop hnotin, beiseina hruia intûlin, ni tin ni tin ei pheleng a. Ei tlung tah ei sawn leh a neka ropui lem hnot ding a lo um nawk pei a. Pawlsawm kan inchuk laia Leo Tolstoy tienami tawi ziek ‘How Much Land Does a Man Need’ tia Pahom ang khan duâm taluoa tlan hlum thrak hmabak vong ei nih.

Hausakna hnota tlantu chun a hnot hlat po leh a du-am deu deu a, a hausak zuolna ding a ni phot chun kut porche hmang le suol ieng khom thaw a hung poisa naw deu deu bok a, suol hrengah a hung intang a, a’n thawtirtu chun hlawtling inti deuin, “Chaw ta rawh” tiin diriem takin a mel a, bawhla a’n sam khum hlak a nih. Hi ngirhmun hi hla phuoktu hin iemani chen a pal phak a nih ti a hlaa inthokin chieng takin ei hmu thei. Vangneithlak takin Isu Krista a’n tuokpui a, suol bawia inthoka sansuoka umin, hringna thar le zalenna tharah a chuong lut a,

Krista chauh naw chu tu dang khom,
Mi suklawm an um nawh;
Hmangaina le nunkhuo hlimna,
Amaa chun ka hmuh

tiin, thina vadunga inthokin hringna vadung a hung paw a, chatuon hringna changin hlimna hlado a’n sam thei tah a nih. (Delhi, May 24, 2014 Saturday).

L. Keivom
By L.Keivom, Inpui.com Columnist

Those were the days my friend
We thought they'd never end
We'd sing and dance forever and a day
We'd live the life we choose
We'd fight and never lose
For we were young and sure to have our way.
Gene Raskin/Mary Hopkins

Delhi, August 16, 1999 Thawtranni. Zing dar 9-ah Darthanglien thi thu telefawnin Darsiemlienin a mi hung hril a. Trêka deng ang elin ka mit sul a. Kum sawmli lai liem tah hnungah ka ngaituona a’n zin kir a. Thil dang ngaituo lêk loin, nun hlui chul ram, ka hmaa sinema anga hung invir let nawk vut vuta chun umni ka kham a.

Sakang panna lampui, Churachandpur khawpui suo tieng, Tuithrapui rala khaw hmasa tak chu Muolvaiphei a nih. Chutaka inthoka km khat vela chun khuo lien tawk tak Saikot a um a. Muolvaiphei le Saikot ram po po hi kum 1931 a Darngawn pahnam inthuruolin Rs. 340-a Siemlien ram an inchawk a nih. Saikota hin Mana naupa Kawlvelthang, Dargawn-Banzang, August 7, 1992-a muol lo liem ta chu lalah a um a; Muolvaipheia hin Hrangthatsiek naupa Lallienkhum, Darngawn-Ruolngul chu a’n lal ve thung a. Lallienkhum hin pasal unau dang pahnih, Vanlalau le Vanlalring le farnu pathum a nei a, pasal po chu Muolvaipheiah an inbengbel a. An mi tlum tak V.L.Ringa chu Subedarah a penson a. Nuhmei hmel thra le fel tak el Pi Kawni a nei a. An nau mal Darthanglien chu hmêl thrat le hla sak thiema a nu khûm zo a nih.

Kum 1960 bawr vel lai chen khan Muolvaiphei khaw mihai chun tlang pang an la baw deu vong a, an lal in khom veng tlangah a la um a. Phaizawla tla thla mi tlawmte chu inkhât phierin lamlien hrŭlah an inzar phei a. Hi lekha ka ziek laia ka zawlpa, Muolvaiphei lal, Lalzarlien Darngawn in bula hin Darthanglienhai in a um a, a dot ela chun Zo hnathlakhai social history-a hming ser hiel khopa hmingthang Pi Hrangsuon in a um bok a. 1959-63 sung D.M.College, Imphala ka kai lai, chawl hmanga Tuithraphai tieng ka suok changin Muolvaipheiah ka leng rop a, Lalzarlien hai le Darthanglien hai in hi ka cheng rawnna tak a nih.

Ka la theinghil thei lo pakhat chu 1960 October khan vairik tlangah Darthanglien hai inah ka leng a. Ka bielnu, trâng dang mi lo pomsan tah, zana manga ka hmu thu chu ka ngaituo a, lung a sukleng hle a. Chuonga ka ngaituo neu neu lai chun hla a hung inlang a. Thingpui inluma buoi rak rak Darthanglien chu lekhapuon mi hung pe dingin ka hni a,
Voizan ka tonmang lungmawlah,
Dar ang ka tong enchimlo di;
Puon ang a thar, nunhlui thâm hnung,
An riengval nau ang ka lo trap.

Dawn ve la, nun hlui thamral hnung,
Hlimten dar ang leng lai ni kha;
Kei ka tawnah hlui zai rel lo,
Hmangai nunrawng i zun zam hi
ti hla hi vai hla thlukin a hung put thla zut zut el a. Ka ziek zo chun hla pakhat ka phuok a lo ni der el.

Thingpui dawn malamin Darthanglien leh kan hang sak a, kan ditin kan kŭrpui nghal hi a ni ringot a. Harsa taka phuok chop ni lo, sungrila inthoka hung inchik suok thu le hla hi a danglamin ami tawk dan a’n ril hrim a. Hi hla hin chappui kang vanglai angin a fang hrăt a, thla khat vel sung chauin Tuithraphai a chie zop hman a nih. Ka phuoka inthoka Darthanglienin muol a mi lo liemsan inkara hin kum 39 lai zet a tla taa chu khang lai thla kha thlalak namkai hlot ang charin ka lungril mita chu a la tharin a la fie a nih. Ka sak châng po le mi sak ka ngaithlak changin Darthanglienhai inah ngaituonain a mi thruoi kir nawk hlak.

Darthanglien lungril phêka khom hi hla hi a thi chuong bik naw ni ngei a ta, chu chu ei la hril pei ding a nih. Muol a liem hma kum 1998-a Zaituokung le Roneikim-in kaset ‘Ka ‘D’ ka ngai em che” ti hming chawia an siem khan ei hla thlir lai le chuong laia kan hla sak lar iemani zat chu a thrang ve a. Zaituokung ngeiin, “Kan kaset siem kha Darthanglienin a lo ngaithlak a, lawm le lungleng taluo khan autorikshaw a lâk a, Khawmawia kan inah a mi hung zong a, kan nu leh Muolvaiphei tieng a mi thruoi a, sa le dawn ding a’n chawk a, bu a mi fakpui ngat a nih” tiin a mi hril. Khang laia kan khawvel pal phak le kan boruok hip phakhai chauin a thilthaw umzie chu hre thei an tih. Chu chu ei la hril pei ding a nih.

Hieng hun lai hi hnam tranna thlarau mi lungrila a tral nasat vanglai a nih. Mizo Union pawlitiks tui lienin a kangsan, beidong taka trieuphoa a maksan Hmarhai chun intel khawm dan zongin, mani puol ngeia District suol suok dingin 1958 khan Hmar National Union (HNU) an indin a. Chuonga hma an hang nor tran chauh ti chun 1960 kum bulin Kuki le Hmar inkara buoina a suok hlauh el a. Hi buoina hin hmun hrang hranga cheng Hmarhai chu hnam tranna len sungah a hnuk khawm a. Vangduoina hi sungkuo indar tah khom kei khawm nawktu a ni rop angin, hi buoina hi ditum naw hle sien khom kong threnkhat ngaituo chun Hmarhai sukpumkhattu dinga malsawm ruopui vanawn a ni ve tlat a nih.

Harhna a hung tlung changa a hma lawktu, chokthotu, thruoitu, chawmtu le hnung daltu chu thu leh hla a ni rop a. Mizo Union pawlitiks tui lien sangin a kangsan, pawlitiks trieuphoa maksana um Hmarhai ngirhmun inzawtna dingin Mizo Union hla, kur nguoia an lo phuokhai chu hmang thei a ni ta si naw leiin, mani chengna tlang le muol, hmun le ram chawina le hnam bing tranna tieng thlek zawng hla T.Khuma Songate hai, Thatttinlien Sungate hai, HNU-in hnam hlaa a hung hmang ta pei ‘Aw kan Hmar ram, inthim tlang dum duoi’ ti phuoktu Lalkhum Keivom hai le mi dang dang an hung phuok a, hla tharin mihai an hung inawi tran a. English hla phuok thiem P. B. Shelley-in a hla ‘Ode to the West Wind’-a,

O Wind,
If Winter comes, can Spring be far behind?

Aw Thlipui, sikpui a tlung ta si hin chu,
Thrâl hun chu hla ta awm naw tak maw?
a lo ti lom lom ang el khan, thu le hlaa pawlitiks tro thli hung hrang le tro ruo hung sur chun mihai lungrilah ram le hnam invoina le tranna chi tua um chu a hung mut tho sung sung a. Chu pawlitiks le inzom chun hnam thila hartharna Kalcharal Rivaival (Cultural Revival) a hung tlung tah a nih. Hi hun laia thaw hlawk èm émtu mi tlawmte laia pakhat chu Darthanglien a nih.

Khang lai hun le tu lai hun chena khom, kohran hla bua chuong lo hla sak hrim hrim chu gospel lo thila ngaina a lien a. Mizorama inthoka hla lenglawng le lengzem hlain a rùn phâk chin chu zie-um deuh hai sien khom, 1957 lai, hla lenglawng le sai hla phuoka ram ka hung trang tak tak lai chun ngaituona tienga thrang hlui, insuk-sakhawmi, hnam thil le sakhuo inlaichinna umzie la hre thiem lo le ramri la khang thiem lo, tlang pungkhawmna, thilthawna le insukhlimna iengkimah, a hmun le hma le thilthaw le inmil le inmil naw khom dawn loa sakhaw hla chauh an nauhai insaktir phal nu le pa an la tam a, sut eng ding ramthim a la pik a, a buoithlak thei hle.

Chu ramthim sut hmasatu laia a sûl nèrtuhai laia pakhat, soisel, hal le kawk tuok rawn, mi hmai sa tawng rop hlak, sien khom dol zor nuom der lo ka ni leiin, hi ngirhmun hi keia neka hre chieng lem ei tam ka ring nawh. Chuong lai chun hla lenglawng le sai hla saktu chu hmur porche nei, ramthima cheng le hremhmun ko tlanga ngîrah an bel nghal a, hla porche sakna hmangruoa an ngai perkhuong chen khom biek ina lak lut chu suola ngai pawl an la tam. Sienkhom mihriem hi changal hme chauh hmein a hring thei nawh ti hre chiengtu kei le ka sangawi inzawnpuihai hlak chun chuong kaltuhai, piengtharna hmaithinghawng inbela, thrahnemngaina tarmit tehlem le inthim buna hringnun khawvel thlirtu nia kan ngaihai chu ramthim dawbolah kan sie ve thung a. Chu ramthima insie ve ve pahnihai chu insut êng tuma an inbuon map map laia a hmêl thratna le rawl mawia lungril inthimhai sunvartu poimaw chu Darthanglien a nih.

Chuong lai chun hla a tla thra bok a, a’n rak chang lem chun ni tin el hin hla thar pakhat vel a tla hielin ka hriet. Keiin hma ka tawn a, ka kaiza vengtu, ei kalcharal histawria an hming hmai ngai lo ding Darkamlo Faiheng hai, Lalruotthang hai, Lalthangfal hai, Lalnuntluong hai, Monggun hai, Darthangluoi hai le mi dang dang hai chun a kûl a taia mi thlopin, ruo thram lo hla tharin tlang kan tlir a, kan so bung bung el a nih. Hieng lai vela hla lenglawng le sai hla thar suok, abikin 1957-63 sunga mihai chu 1964 khan khawla sut suokin bu khat chauh ka siem a, hla 300 chuong hiel a tling hman a nih. Vangduoithlak takin chu hla bu chu Gauhati University-a M.A inchuka ka thang hmang sung (1964-66) an lo haw lawnna lamah an sukhmang a, hla la sak lar hman lo, hla thar 100 chuong vel zet an hmang pha tah a nih.

Hla hi ama ringot chun a hring thei naw a, a sak lartu an um naw chun a riral nawk vat el hlak. A huna chu a phuoktu tluk hielin a sak lartu hi an poimaw a nih. Puipungnaah hla sak thiemin mawi taka hla thar an hang vor suok chu ngaithlatu na le lungrilah a tro nghal a, zung a kei nghet a, an hriet naw kar khomin an hung sak suok hlut el hlak a nih. Chuong ang mi poimaw, hmel thratna le hla sak thiemna tienga khuonun vangneina dawbola a vur chu Darthanglien a ni a, thu le hla tienga Chongtinler a nih. Hieng ang mi trangkai, hla lenglawng le sai hla tienga rivaival a tlung laia hmangruo poimaw ni dinga khuonun a hung tir el dam kha ram le hnam ta dinga vangneina ropui a lo va hang ni ngei de aw! Hma thar hung suok, drama an inchang chănga Darthanglienin meng no le lungrunthlak taka a rawl rangkachaka a hang baptis tah kha chu hril tam ngai loin a puok dar nghal a, an inchang lai mit ngeia hmutuhai chun lungril mit le ngaituona naa inthokin an nuoi bo phal ta ngai nawh. Chuong laia ka la theinghil thei lo, mitthlaa la châm zing chu HSA inkhawmpuia Lalruotthang hla phuok “Voi tam biethu ei tiem” ti, drama an inchang mol kha a nih. Chu chu a nih a thupuia ei hmang hi: Nghil Phal Lo.

Kum 1960 lai khan Manipur-ah All India Radio Station a la um naw leiin, Gauhati Station-a inthokin tlangmi hnam hrang hrang hai hla rikawt dingin a’n khat tawkin Imphal-ah mi an hung tir hlak a. Chuong thila bengvar, taima, thrahnemngai le inpe zo, fam tah H.L.Bawia huoihotna hnuoiah hla kan khum hlak a. Pipi hla hlui tieng nekin a tu lai deuh tieng khum kan nuom si a, sienkhom khum ding kan invai a, Kristien hla bua mi a thren kan fawm khawm a, kan tlingtla thei hram a. Nunghak hla sak thiem kan neihai chu Muolvaiphei mi Darthanglien le Lalhruoi le Saikot mi Laltranpui an ni a, a ‘Star’ taka kan nei chu Darthanglien a nih. ‘Thlemnaah lut naw la’ ti hla a sak chu a hit fuk bok a, zan tieng ni nêma radio-a an hung insuo changin a ngaithla phak taphottin inthuok phal loin chu hla ruoi ropui chu chil ût ser serin an kil a. A rawl mawi inzam vel chu tu chen hin ka na rilah a la thang viet viet hlak. Thiem kan va hang ti thei de aw!

Kum 1957-58, Pawlsawm buon hne loa ka’n thal dĕr laiin Rengkai Road-ah ka um a. Chuong lai chun keini ruolcham, hla le miuzik tienga inhnik mi iemani zatin pawl kan siem a, English hla phuok thiem William Worsworth hla ‘Daffodils’-a a thu hmang ‘Jocund Company’ ti chu a hming dingin ka phuok a, lu taka kan nei chu Shillong-a College kai lai, Rengkai lal naupa, a hnunga lala hung inthrung, J.C.Chongkhawlien a nih. Kum 1957 December 31 zana kum hlui inthlana dinga perkhuong le ka hla phuok Rengkai ICI Church-a kan sak trum kha Tuithraphai ruoma biek ina perkhuong an lak lut hmasakna tak nia hriet a nih. 1958-a Rengkaia HSA General Assembly-ah khom ka hla phuok tharhai le kan tupa C.S.Row Riengsete hla thluk min chuktir nursery rhyme pakhat ‘Goodnight ladies…. Merrily we roll along, roll along, roll along,” ti thluka ka siem, hla pakhat lem chu inkhawmpuia palai hung hming inlar deu deuhai lak khawm dam chu kan sak a, ni danga la thaw ngai lo thil a ni bok a, kan hlimpui hle. Kan indar hnung khomin Jocund Company chu sunzom peiin, fangson poimaw nikhuoah ruo thram lo deuh vong kan sak hlak a. Chuong lai huna kan ‘star’ tak chu Darthanglien a nih.

A hnungin, kum 1963 August 15-a Imphala All India Radio Station an hung hong khan radio-a hla sak ding hla sak thiem le miuzik thiem kan hawr khawm a, a hming le sengso iengkim tumtu L.Rokung hming chawiin, ‘L.Rokung & Party’ kan inti a, hla thar tam tak kan khum a. A hnung thrang khat le a chenve, 1979-a Lenruol Hla Bu a hung suok thei dam hi kha a hung ra suok pei, sor tlak hmu thei threnkhat laia mi chu a nih.

Hienga Cultural Revival a hung tlung theina san dang poimaw chu kum 1963-a inthok khan ka rawiupa L.Rokung leh Hmar Cultural Society (HCS) thruoitu kan hung ni a, kei Chairman-ah, ama Secretary-ah a thrang a, a hnunga MLA le hun sawt tak Minister ngirhmun cheltu Ngurdinglien Sanate kha Vice-Chairman a ni bok a. Ngirhmun poimaw dang le Executive Member-ah ram le hnam thruoitu poimaw le inpe zo kan sie tawl bakah khang laia political party um sun Hmar National Union (HNU) le inchuklaihai insuikhawmna HSA kha iengkima mi thloptu le trawiawmtu an ni leiin, kohranin a chim nel vong tum hnam ro, abikin pi le pu thu le hla le an thil hlut tam tak chu hnuk dok nawka cheibawlin ei hung tuoi thar nawk thei bakah, kohran nawlpuiin a chim phak nawna khawpuiah, Imphala inthoka intranin Sikpui Kut hung hmang tranin a um a. Hi kakhawk fe pei chun kum 1969 khan Delhi tlanga Republic Day hmangnaah Manipur aiaw-in Hmar Cultural Society chun cultural troupe a tir a, Manipura inthoka intir hmasakna tak le nih. Hmar Chanchin, pi le pu thu le hla ei hriet thei chinhai chu kei suok a, zieka lekhabua ei hlu lut hun chu hi hun lai hi a nih.

Khang lai huna Hmar tronga thu le hla hung inthrang dan le kohranin up hlum tuma nasa taka thrang a lak laia Hmar secular literature, abikin hla tieng huma a um dan le a hung inthrang lien pei dan fumfe taka sui a ni pha chun, hieng lai bung le chang hi a hung poimaw deu deu ding a na, chu ruol chun Darthanglien ngirhmun chel hi a poimawzie la hung hre deu deu bok ei tih.

A hnunga mani tlatna muol senga sina kan hung buoi tawl hnung chun ditsakhai le mi ditsaktuhai khom nuom anga inpawl le inhriettuo zing a hung harsa tah a. Sorkar sin zoma ka thang hmang hnung le ram puo tieng kum sawmhni chuong zet kan khawsak hnung lem chun Darthanglien chanchin hi ka hriet zui ta naw hrim hrim a. Hringnun suorsehmun, pielthleng le tolparita hin vangduoi le thaw suol palh leia mani nuom thu khom ni loa intol thlûk intol thlûk a, hringnun livira a cham lo a cham loa pil thei a ni a. Chuong ang thil chu Darthanglienin a lo tuok palh a ni khomin, Isu ditsakna hlawtu le dongtu Mari Magdalin hniekhnung zuitu angah kei chun ka ngai tlat a nih. A vanglai huna ram le hnam ta dinga hla tienga a’n pek zona le a rongbawlna hlu tak kha hnam ta dinga malsawmna hnar a ni a, ka ta ding chun theinghil phal ruol ding a ni nawh. Khang hun laia ei Lelte, ei Lata Mangeshkar a ni si a.

Note: This article was finally completed in early 2003 while I was on a visit to Churachandpur and was carried in Muolvaiphei Golden Jubilee Souvenir, 2003. For some time, I was not able to trace the final text as the laptop (SHARP) I used to store the article had crashed. Yesterday, May 19, 2014 I visited C.Thant Khobung at his Dwarka home gave me a copy of Muolvaiphei Diamond Jubilee, 2003 Souvenir which carried the piece. Re-edited and digitized May 21, 2014 Tuesday. LK

Pu Joseph Lalrothang
By: Rev. Hranghmingthang Varte

Mihaiin mi ropui le suongum hai fam an chang hnung an ditsakna le an ropuina tawngbâu tuihnai tak tak leh an hringnun Chanchinbuhai chen fethlengin hahipin an inzawt mawl mawl hlak a. A nih, a tha a, lâwm chu a um hle. Kei ruok chun a damlai ngeiin ama Pu, Joseph Lalrothang, Zarkhawpui Tlangvâl (Senvawn Tlangvâl), mi ropui le suongum bek bek, ei Ram le Hnam tading le Zohnathlakhai tadinga THIEMNA MELLUNG phuntu le a Kawr-le-Vai le Chalrânghai tading chen khawma THIEMNA RÛNPUI bâwltu hi ka ditsakna ang huin inzâwt thiem naw lang khawm hei thai tiel ve hrim hrim ka tih.

PIENG LE MURNA: Ama hi Upa Lunpu le Pi Kâpkim hai nupa inkâra sul keu hmasatak, naupasal, India ramin zalênna a suolthlûk kum July 27 ni taka Senvawn khuo’n Vân kaina meiser a hung sit varna hmasatak le khawvêl A, AW, B,… a hung hmêlhriet vêna hmun ngêia pieng a nih. Tuhin Senvawn Nunghak Hmêltha le Nungchang tha, Pi Thangngei leh Naupasal 3, Naunuhmei 2, Mo 2 le Tumawng ben lai mêk 8 leh mani a in-le-lo det neiin tuhin Rengkhawpui (Rengkai) ah building sawng hni chungah Pathien malsawmna tamtak dawngin an khawsa mek a nih.

NAUPANGLAI: Thingtlânga Thanghluihai khawvêl lipuia inhlieu ve nanana chu a naupang laia an sukhlimna le an hnelna thuom inbelna chu a changkâng ve rak naw khawp el. Kekawr inek mawng phâwk thuina kuokâra hrikpui intui lai inbirûk le a hnap khang zêlna zakuo bân dum tler pumin sephung kuo a ruolhai leh an cho ve hlak a. Siel Siel a dam an thaw pha, a Sechal part playtu niin SECHAL HERO a ni hlak. Pheikhawk bovin chimbuk pik tha tha nêr vengna a Star Mark hmuin a Champion hlak. Insil dinga Phaiphengzawl Tuikhur (Rangte Tuikhur) a a fe pha Changaltui Umhaihawin a dawm thîn nuk nuk hlak. Amiruokchu, Vaihaiin – Hâwnhâr Bâlak (Naupang chu a chinlai a inthawkin Fâk tling ding chu hriet thei a nih) an lo ti hlak angin a thawna taphawt ah a ruolhai lai a filawr zat zat hlak a. A duongkai a tha a, mit a tlung a, a hmêl a tha a, ruolhai ngaisâng le inhnar a kai a nih.

THALAI HUN: Pu   Joseph Lalrothang hi a kip-a-kawiin a chanchin hre vawng naw lang khawm a ziektu hi ama nêkin kum 10 zet a upa lem ka lo ni leiin a tlangpui chu ka hriet ve nêl

nuol a. Kohran Upa In a seilien le a Pate Pu Tana (Pu Kaitinthang Puruolte, Senvawn A Pa) Val- Upa kumhlun, Senvawn mi hrât a ni leiin a thalai hun a inthawkin Israelhai Lal, Saula ang bawkin ruol lai a filawr bik rieuva, Leadership neiin nunghak mitmei dawng thei rieuvin Pu Upa Rema (Mahajon) naunuhmei neisun Pi Thangngei-in a lung dum tak a thin fûk nal. Zârkhawpui Sietni-Thatni haia a âwngkâr hruktu a ni zat zat pei hlak.

INCHÛKNA: Vawisun a Thiemna Rûnpui bâwltu, Pu Joseph Lalrothang a Lekha inchûk tanna hretuhai chun tuta a nina hi awiuma khawm an ngai naw hiel ka ring. Senvawn a NEIG Mission School a an Headmaster (Famtah) Pu Rina Class VI chauh hnuoia Hmar Medium-in, “BI, A… BA, CHAW, A… CHA, A Pa a puo, Vawi za a vawi, Mai a ra liei, liei…” ti a an School sûnga pilvut khu chum chum hnuoia lo tan ve tho a nih! Pawl hni a inthawk ruok chu a Pa, Kohran Upa Lunpu hi Pa bengvâr, Thiemna ngaina mi tak el a ni leiin Donbosco School, Chingmeirong, Imphal ah a’nkai tir ve a. Ka hriet suol pal naw chun Lekha thiem thei tak chu a ni bik naw niin ka hriet. Hre ve phuor a ka’nhrietna chu kei hi insung harsatna leia nuom ang khawma Lekha inchûk thei lo, tlangvâl hnung a inchûk thar nâwk ka ni leiin HSLC a ruolin kan IN-EKZAM a, a Mark Sheet ka en ve a. Marginal charin Matric a zo ve tâwk a nih. College ruok chu Scottish Church, Calcutta (Kolkata ti a ko tah) ah PUC zovin BA chu Churachandpur Govt. College ah le BT chu Imphal ah a zo. Hieng lâwm a hlawtlingna a chang hi Lekha tieng el ni lovin a piengpui talent mama hi hlângkaitu niin ka hriet. Lekha tieng khawma hieng lâwm a English thiem hi Calcutta Scottish College a Mingohai Ro phûmrûk a zu cho dawk a ni ka ring.

HLAWTLINGNA LE ROPUINA:
(1) Thiemna Banpui phuntu mawl kha: A bul tanna nisien ti hi ka ngaituona a langsâr tak a nih. Kei chu Rêl inzin (Engine) leh ka tekhi tak a nih. Tu lungril khawm sukna naw sien mi tamtak Inchûktirtu an ni lai zingin ama Pu Joseph Lalrothang mama hi Thiemna Rûnpui Bâwltu
ka ti naw thei nawh. A Graduate a inthawkin High School a Zirtirtu sin thahnemngai taka thaw tan nghalin Mizoram a Suongpuilawn H/S a tanin, Manipur Government hnuoia Thanlon Govt. Higher Secondary School a hung thawk nawk peiin, Rengkai Govt. H/S lem chu Refugee-hai riebuk a inchang tah, theipatawp a hung tuoinâmin Student sângtêl ama felna inzin (Engine) in a kei phit duol duol a, tuhin ama hmalakna zar peiin Private School a kai thei naw hai pasie te te nauhai a zatel an Graduate tah. Pu Nelson Mandela-in, “Tlâng tamtak i lâwnkai hnung khawmin tlâng dang tamtak lâwnkai ding i la nei, ti hre zing rawh…”, a ti hi hre karin ZEO tlâng sip a Thiemna Puonzar (Flag) târin Award tlâmpui sip dawngin, a ke chinginlirin vân a sai mêk. Hril hmai derlo chi pakhat chu ZEO term tawp zaka hmun khat a hmangzo zak thei a nina hi a la ni
nawk! Chuchu Churachandpur District ah a hmang zo thei ngat a nih. Mi thenkhat chu sawnkuol/transfer kuol an ni hlak. Hi thil hin hril sei rak khawm ngai der lovin sawrkar, hotu,
mihai ditsak tlak le inza kai, mani sin a miringum, mihai mittlung a sinthaw hlaktu a ni zie a tarlang chieng hne hle ringawt el.

Rêl  (Train)  engine muol  khat  dâp  a sei,  Cabin  inzawm  khâwm,  Rûlpui  thangkin  ang  el  a bawkvâk zur zur, khuolzin mihai na hriet a- “Ka chak tak tak, ka chak tak tak … Muolza ka vât,
… Muolza ka vât…” ti ni awm fahran a muol za têl tlân liem zung zung a, varâl muol thar a inzin mihai thakkai zung zung hlaktu ang elin a muol muolin Mâwlna ram hlip thlain Thiemna varâl a mi hlângkai zung zungtu Pu Joseph Lalrothang hi ka ngaisâng naw thei nawh.

(2) Ei Ram le Hnam le mi tamtak tadinga Sandamtu: Ei Zohnathlâk-pui/Sinlung suokhai inkâra Unau hmêlhai an nei laia Hnam aia lu vawm chân ngam a, bân phar a, khêk suoktu kha ama Pu Joseph Lalrothang hi a nih, ti tu’nam inhmai thei tâng a ta?!... Ama zârin himna beisei a ei hnâr bawng chanpuihaiin, Hmarhaiin Martyr’s Day ni a puon an zar ang an taksa le hringna a him theina dingin mamawin, an kawtkai  a zar ve ding zawngin an buoi ruoi el a ni kha! Mitamtak le Hnam tading a damna intluntu chu a lo va ni ngei. Tleirâwl hawklak thenkhat sinthaw pei lova an hnik hnik du si hai nêkin, “Hnam Safe Guard” a ni lem hman hman naw maw? Ama hi inphat ruollovin ei Ram le Hnam le mi tamtak tadinga Sandamtu niin ka hriet. Sawrkar tienga a sinthawna chu sawrkar dan angin a kum in lo dai tah-in, lo chawl ta sien khawm ram le hnam tadinga a lo thangkaina hai popo hi enin State Sawrkar le India Sawrkar laipui a ei aiaw a, a tulna tieng tieng haia hrilpuitu le tlankuol veltu dingin dit a la um tak zet. Ama anga praktikal taka mipui hmangaitu hi ei vang hle ringawt el si a!... Hiengang khawpa mani sin a mi inpezo hih alangachangin Kohran a chun Pastor, Upa, Evangelist/Evangelist-At- Large le Missionary ninaw de sienlakhawm, taksa ram, ei ram le hnam, mipui tading chun hiengang nina hai hi a kawpin, a ni kim fai vawngin ka hriet. Kohran le NGO hran hran, a thangna phawt a hai mi rawnkai le banpui tak a ni rawp hlak.

(3) Philanthropic Organisation hran hran a Thuoitu le Midanglam a nina: Hmar hnam popo innghatna banpui laia pakhat- HYA President Term Thum zet phurin hnam buoina kârah, Helhai lakah, Indohai kârah, Security/Law Enforcement-hai kârah, Tlawmngaina le Tuorselna nghet taka chel a boruok zâp dei hlaktu kha ama ngei hi a lo nih. Thiemna Situi her suoktu laia pawimaw tak pakhat HSA Hmarram ah President sin a chel a, ATSUM  Gen.  Secretary,  Hmar  Inpui  Executive  Member,  Manmasi  Welfare  Society  ah Chairman, Unau inkâr buoina ah Peace Committee le Observer-in Manipur Sawrkarin a ruot, Bible  Society  of  India  ah  Life  Member,  President,  Manipur  Hill  District  High  School Headmaster Association, BSEM ah Member term hni, Vice-Chairman, Hmar Literature Society, Manipur le nina pawimaw tak tak inzawt seng lo hiel a mi challang le mi ringzo a kai. Ama hi Leadership nei tak el le Well Organiser a nina tak hi a Quality mi neka a chunghnungna le a danglamna tak chu a nih.

(4) Chawimawina a dawng: Chawimawina Nopui ropui tak tak a dawnghai hi pielrâla faisaring di’n ka ditsak tak zet. Hriet kim naw ka’nlau sasa’n:-
(a) Certificate  of  Appreciation  –  Awarded  by  District  Administration,  Churachandpur, Manipur. (1998-1999)
(b) State’s Best Teacher Award – Awarded by Govt. of Manipur. (1999)
(c) Certificate of Honours – Awarded by Siamsin Pawlpi (SSPP), GHQ. (2000) (d) Best Teacher Award – Awarded by H.S.A., GHQ. (2001)
(e) Outstanding Leadership Award – Awarded by Bibles for the World and PMS with Cash ` 10,000/-.
(f)  National Award – Awarded by Govt. of India. (2004)

Hienghai bakah khawm hin  Chawimawina thilpek/Memento le dang dang tamtak a dawng. Hieng zozai kutpâr thliek senglo hiel Chawimawina dawngtu Pu Joseph Lalrothang hi ngalfipin dam sienla, a thilthaw ropui tak takhai hi thang-le-tharin hung zui pei dingin ka ditsakna insâng tak ka’nhlân.

Tuhin lu a kêlsam to step hraw tanin a lung dumtu Pi Thangngei leh Building sâwng hni chungah an tuhai kuo pumin an hme duzâwng sermon chauh naw chu thaw ding nei ta lovin Rengkhawpui ah an damlai ni hmangin, châwlhadamin, an khawsa mek a nih.

Pu Joseph Lalrothang Puruolte Dam Sawt Raw Seh! Chung Khuonu’n Thuoiin, Malsawm Pei Raw Seh!

TIEMTU HMAR MIPUIHAI KUOMA THURÂWN:
Chier hla ni awm hielin, eini hnam hi chu mi’n thil ropui tak thaw hai sien, Chawimawi le Inpâka Lawmthu hril le Lawmpui ta nêkin Demsiet le Thîk ei ching a. Bethesda dil a sietu ding ei um ta ngai naw a, a pawi ngawt el. Kei a kawngkâr ah ka Thurawn ve hai chu:-
(a) Miin  inchik  tlak  thil  tha  a  thaw  chun  Sawrkar-pa  (Central/State  Sawrkar)  kuomah Intlun/Inhriettir amani, Recommend hlak nisien.
(b) Sawrkar ngai pawimaw phak a ni naw khawm a, a Hnam pumin thaw nachang hre inla.
Entirna’n:-
1.   Thiem inzirtirna/Lekha inchûktirna tieng – Pu Thanglawr Award
2.   Hlaphuok thiem – Rev. Thangngur Award
3.   Huoisenna tieng – Pu Damkung Award
4.   Hlasak thiem – Pi Lalruotmawi/Buizo Award
5.   Damdawi thiemna tieng – Dr. Thanglung Award

Chuongang pei chun, Ziek tienga thawtha hai, Bu-le-bâl hau hai, Tlawmngai filawr hai, Mi hrâthai, Inkhêl thiemhai le a dang dang haia filawr bik zuol hai khawm Award um ve pei bawk sien.


Mimal tlawmngaihai chun an thaw ngei luo a, amiruokchu a hnam pum hin ngai pawimaw nisien, hieng thil a hai hin thanghar inla chu mi thilpek (talent) tha tak tak neihai infuituona le tumruna, fak hmuna le intodelna ding dam siem pekin, mani chem fena zawn/zawng seng ah nasatakin a thangpui ngei ring a um.

Churachandpur a'nthawka suok hlak MAMMASI DIGEST, Latest Issue(April-2014) chu a dit taphawt inchawk le order thei dingin a lo suok nawk tah. 

Ei mithiem le suongvawr hieng Dr Rosiem Pudaite, Lalthankunga Hmar, L Ruoivel Pangamte, Sk Khobung, Ramthienghlim Varte, PC Lawmkunga (Manipur Chief Secretary), Prof Lal Dena, Immanuel Zarzosang Varte haiin Article ṭha tak tak, tulai le inhme em em el thila an ngaidan le hmudan baka an hrietnahai an ziek tawl a. Chu khelah tulai khawvel buoina le inzawma thuthar le suichiengnahai Samuel L Songate ziek, Nk/Tv laka Hmangaina thu Samuel Zothanglien in a ziekhai a thangsa bawk a nih.

EI hnam ṭawnga chanchinbuhaia dam thanaw tia sawisel el lova a tiemtu ni el khelah an chawtu nia ngaipawimaw hi ei thaw awm hrim a ni lem.

Manmasi Digest hin Churachandpur phairuom baka ram dang danga a thawn dar zing a, a la tlungnawna le hmunaw hai khawm khawlai hmuna khawm ni sien thawn thei zing a nih.

A dit le mamawhai chun
(For Churachandpur)
1. R&L Enterprises, Near HSA Campus, Rengkai, churachandpur
2. A tha bek bek Store, Rengkai, Vengpui
3. Pine HIll Stationary, Opp Ccpur Police Station le Agent hai kuoma hmu thei a nih.


## Ram danga umhai ta dingin 8575380847 ah thuchieng lem ngaiven thei ning a tih.

Tuiṭhaphai, 21.05.2014: Loin hnu deu ta sienkhawm tarik16.05.14(Friday) 1:30PM khan Saikawt-ah The 11th Hmar Martyrs Trophy Final le Hmar Martyr’s Day puithu le ursun taka hmang anih. Hi huna khuollien hai chu Chief Guest: langkhanpao, Chariman ADC (CCpur), Guest of Honor: Demmang Haokip, Vice Chairman, ADC (CCPur) le Functional President: Lalhossan EM, ADC, (CCpur) hai an nih.  

Hun hawng ṭawngtai Rev.Lalngailien Puruolte in a nei zoin Welcome Address Silvia Laldinmawi in a neia chu zoa Keynote Address Pu Lalhriet Famhoite, President, Hnam Santu Pawl in a nei zawm nawk nghal a. Nk.Elizabeth Sungte le Clearence Mawite haia inthawk thiem takin ‘Ei hnam mawina chu’ti hla ngaithlak ani a, chun Nk Jenneth L.Varte (Nikhat laia Lelte chibil award dawngtu) khawmin Martyr’s Day hla thiem takin a sak bawk.

HPC Returnee haia inthawk Martyr’s Salute khun takin an neia, ei khuollien inzaumtak tak haia inthawk khawma thu ṭha tak tak ngaithlak anih. Chu zoa Martyr’s Trophy Football match chu ṭan nghal ani a, 1st half in Sinlung Badminton Association haiin an i huoihawt Badminton prizes hai peksuokna nei anih. Football Match hi FAST(Rengkai) le B.Aijalon (Kuki) hai chu inkhelin B.Aijalon - 0 FAST in 11th Martyr’s Trophy hnena nopui chu an dawm ta anih.

A hnuoia hai hi  Martyr's Day thlalak ṭthenkhat chu an nih. [Photographed by: Alan Famhoite]


Lalhriet Famhoite, President, Hnam Santu Pawl.

Add caption
HPC Returnee











Dr Rochunga Pudaite.


Dr Rochunga Pudaite.




Tuiṭhaphai: 19.05.14 (Mon) Karliemta 15th May, 2014 (Thursday) a’nthawk 18th May, 2014 (Friday) sung khan North East India Christian Council (NEICC) chun inkhawmpui lien (First Biennial Session – 76th Session) chu Chawnga Memorial Hall, Sielmat ah  nei ani a, “Enlarge your tent (Isaiah 54:2) ”  ti thupuia neiin alo tumṭiek nawk tah.

Hi huna hin NEICC member Northeast state sunga Kohran chi hran hran (An choir hai leh)c hu hung ṭhangin, Tuiṭhaphai sunga Kohran mipui fiel an ni angin mipui ṭhahnem tawktak fekhawm a nih. 

Choirs hieng ICI Central Choir, EFCI Central Choir, MBC, BCM, NBCC, Territorial Songster, Mizoram Synod, KJPS Sepngi, le Tuṭthaphai Presbytery (Manipur Synod) haiin inpakna hla mawitak tak anin hlan tawl bawk. 18th May zan hin term thara ṭhuoitu ding thlanga um hai installation nei ani a, hiengang inkhawmpui lien hi a nawk Mizorama um ve tang ati ti thu ei dawng bawk.


A hnuoia hin thlalak thenkhat suklang ania lo hei bi ve rawh:  [Photographed by: Alan Famhoite]  























Ziektu: Pu L.Keivom, inpui.com columnist

Nuhmei thra le inzaum hi,

Thil hmu harsa tak a na,

Lunghlu sen nêk daiin a hlu lem.

(Thuvarhai 31:10)

May 11, 2014 Pathienni kha Mother’s Day a ni a, Hmar Christian Fellowship, Delhi thralaihaiin chawibiek inkhawma hung nupui po chawimawina thusam le thilpek an inhlăn a. Trantu Juliet B. Khawbungin Thuvarhai 31:10-12 & 30 a tiem a, thuhriltu Rev. L. Roding Pulamte-in inkhawma hung po po, nupui ti lo po kha thu a mi’n samtir a, aman “Nupuihai” tiin a hang insam a, mipuiin “Kan hmangai cheu” tiin kan insam a. Isun Peter kuoma zawna voi thum zet an don non ang khan, voi thum zet kan insam non a nih. A mal sengin pasalhai khan mi nuhmei kuomah “Ka hmangai che” va ti ringot inla chu, ieng tin am ngai a ti aw? Ei beisei a sawn el thei. Peter sitailin, “Ka ngaina che” ti inla chu a fûk lem met el di’m? Chu neka fûk lem dinga ka ngai chu, “Ka ngaihlu che” ti a nih. Thumal inang char khom hin a hmun le hma le ei hmang dan zirin umzie le kawk tum tum a nei thei dan inentirna dinga ei zuk pot fân met a nih.

Mother’s Day

Ei thil chai ding hi Women’s Day ni loin Mother’s Day a nih. International Women’s Day chu 1909 khan USA-ah an hmang tran a, kum 1975 khan UNO-in a hmang tran a, ram iemani zatin March 8 hi kum tin chawlin an inser a. Mother’s Day ruok chu Grafton (West Virginia, US) mi Anna Jarvis-in a nu Reeves Jarvis hriet zingna dinga kum 1905-a May thla Pathienni voi hnina a lo inser tran chu a ram puma nuhai chawimawina nia hmang dingin a nor hlawtling a, kum 1908 khan an hmang tran a, kum 1914 khan President Woodrow Wilson chun hi ni hin nu inzaumzie puongna dingin American puonzar (flag) zar dingin thupek a’n suo a. Sawt naw te hnungah khawvel hmun hrang hrangah an hung hmang ve pei a, an hmang ni ruok chu a’n ang vong nawh. Arab ramhai chun March 21-ah an hmang. USA-a hi ni hi an hmang hmasakna tak, Grayton-a Andrews Methodist Episcopal Church chu May 15, 1962 khan International Mother’s Day Shrine-ah an puong a, a ram sorkarin National Historic Landmark-ah October 5, 1992 khan a puong bok a nih.

Thil dangdai tak pakhat chu, hi ni hi mani nuhai chit chawimawina ni dinga duong a ni leiin Saptronga an ziek dan khom hi plural possessive form-a Mothers’ Day (Nuhai Ni) tia grammar dan zuia ziek loin, singular possessive form-in Mother’s Day (Nu Ni) tiin an ziek ngat a, chuong ang chun sorkar thusuoka khom an hmang zui tah pei a nih. Sienkhom, kum sawt naw teah Mother’s Day hi kristmas le ni poimaw dang ang boka sumdawngna hmangruo pakhatah an hung hmang suol leiin a trantu Anna Jarvis chun suktawp tumin nasa takin a bei a, khawtlanga buoina siemtu-a ngaiin man hiel a tawk pha a. Pathienin mihriem a lo siem leia poi a ti thu a hril ang el khan (Gen 6:5-7), Anna Jarvis khomin hi ni hi inser dinga a lo nor suok chu poi a tizie a hril a, sienkhom a khap thei ta bok si nawh. Hieng anga ni inser hi thaw ta laklaw chun sukbo el thei a ni nawh. Isu piengna ni khom hi hriet chieng a ni nawa chu phuok fawma ni an mi lo inserpui kha taktaka belin ei inser tlut tlut a, suktawp tum rok inla, kristien khawvelin an sakhuo sukbuongbar tumnaa ngaiin tin le ha leh thrang an ta, dodal an ta, chu leia hringna chân an lo um chun martar changah ngai an tih. Isu ring ve lo, sumdawnghai hlei hlei hi suktawp lo dinga nortu an ni ring a um.

Woman, Wife, Mother

Minu, nuhmei, nu amanih, nuhmei, nuthai, nu tiin amanih hril inla chu a thrè thrawp inhoi deu ding a ni laiin, Hmar trong pangngai chun nuhmei (woman), nuhmei (wife) le nu (mother) ei ti a, Mizo-Lusei chun hmeichhia, nupui, nu an ti thung. Nuhmei chu pasal a neiin ‘mo’ a hung ni a, nau a nei pha ‘nu’ a hung ni a, nupui ninaah a chuong lut ta pei a nih. Pasal nei zing loa a lêng nawk chun ‘nuthlawi’ a hung ni a, pasal a nei nawk charin a thlawina chu a bo a, chu ‘nuhmei’ (woman) chu mi ‘nuhmei’ (wive) a hung nih. ‘Nuhmei’ ti thumal hi lam dan inang chie ni si, woman le wive ti kawka ei hmang hi Hmar trong sukkhikhawktu laia pakhat a nih. Hla trongin nuhmei (wive) chu ‘thâi’ ti a ni a, a pasal thi hnunga amaa in hluoa a khawsa chun ‘hmeithai’ a hung ni a, pasal dang a nei charin ‘hmeithai’ a nina boin mi ‘nuhmei’ a hung ni nawk a. Hla thu ni loah, mi pakhatin nuhmei pakhat neka tam lo nei ta sien, a hmasa tak chu ‘thaipui’ ti a na, a danghai po chu ‘thaikêm’ amanih ‘hmei’ (concubine) ei tih. Chuleiin, ‘wive’ tinaa ‘nuhmei’ ti nek hin ‘nuthai’ (nu+thai) ti hmang inla chu a fûk lem el thei. A ‘thai’ thuneina hnuoia kûn le bawi anga a hmang pa chu ‘thaibawi’ ei tih.

Nu nina ngirhmun

Ei thupui tak chu, nuhmei hi nu nina ngirhmun hnè tak, zo tak, fel tak le inzaum taka phur suok zo mi hmu ding an vangzie thu, Thuvarhai 31:10-31 a Lal Lemuel kuoma a nu thurosie maksan chu a nih. Lal Lemuel chu tu am a nih ti hriet a ni nawh. Lal Solomon hming lem le thuvar a hril sawng hi a kuoma a nu Bathseba thurosie ni dinga ring a ni laiin, mi threnkhat chun Lal Lemuel hi Arab lal pakhat ni dingin an ring. Roman Catholic-hai hmang The New Jerusalem Bible (NJB 1990) le The New English Bible (1974) a chu a thu hongnaah ‘The sayings of King Lemuel king of Massa’ ti an ziek. Ieng leia mi dangin ‘Massa-a lal’ a ni thu hi an ziek ve naw am a na ti ruok chu hieng tieng thil suituhai buoipui dingin maksan inla.

Thuvarhai 31:1-9 chen hi lal nungchang dinga a nu-in a dit dan a hrilhai chu a nih. A nu hril ni bok dinga pom chang 10-31 a hin lal khawsak dan ding hril ta loin a ki a thlak dai a, nuhmei fel le inzaum nungchang nia a ngai le chuong ang mi chu hmu zo a harsatzie thuin a khâr a. Baibul kan inlet laiin hi bung thupuia sie ding chungchangah ka buoi hle a. A san chu Saptronga inlet hrang hrangah ‘The words of King Lemuel’ amanih ‘Sayings of King Lemuel’ ti a ni a, sienkhom Lal Lemuel nu thukhawchang a ni bok si. New Revised Standard Version (NRSV-2008) a chun indik lemin ‘The teaching of King Lemuel’s mother’ tiin an sie a, ‘teachings’ ti loa ‘teaching’ ti chauh singular form an hmang san khom hi ngaituo fe tham a ni ka ring. Hieng neu neu hi Baibul inlet sina ngaituo chîk ngai le inlet sukhautaktu laia pakhat a nih.

Ei hril tah ang khan ei thu chai ding chu nuhmeia nei ding pasalin a zong changa a nei nuomna san, ‘si’ tam- a fel si, a zaidam si, a taima si, a ngilnei si, a ngo si, a hmel a thra si le a dang dang- a sie tlar anga chang 11-31 sunga ‘si’ tam kol nuhmei a hril chu hmu a harsatzie thu a nih. Hi chang 10-31 hi ‘acrostic poem’ an ti a, Hebrai trong hawrop 22 indota rem suka inthoka thu, umzie neia phuok suok a nih. Sam-ah hieng anga rem hla hi iemani zat a um. Ka hla phuok ‘A hung suok sorthlapui thangvanah’ ti khom kha ‘acrostic poem’ a nih.

Ei thu thlir lai hriltu hi Lemuel nu a lo ni khomin, a thil hrilhai ‘acrostic poem’ a siem remtu chu Lemuel a ni lem ngei ring a um. Thuhriltu 7: 27-28 a Solomonin,

Thil niphung hmu suok ding chun,

Sîr tina en chieng a thra hlak;

Ka hmu hmâ khat ka zong a,

Pasal sangkhat lai mi ngîl,

Pakhat vêl chu ka hmu a,

Nuhmei lai chu ka hmu nawh (DV)

a ti top el kha ei zuk suidon chun 31:10-a nuhmei fel le thra hmu a harsat thu zieka um hi Solomon nu Bathseba thu vuok thlak nek hmanin nuhmei (wives) le hmei (concubines) a sanga intung Solomon-in a tonhriet a zep sa ni lem sien a awm khop el. Hi hmaa a hril lem lem hi chu a ru inlanga Good News Bible-a an inlet anga “I found something more bitter than death-woman..” tia hang inlet ve phong ding chun pang a trim uoi uoi a, BSI le BFW sut ei Baibula an inlet anga kawk bo dêra inlet ve tak nuom a um el a nih. A pai inhoi lem met dingin hieng hin ka hlu lut a:

Thina nêka kha lem ka hmu chu,

Tokdara thrang nuhmei a nih.

A lungril chu châng le lĕn ang a na,

A kut chu thirkol ang a nih;

Pathien suklawmtu chun pumpel a ta,

Mi suol ruok chu man bet a tih (7:26).

Nuhmei am Nu?

Chang 10-31 thupuia hin NRSV chun ‘Ode to a capable wife’ tiin; NIV chun ‘Epilogue: the wife of noble character’ tiin; ESV chun ‘The woman who fears the Lord’ tiin; NJB chun ‘The perfect housewife’ tiin; TEV (Good News) chun ‘The capable wife’ tiin an sie a. Hi hi entirna dinga ei zuk tar langna san chu Saptronga inlettuhai khom ‘woman’ ti hmang pawl le ‘wife’ ti hmang pawl an um a; thu lai zong ni awm New Jerusalem Bible chun ‘housewife’ a hmang a, sienkhom tu lai thilah ‘housewife’ tia inko nuom lo, ‘partner’ ti zawnga inko thlang lem dam an hung suok tah pei leiin, ieng trongkam tak am hmang ding thuah ngai dan le dit dan a khuongruol vong thei nawh. Ei thu bi lai hriltuin a hril tak chu ‘nuhmei’ (woman) ditum le fel ni loin ‘nuthai’ (wife), insung enkoltu nu (housewife) ditum le fel nungchang ni dinga a duthusam a nih.

A tranna chang 10-a zawna anga mi tam tak inlet hi zawna (question) ni loin thudik puongna (statement) amanih thluoina (comment) lem a ni le ni naw hi seminar neia chai fe tham a nih. Hmar tronga Baibula chun “Nuhmei ringum chu tuin am hmu thei a ta?” (BSI), “Nuhmei thratak chu tuin am hmu thei a ta? (BSI-Muolhoi), “Nuhmei thra ringum chu tûn am hmu thei a ta?” (BFW) tiin an sie a. Chuong ang mi chu nuhmei tu khom hmu ding an um naw thu, thu tawp hrilna trongkam a hoi khop el. Tirko Paulan Timothe kuoma upaa thlang tlaka a ngai thua mihriem tlin mei mei ruol lo kualifikeson a phut ang deuh khan, Lal Lemuel nuin nuhmei thra le fel kualifikeson dinga a ngai, a naupa kuoma a hril chu khawvelah hmu zo ruol a ni nawzie a naupan a hriet leia a thu hongnaah tlipna thu hi a sie khom a ni el thei. Khang khopa Pathienin varna chungchuong a pek bik Solomon-in hieng lawma nuhmei a hang sop el hi chuh, hnam dang mi pathien, milim chen khom inbiektir ve khopa thruoi kawitu an nih ti a hriet chieng lei khom a ni el thei. Delhi Version-a ruok chu, “Nuhmei thra le ringum hi, Thil hmu harsa tak a nih” tiin kan sie thung a nih. Tlin zo ruol loa ngai kohran upa khom ni inhawk tam tak an um ang hrima kohran tinin upa ei nei fer fur ang hin, nuhmei thraa inngai le pasalin thraa an ngaihaiin khawvel an dap suok el tho chu a ni hi tie!

Ieng ang nuhmei am ti hril fiena trongkam ‘adjective’ hmang thuah Saptronga inlettuhai khom an khuongruol naw a, theulawzi zawnga lak lem chun an trongkam hmanga inthokin theulawzi tam tak a suok thei a nih. Delhi Version-ah “Nuhmei thra le inzaum” tia kan sie laiin, BSI chun “Nuhmei ringum” tiin; BSI (Muolhoi) chun “Nuhmei thatak” tiin; BFW chun “Nuhmei thra ringum” tiin an sie a. Saptronga inlettuhai khom an khuongruol nawh. KJV, NLT, ERV le WBT chun ‘virtuous woman’ an ti a; ESV le NASB chun ‘excellent wife’ an ti a; HCSB, ISV, NRSV, TEV hai chun ‘capable wife’ an ta; inlet hrang hrangah deligent woman, valiant woman, worthy woman, wife of noble character, wife with a strong character, woman of worth le a dang dang an hmang. Hieng trongkam hrang hrang an hmanghai lai hin a ieng khom fûn kim a um naw a, ‘excellent wife’ ti hin a kawk hnai tak el thei.

Nu changtlung ni dinga ‘si’ hrang hrang a hrilhai laia pakhat chu sumdawng thiem a ni tlat el! Sumdawng tienga nuhmei ruol an inlap rak rak hi, threnkhatin hril sap kainaah ngai hai sien khom, Thuvara nu thra le fel nina kualiti a hril laia pakhat, insung, khawtlang, ram le hnam hmasawnna le changkangna dinga hmangruo poimaw a hril chu nei ve dinga thrang nasa taka la an ni lem a lo ni zing. Delhi tlanga sorkar thoktu nuhmeihai lem hi chuh a a tu el khom hieng tienga enton tlak deuh vong an niin ka hriet. Mani umhmuna insung relbawl le rongbawl sin thaw zing puma sumdawng tienga thrahnemngai an ni leiin, insung mamaw phuhrûktu le keidingtu an ni bakah kohran ban poimaw an nih. Chu chu an pasalhai hlaw le inphu baka insung burip an indin theina san thuruk chu a nih. Ka leng le hmu phakna chinah insung tlabal ka la hmu nawh. In sung inhnok met a um palh chun sumdawngna thuomhnaw an hau lei a ni pei.

Ka ngai dan chun, nuthai thra le fel kualifikeson a hril po po nei kim hi mi lo um tah khiet sien, nuhmeia nei tlâk hrim a ni ka ring nawh. Sun le zan sinthawa buoi a ni leiin a pasal enkolna dingin hun nei teu naw nih. A hriltunu hi Solomon nu Bathseba lo ni sien, râl doa a pasal a thang hmang kara mi pahai lo kopa, nau khom pai hiel le a uiret leia a pasal Uria khomin a hringna a chăn pha hiel nu kha a ni a, a khawsak dana inthok chun enton ding tam bek kher naw nih. Mihriemin duthu ei sam hin ei ni phak lo thil, ni ei nuom thu ei insam rop angin, Bathseba khomin nuhmei thra ni dinga a duthusam, ama nun le tak ram leh inzom lo, nungchang thra le mawi le dituma a ngai, a naupa kuoma a lo inzawt hlak chu a ni el thei. Lal Davida nuhmeihai lai chu Abigail tluka nu var le mi biengbiek thiem an umin ka hriet nawh. Baibul thu hrilfietu threnkhat chun nuhmei fel le thra chungchuong nungchang dinga a hril hi Isu Krista ‘mo’ huol kohran (church) nungchang le khawsak dan ding a hrilnaah an bel thung. Hi hi a literechar neitu tak Judahai thukhawchang ni loin, pot făn thukhawchâng a ni lem hmel khop el. Commentary tam tak hi an thlirna tukvera inthoka an ngaituona inleng vel an pot făn rak a tam a, tukver danga thlira thu him lo a um hlak a, fimkhur a ngai. Theology inchukhaiin an suongtolol deu tak Matthew Henry’s Commentary khom hi chu thila chun a fihlim bik nawh.

A ieng ieng khom chu ni sien, mani nuhmeihai sengah hieng kualifikeson a hrilhai hi bel inla, mark ieng zat am ei pek nuom tawl ding ti chuh mimal thu tlukna sengah sie inla, a him tak ka ring. Chu chu a ni lai zingin, hieng kualikeson po po hi mani nuhmeiin nei kim dinga beisei pasal chu pa vangduoi tak ning a tih. Lungawi le lungawi nawna, hlim le hlim naw inkar hi ei beisei le tak ram inkar hlat le tawiin a phur vong a nih. Paula ruok chun Efesi mihai kuoma a lekhathonah, “Ei Lalpa Isu Krista hmingin ieng lai khomin iengkimah Pa Pathien kuomah lawmthu hril rop ro” (5:20) a ti tlat leiin kualifikeson nei rawn le rawn lo koltu tu khomin Thuvarhai 18:22 a “Nuhmeia nei ding zong hmutu chu thil thra hmu a na, Lalpa ditsakna a dong hlak” ti kha innghatnaah hmanga a tu el khom kuoltu taphot chun lawmthu hril ding ei nih. Ei thuvar khoma, “Nuhmei le bahra chu a’n zămna ngul zir a nih” ti a ni khah. Mi huon hring bik dinga ngaia inhnar nekin mi inhnar ding khopa mani huon seng duot le enkol hring hi a poimaw tak. (Delhi, May 17, 2014 Saturday).

Date: 16 May, 2014
Venue: Saikot Playground
Time: 1: 30 PM
Chief Guest : Langkhanpao Chairman ADC (CCPur)
Guest Of Honor : Demmang Haokip Vice Chairman ADC ( CCpur)
Functional President: Lalhossan EM, ADC, (CCpur)
Opening Prayer : Rev. Lalngailien Puruolte
Welcome Address : Sylvia Laldinmawi
Keynote Address : Lahriet Famhoite, President, HSP
Presentation : HMARTOB
Spl. Nos.: Elizabeth Sungte, Clerance Mawite & Jenneth L. Varte
Speech : Functional President, Guest of Honor and Chief Guest
Cultural Dance: HSA, Saikot Unit
Inspection: Chief Guest
Silent Prayer
Flag down: Chief Guest
Final Kick-Off: B. Aijalon v/s Fast (Rengkai)

Lo download ve ro:
Android Mizo keyboard

ANDROID-a 'Ț' 'ț' le thaihâng dang dang hmang theina.
Ei unau mizo tienga mi Pu Lalsangpuia Ralte a siem MIZO ANDROID KEYBOARD ka hung pêk. 
Ei hawrawp an ang tho leiin a pawina a um ka ring nawh.
Version: 1.1-alpha
Type: .apk
Size: 35.6 KB
Android OS: 2.3+ (Gingerbread+)
Root required : No
MD5 : 9d72406b7df6cb5582126023f000af9b
SHA1 :
35ef017860301b4deaf40facdca79c1a3b2a850f
Usage : Settings > Language & Input > Keyboard &
Input Methods > Mizo Keyboard Alpha
Note: Qwerty hmang hai tadingin harsatna hran ding a um nawh. A keybord sirah um a nih.
Thaihâng i hmang nuom chu a hawrawp kha vawi hnih click ding.

Inputs: Jacob Lalnunthleng Pulamte of FHG

Ziektu: Pu L.Keivom, Inpui.Com Columnist

Hmanah Mosian Kanan a thlir a,

Luah zo loin Lal thuthlung a phur a;

Kanan ram ropui leh a mawina a hmu,

Inchhira ngaiin a trap ang maw!

ti hla, Khawbung khaw mi Patea phuok chu kan nu’n a hung sak suok tah phut el a. A hun: vairik, dar sawm le a chenve, Thlaram (September) ni 19, 1980; a hmun: Nebo tlang, Jordan ram. Awiin awi naw inla, tak sawnin sawn naw inla, hi huna hin kan sungkuoin tiena Mosie’n mitthli sûr hnuoia Kanan ram a thlir vung vungna hmuna chun kan lo ngir ve tah zing a nih ti kan nu hla sak chun a mi zuk inhriettir zuol a. Tienami le mang rama thil um anga ei lo hriet, hnuoi ram thil khoma ei lo sie ngai mang lo, a taka ke ngeia ei hang dai a, mit ngeia ei hang hmu hin iemani kong zawng chun mang a hoi lem a, pang a’n za deu huou bakah tien lai thil ngaituonain lungril a hluo a, mani khaw hlui fang nawk ang elin khuo a sawt rum rum hlak chu tie!

Kan inzin kan thang sawt deuh tah lei le ofis trulna le inzoma hung kir vat dinga kona ka dong leiin, hi tûk hin kan umna Jeddah (Saudi Arabia) tieng kir nawk dinga insiem kan nih. Kan sungkuoa Jordan ram (tiena Edom le Moab) ni thum kan fang sungin Baibula thuthlunghlui ram hmun hrang hrang ka hmu nuomhai chu kan sir suok phuor ta a. Tuipui Thi (Dead Sea) hang alzie intemin; Mosie tuisunsuo nia an hrila inthoka tui fim le dei hung inchik suok chu dawnin, chu fiertui ngei chun kut le kehai sawp le inphi harin; a thlang tieng ruoma Nabatianhai khawpui hlui, Petra, Seven Wonders of the World-a thrang zing hlak chu fangin, a bul ela Hor tlang, Aron thina le an phŭmna tlang thrut, hmun rè, tui luong hok hokna vadungte kam thing buk hnuoiah nightingale rawl mawiin mi’n awi le dawi anga mi dom zing puma chawl hadamin; Moab tlang zam pheia Naomi le a mo ringum Ruthi hai sulhnung suiin; Gilead tlang zam phei hrût a, hnuoia Isu a leng laia ‘Nuoia pawl’ ramhuoi a hnot suok, vok ruol sungah lut a, Galili Dila an tlan thlak hum humna hmun dam fangin; Jordan vadunga Isu’n baptisma a changna hmun dam, mi huoisen le ringum Uria, Davida’n a nuhmei Bathseba a lakpek nuom leia thi ngei dinga ral hmatawnga a sie leia hringna lo chan tah lungphun, Amman khawpuia um chu inza taka sirin, Baibula inlang sulhnu hring zing tam tak fang tah inlang khom, ka lung a la kim thei dĕr da’l! Nebo tlangah chuong loa kir chu seramu thûr theiin ka ngai naw a; chu thil, hmu makmawa ka ngai chun a mi tur a, a kutin a mi hŭi a nih.

Zingbu fak khop chun Jordan khawpui Amman (Thuthlunghlui huna Rabbat Ammon an ti hlak, Romanhaiin an hung op hnunga Philadelphia tia an ko nawk) chu suoksanin km 30 vela hla Nebo tlang bula khaw hnai tak Madaba panin kan suok a. Chu taka inthok chun Nebo tlang chu km 6 chauh niin an hril a. Car-a fe thei le thei naw kan hriet naw a, a fe thei naw a ni khoma kum 120 mi Mosie hman a lawn kai chun keini khom kea lawn kai ve inhuomin kan insingsa a. Nebo tlang hi tuipui truong (sea level) a inthoka inkhiin meter 817 (feet 2680) a insang, a thlang tieng rala um Jerusalem neka feet 130-a insang lem a nih.

Madaba kan tlung chun rălah biekbuk kan hei hmu a, iengkim indon fel tumin, chu chu kan pan nal nal a. Hi biekbuk hi Saint George Church an ti a, ‘Mosaic Church’ tia hriet a ni bok. Chu chu ‘Mosie Biekbuk’ tina ni loin hi biekbuk truonga lung nawi hlek rong chi hrang hranga an rem ram lim, Palestina ram map chu a nih. Lung amanih darthlalang hlek nawi rong chi hrang hrang bel khawma thil lim siem hi ‘mosaic’ an ti a, hi biekbuk truong, mipui thrungna le pulpit inkar hmun ruoka hin lung rong chi hrang hranga rem, ram lim (map) a um a, chu chu A.D. 6-na laia Palestina ram lim a nih. Hi hi khawvela Palestina ram lim, ‘mosaic map’ an hmu suok china chu a hlui tak le upa tak a ni el bakah, tien lai BC 1400 vela Mosie rawia Israelhaiin ram tiem Kanan pana Sinai thlalera an lampui hraw dam, Mosien thlalera rûl a khaikangna hmun dam, Thupek Sawm a lakna Horeb (Sinai) tlang dam, Aron thina le an phŭmna Hor tlang dam, Jerusalem le hmun dang dang fie tak le mawi takin an inchuon a. Hi map-a hin Nebo tlang khom chieng takin an inchuon bok a. Kum sang le zali neka upa hiel ni tah sien khom zani ela siem anga tharin a la’n lang a nih. A siemna hin lung hlek maktaduoi hni neka tam an hmang a nih.

Nebo tieng fena lampui an mi hril hnung chun phûr takin chu tieng chu panin kan suok a. Kan hmaa tlâng sîp insang kan hmu hmasa tak chu ni ngei dingin kan ring phot a, sienkhom a panna ding lampui a’n kaw naw leiin beithlawn takin kan tlan pel a. Nebo tlang awm hrim chu kan hmu el naw leiin bei a dong tran hman a. Sawt naw te hnungah tlang sîp pakhata biekbuk um kan hmu a, chu chu kan pan chot a. ‘Sakei inrŭm chu hmai ruol a ni nawh’ ti angin, a hmun kan tlung zet chun “Hi ngei hi a lo ni hih!” ti naw ruol a ni nawh. A hmun a’n daw thra a, tlaitlan hang dawna dinga duthusamum, khaw thlirna hmun remchang le inhoi a nih. Răla biekbuk kan hmu khom chu Rome mihai inlal laia an bawl, an bawl thrat nawk a nih. An hril dan chun, hi biekbuk hi Mosie hrietzingna dinga 394 A.D. laia an bawl zo tah a nih. Hi tlânga hin thlăn hmun hriet lo-ah Mosie kha an vui ni-a ngai a ni bakah Mosie rawia an hung som Thuthlung Bawm (Ark of the Covenant) le Biekbuk (tabernacle) hai khom kha zawlnei Jeremia-in hi tlanga pûk pakhata hin a thup niin 2 Maccabees 2:4-7 chun a hril. [1]

Nebo tlang hi Tuipui Thi hmar sak tienga um, Moab tlang inzam phei laia pakhat a nih. Hi tlanga inthok hin zuk thlir inla, a thrut ela chun a zanita kan fena Tuipui Thi le Jordan varuom dam chu a’n lang chieng hle a. Hi ruom, Tuipui Thi innghatna, chutaka Jordan vadung a luong ralna hmun hi khawvela hmun indĕpna tak, Leilai Tuipui (Mediterranean Sea) truong (sea level) neka feet 1300 hiela inhnuoi lem a nih. Jordan vadung kama Jeriko khuo khom tûm thing karah zing châtin ei zuk hmu thei a. Zing khaw inthienga lem chu Jerusalem le Deuteronomy 34:1-4 a ram a hril po po, hmar tienga Gailili Dil le vûrin a bawm zing, phaw ang ela hung hlietu Hermon tlangpui khom an inlang vong a nih. Hieng anga Kanan ram inlang chieng theina khawthlir dang hi hieng lai hmuna hin a um nawh.

Nebo tlang hmar thlang tieng ruom, Mosie an vuina hmun ni-a an ngaia chun lung banga inthokin tui thienghlim hrat tak a hung inchik suok a, chu chu Mosie tuikhur tiin an ko a. Hieng vel hi hang hmu chun, Mosie ruong, hmon loa hnuoia zal ding chu ngaituonain a dap a. Naupang laia sande sikula a chanchin kan lo inchuk hlak, hnuoi ram nek hmana khawvel danga thil tlung anga kan lo suongtuo hlak thil a ni leiin, a tak ngeia a tlungna hmun hang fang chu a taktak sawn a harsa hiel a nih. Chu tlanga inthoka romei zing riei hnuoia ngaituonaa hla phuoktuin Kanan ram a thlir chun, a taka tonhriet tlukin a hmu chieng a nih ti a hlaa inthok hin inhmai ruol a ni nawh:

Kanan romei leh ni tla zâm vêl,

Hruaitu Mosia chuan a han thlîr chiam a;

Jordan râl kai chu Lalin a phal lo a,

A hmangaihte chu hransan ta.

An hril dan chun, hi hla Pate-in a phuok trum hin Thekte khuo-ah a’n zin a. Chu trum chun Chin Hills-a Pautu khaw kohran upa pakhat, Aizawl-a inzin hung kir chu Thekte khuoa chun a riek ve a. Ama chun Zosaphai pek, Nebo tlanga inthoka Mosien Kanan ram a thlir vung vung lai lim chu a hung hawn a. Chu milim chu a tlungna sumphuk bul thlang tienga antram huon pala chun a tăr a. Patea chun uluk takin a thlir a. A khaw lal Thanga kuoma chun, “Pu Thang, lung a va hang sukleng ngei de!” a ta. Mosien Kanan ram a lut ve thei naw leia a lung hang inleng dingzie chu dawnpuiin, an khuo Khawbunga a kir nawk hnungin hi hla hi a phuok a nih.

A chunga hla phuoktuin Mosie ngirhmun thiem tak le lung kuoi taka a hril ang hin, hi ni hin Mosie chan hi dawnpui naw thei a ni nawh. Mitthlain ka bulah funghrol le inthrungin ka hmu a. Bawngnene le khuoizu luongna rama hril Kanan ram chu a hmaah puon anga zarin a um a, lut ve nuom ĕm êmin a thlir vung vung a. Bawi khaidiet hlipa zalenna silfen inbelin, a mi thruoihai chun chu ram ngei chu an hluo tran trêp a nih ti ngaituona chun a lungril a sukhlim a. Chu Kanan par chu tlana lêng ve dinga phal a ni ve naw thu a zuk ngaituo ruok chun a hmêla hlimna êng chu beidongna sûm inthimin a hung hlie a. Ama ta ding chun chu ram chu ban phak ela hnaia um, thei hmin kûr truk el, fak a chăk ĕm êm, sienkhom a lo le fak phal si lo ang a nih. A dangawk a suonlam hnung khoma ami Israelhai thruoi suok dinga Pathienin a tir lui dan dam, a hnunga rinumna le tuorna thuo tam pal tlanga Israelhai a thruoi dan dam, an ram hluo dinga tiem an tlung phinga ama lut phal a ni naw thu dam, uoiin inhnik tak dawn dinga no rei le a hmur an intawk chara dawn hman loa ben thlakpek ang a nizie dam chu ngaituo ngei a tih.

Ka ngaituo zui pei a. An Pathien ngei khoma hnam lulul le khikhawka a hril, mipui maktaduoi thum chuong lai, nu le nau leh, thlaler hmuna ke ngota kum sawmli lai hang thruoi chu, thlaler hang thlalerzie le harsatzie hmu ngai nawhai chun a harsatzie ding hisap phak ngaina khom a um naw el thei. Tlang, lungkawhrot le fil, zawl le muol zamhai chu pilvut ngota tuom sip hmun a nih. Hmun tam takah thli lumin pilvut a len vel chu thrawngaleivira inzielin, muol lien tak tak an siem a; chuong muol lien tak tak hai chu iemani chen hnungah thli lum bokin a len hmang leiin hmu ding an um ta nawh. Sŭnah lunginsietna far khat khom thrang loa ni intrengin a em leiin vut chier chunga lawn ang elin a sa a; sawl changa thing hlim hang bĕl ding hrim a um naw a; thlifim dong ding um sun chu pilvut lum inlêng chum chum chu a na; dangchâr chănga hang dawn ding tui far khat khom a um nawna hmun deu vong a nih. Zanah a dei nawk ĕm êm thung a. Chuong rinumna le harsatna po po chu a mihai leiin a tuor muolsuo a. Thil dang po po nêk hmana harsa dinga ka ring chu a mihai suolna le lululna leia an chunga Pathien lungsenna zăp dei sin chu a nih. Ni sawmli le zan sawmli zet ieng khom fa lo le dawn loa a mi thruoihai sukbohmang lo dinga ngenin Pathien hmaah a bokkhup chang khom a um a ni khah (Deut.9:25). Ama tluka thruoitu nina tlin taka hlen zo hi khawvela mihriem pieng tah lai hin hang dap inla, hmu ding an um nawh. Mihriem ni ve ta chawk chu, hieng po po a tuor muolsuo hnung hin chu Kanan ram hang lut chu phu hlie hlie dingin inngai ngei a tih. Ka rorelna hmaa ngir chu ni sien, ihe loin a tling zăn.

Amiruokchu, chuong lawma thruoitu ropui le inpe zo chu Pathien rorelna hmaa chuh a tling zo ta naw tlat el! Tui dawn ding nei loa Israel mipui inhrâwta Mosie le Aron chen deng hlum an tum truma Pathienin lungpuia inthoka tui thienghlim a pek khan Mosien a chawimawi ding angin Israelhai hmaah a chawimawi naw leiin, hmangaina le thîkthua sip Jehova chun Mosie insuong palna chu a ngaidam thei nawh. Hi hi thil sui tham a nih. Mosien tui a sun suok ding chu a mihai a hmangaina leiin a khap el nawh. Mosie thilthawtheina leia tui khom chu hung put suok a nih ti mipuiin an ring ding lakah khom dălna a siem chuong nawh. Mosie chu an thruoitu a ninaa inthokin a pei thlak nghal el bok nawh. A thu tiem hlena a um zet hnung chauin Pathien chun a lungni nawna chu Mosie kuomah a’n hriettir chauh a nih. Kanan ram chu lut thei lo ding le thi dinga ruot a nih. A thiemna tieng pang a ngaituo chun Mosie chu Pathien lakah a nuor hle ring a um naw thei nawh. Mihriem ngaituona ringot chun Kanan ram hang inluttir chu hang phal el khom thil âwm tak a nih. Sienkhom rala a thlir a phalpêk trawk chauh a nih. A thikthu sietna laka Pathien lungril hang khauzie entirna fie tak a nih.

Eini dama la umhai chunga roreltu Pathien chu a pangngai zing tho a nih. A hmangaina tawp lo zara thohma thruoitu dingin a Naupa nei sun chu hnuoiah thi ding le thia hring nawk dingin mi tin ta dingin hung tir sien khom, a rorelna ni a tlung pha chun ringnawtuhai laka a hang khauh dingzie chu ringhla ruol a ni nawh. A ring zo le thlang bik Mosie meu khom a hlá si naw chun, eini khomin a dit naw zawng ei thaw vaih chun a hmangaina leiin ei chunga hremna tlung ding chu kei kir naw top a tih. Mani theina le hratna suonga damlai lampuia kal chawitu le rong bawltuhai khomin Mosie chanchina inthokin inchuk ding ei hau hle.

Aw, kei pawh Kanan thar chu ka thlir,

Ka chakna ringin ka thleng lo ang;

Mahse, Lal Jehovan min hruai ang a,

Ram nuam, chu ang chu, ka la han hmu ang

ti hi ringtuhai kalchawina hlapui dinga ditum a ni phot el. Isu Krista ringtuhai, Pathienin naua a pom le a ro le a ram tiem hluotu dinga a ruot, Isu thisena intlanhai hang vangnei dan dam dam hi ngaituo tham a nih. Chu thisen zara chun, Mosie chunga lêng vong ei nih.

Hieng po po hi ngaituo zing pumin, Nebo tlang chu thlakhla takin, Saudi Arabia tieng panin kan suoksan tah a nih. Khawvela ka hmun sir nuom laia pakhat sir theia Lalpan hun remchang a mi pek lei chun hamthra ka’n ti hle a, lungrilin lawmthu ka hril mol mol a.

(Originally written on October 10, 1980 at Jeddah, Saudi Arabia and digitized on May 2, 2014 at Delhi with slight revision and additions. LK)


[1] Osama bin Laden inrawi firfiek ruolin kum 2000 (millennium) sunga rikrap an insuo tranna dinga January 3, 2000-a a ruola thil pathum chu, Adena um USS Destroyer (Indo Long), Jordan khawpui Amman-a Radisson SAS Hotel le Nebo tlanga Baptistu Johan hrietzingna Biekbuk- hai bom dar vong a nih. A thaw tumtuhai hi an thaw hma kar hniin an man fai vong a, an dawpnaah an thil thaw tum hi an hmu suok a nih (Washington Post Dec 24, 2000). A kum nawk September 11, 2001-ah New York-a World Trade Center kha an bei a nih. LK

Powered by Blogger.