Halloween party ideas 2015

-Timothy Z. Zote
Japan Camp Approach Road,
Saikot, Tuithaphai (25.2.2017)
                                     
       Khawvela Manmasi Hmar hnam a dam  sunga a chanchin bo ta lo dinga ngai, le thang le tharhai khawma a chanchin an la hung suizui pei ding khawpa  hnam ta  dinga thawhlawk em em  Fam Rev. Dr. Rochunga Pudaite hi a chanhin kimchang ziek ding hre naw lang khawm ka hriet ve hai  tarlang lo thei loa ngaiin ka hei zieklang  tum a nih. Unau tienami hriet khawm an dang an ti angin ka lo hriet ve dan ka hung ziek ding a ni leiin, a lo indik naw deu khawm a, ka hriet ve dan ka ziek a nih ti tiemtu ha’n in mi hrietpui hmasa ka nuom a nih. A dam laia inthawka ka mi ngaisang le kan za em em, thiem inzirna (school) ama zara kai tan ve le ziek le tiem min thiemtirtu  chanchin tlin le tlin lova ziek theia ka umnaah Chung Pathien le Rev. Dr. Rochunga Pudaite family kuomah lawmthu bat lovin ka hril hmasa bawk a nih. A dam laia ka ziek insuo ka tumlai fam mi lo changsan sien khawm ziek tul tlata ka hriet leiin ka ziek a nih. Chun, kei a mimalin Principle (nghet taka ka chel) mi sietna neka mi thatna  ziek le hnam ta dinga chawimawi tlaka ka ngaihai chu an chanchin zieka sie that pek hi  a nih. Chu chu sukchiengtu chu, Manmasi Year Book Vol. I, II & III  haiah khan fie takin an langin ka hriet. A thu ringawta um nekin zieka um chun ro hlu tak an chang thei ti ka hmu vein kan hriet a. Chuleiin, ei hnam chanchin ka hriet le ka hmu hai chu ziek ngeia siethat pei hi ka mimal thiltum ka thaw mek le ka thaw pei tum a ni bawk.
Rev. Dr. Rochunga Pudaite
Hnam ta dinga angkai tak hung ni dingin Rev. Dr. Rochunga Pudaite hi kum 1927 December 4, Pathienni zîngkâr khan Manipur South District-a Kristien um tanna khuo Senvon, Pherzawl District-ah a hung pieng a. Amiruokchu, Vangai tlâng Phulpui khuoa seilien a ni thung.  A pa chu, Pastor Chawnga hi Hmar laia Kristien hmasa pawl a na.  A nu Daii Zote (Hriler) chu kum thum lai nuhmei tirko sin a thaw hnungin, zirtirtu Chawnga leh an innei a, nau paruk an nei a, pasal pali  le nau nuhmei pahni an nei a.  An nauhai hming chu Lalrozâm, Lalramlien, Rochunga (a hming phuoktu a pu Lusei ṭawng/Dulien tawng or Hmar ṭawng part –II) hmang a ni leiin a bel a), Lallienkhawl, Lallienkung le Ruoltinkhum an nih.  An unau nuhmeihai khawm chu chung tieng an mi lo inlawi  san ve ve  ta a nih.

       Chi le kuongah Hmar Leiri, Pudaite a ni a. Chun,Hmar pahnam laia Leiri nunphunga chun naupasal milai chu an nuom nanaa fe thei dingin an zalên hlak a. Amiruokchu, Rochunga a pieng zân chun a pa le kohran ṭhuoitu umkhawmhai chun, Hmarin Bible an nein aw leiin an lungrilah an lang angin a lu chunga kut innghatin, “Lalpa, hi naute hi Hmar Bible inlettu dingin i kutah kan hung inhlân,” tiin an ṭawngṭai a.  Chuuongchun, ama chu ringnain beiseina insang tak an nei hrim a nih. Hieng hun laia ring thar umhai khawm hi, hnamah an hring hle ti naw ruol an nawh. Tawng hringna dingin Pathien iengkim thaw thei kuuomah an hni nasa em em a nih. Khang hun laia kohran thuoituhai tawngtaina lei kha mani Manipur a khawm Tribal lai Mizo ti lova chu Hmar hin BA inchuk theina ei nei hmasa tak a nih.Hmar ṭawnga Bible nei kâr an nghâkhla leiin mi dang chunga khawm  an hni hlak  tho ring um.Inchukna tienggah  Phulpui khuoah Primary skul a zo hnung, kum 10 mi a ni chau chun, a pa leh nga manah an fe a.  

A pa'n Sandamna lampui a hril a, Lalpa Isu a Sandamtu dinga a pawm hnung chun, a pa chun, “I pienghlimin kohran hran ṭhuoituhai leh Hmar Bible inlettu dingin kan inhlân che a.  Chuleichun, skul ṭha lemah i kai ding a nih,” a ti chu a lungrila châm zingin, Churachandpur-a Middle skul-a kai dingin a fe ta a. Amiruokchu, Japan râl lien leiin Middle skul zo lovin, in tieng ân lawi a.  Chulai chun Mr. Sawithang-in Parbungah skul a hawng a, a hang kai a.  Tawite hnung chun Sawithang chun Sipaiah a fe san leiin, ama khawm sipai ni tumin ṭum hni lai a bei ve a.  Ana chu a la naupanga a pum a lien tawk naw leiin, an hnawl a.  Chuzova chun General Joseph Stillwell rawi a “A ram mi, a ram leilung le ṭawng hrie Intelligent Informant” a zawng lai khan an lâk ve a.  Thla thum vâng thuomhnaw zawr malama inthupin chu sin chu a thaw hnungin, Indopui a hung re tieng an ta leiin, Phulpui tieng a kîr a, lo a nei a.  Hun sawt rak lo hnung chun Calcutta-ah American sipaihaiin “landboy” (nawkawr) an lâk ti an hril a.  Sapṭawng thiem a nuom leiin, Calcutta maidan-ah tûk hni zet a va ngîr ve hnung chun, a la nuom an um naw leiin St. Lawrence high school-ah kai tumin a va fe nawk a.  Anachu, a sapṭawng thiemnain a tlin naw leiin an lâk naw a.  Rin deuvin in tieng a kîr nawk a.(Hieng ang hi nisien khawm lung a hnuol chuong der nawh-ziektu)

       Lakhipur-ah Mr. H. K. Bawichhuaka ṭhangpuina leiin Bengali High School-ah class 7-ah ân admit a.  Bengali ṭawng ruok a ni leiin harsa a ti nawk a.  Chulai tak chun Dr. Thanglung-in Lungthulien-ah Junior high school a hawng ti an hung hril a.

       July thla chun Lungthulien a pan a.  Admission thaw dingin Dr. Thanglung a biek a. Thanglung chun, “A fail tho tho ding chu admit, admit a ngai amanih,” a lo ti fiem a. Ama chun khûn taka lain, “Pu, admit khawm admit lova fail nêk chun, admit nia fail ka nuom lem” tiin a dawn a.  Class 7 a bawk a kai a.  Dr. Thanglung-in “fail tho tho ding” a ti lei khan a pu ta rak el a.  Final exam an hang nei chun, a pathumnaah a passed ta a. Chuphing chun, Dr. Thanglungin an fuinahai kha  a hriet zing a, a lawm em em hlak a nih. infuinaah lawmthu a hril tawp thei nawh.

       Kum 1946 chun Jorhat Christian High School-a class 8 zawm dingin a fe a. Chuonglaichun Pu H. K. Bawichhuaka chu Mahatma Gandhi le Pandit Jawaharlal Nehru thlawpa India Freedom Movement a zawm lei le a kûl a taia ṭhang ve leiin, Silchar le Syhlet lungina an khum hnungin Jorhat Jail-ah an sie nawk a.  Bawichhuaka lungina a va kan hmasak tak ṭum chun, Pu Bawichhuaka chun, “Saphai hi ei ramah an um a, thu an nei hlur a,  A ram mi ni zing si, Manipur-a ka fe dâm an khap a. Ka pa thlaktu chu thi ngamin Silchar D.C. Walker chun a hala.  Thu khêlin an hêk a. Pu Tlangval mâksan a, Mr. Coleman I thlawp naw chun Cachar-a inthawkin kan hnawt dawk ding che, ti dâmin an inṭhi a.  |hang ruol ei ta, Saphai hi ei rama inthawkin hnawt dawk ei tih,” a lo ti khum a.  A lungril a hne hle ni naw nîm, an high school pana a kîr malam chun Assamese student-hai lam hrawa khêk a hmu a, a ṭhang ve nghâl a. “Mahatma Gandhi! Jindabad! Pandit Nehru! Jindabad!” a va ti ve hemhem el!  Tlângmi, a ruolhai chun an inzapui a, mak an ti hle bawk.

       Lungina H. K. Bawichhuaka a va sir zât chun India ram a ngainatna a zuol peiin a hriet a. Pu Bawichhuaka hi, Tlângmi laia India Freedom Fighter pakhata hriet a ni leiin, India ram pumpuia chawimawina hmu tlâk a nih.  A chanchin lak khawma la bawzui ngei ngei  chi ni dingin an lang.  Khang lai huna inthawka India a lainatna a hung lien deu deu leiin, India ram puo tieng kum 50 lai a khawsak hnung khawmin Rochunga Pudaite chun Indian citizenship a nina a thleng nuom nawh.

       Jorhat Christian School-a Matric a zo hnung chun Calcutta-a St. Paul’s Colllege-a kai dingin, Rs.150 Mr. K. Luoia pawisa pûkin a fe ta a.  Calcutta a zuk tlung chu misuolin, a pawisa chawi po chu pe dingin chemte zumin a awmah sun dein, a pawisa.  A  a pêk vawng a, kut benthekin, zân ril lai College chu a tlung a.Amiruokchu, ring nawna tieng an Principal Dr. Nirmal Kumar Eddy chun, “India Sorkarin Scholarship for Scheduled Castes, Scheduled Tribes and Other Backward Classes (OBC) an siem thar hlim a um a.  Chu chu apply i ta, i college fee le mess fee chu tum thei el a tih,” ti pum zingin admission a pêk a; scholarship hnina lekha chu Delhi tieng an thawn ta a.

       Kâr hni hnung chun Joint Secretary, Ministry of Education chun lekha a hung thawn a, “Hmar is not included in the list of tribes in northeast India.  Therefore, your application is denied,” a hung ti ta a.  A ruolhai chun, “Lushai or Kuki inti la, scholarship chu awl takin I hmu el ding an nawm,” an ti a.  Ama chun, “Lushai kan naw a, Kuki ka ni bawk naw a. Pathien mi siemna hnam hming hi ka phur ngam naw chun, a mi siemtu Pathien chu kân zapui nîng a tih.  Ka ni naw hnam nia scholarship hmu nêk chun, hmu naw ka nuom lem,” tiin a dawn a. Principal Eddy kuoma chun a va fe nawk ta a.  Dr. Eddy chun, “Hmar hi hnam pakhat a ni ngei zie proof-nadingin Prime Minister kuomah lekha ṭha deuvin hung ziek la, lo thawn pêk ka ti che a,” a ta.

       Chawlkâr khat zet a buoipui hnung chun, a lekha ziek chu Dr. Eddy a vân hmutir a.  Phêk riet zeta sei a ziek chu, Dr. Eddy chun phêk thumin a lo suktawi pêk a, Prime Minister Nehru kuoma chun registered airmail-in an thawn ta a.

       Kâr hni vêl hnung chun Prime Minister office-a inthawkin, Prime Minister suoi sen nam meuvin lekha a hung tlung ta a.  Chu lekha chun, “The Prime Minister was moved to read your letter and he has arranged a special scholarship for you.  A new Commission for Scheduled Castes, Scheduled Tribes and Other Backward Classes is being formed and the name of your tribe has been submitted to be included in the list of tribes,” tiin Secretary to the Prime Minister chun a hung ziek a.

       Kum 1952 chun Pandit Nehru le inhmu theina um dinga a beiseina leiin, B.A. inchûk dingin Allahabad-ah admission a thaw  ta a.  AMRITA BAZAR PATRIKA, Allahabad edition hi Nehru’n a tiem hlak an ti leiin, “HMAR: The Little Known Tribes of North East India,” ti a ziek a.  Mak takin, thlalâk iemani zât leh Sunday Magazine Section-ah, phêk pui sipin an insuo a.  Chu copy chu Pandit Nehru chun a lo hmu ta ngei a, Delhi-a inzin dinga fielna lekha a hung ta a.  Amiruokchu pawisa a nei naw leiin fe thei lovin a um a. Kum 1953 November thla chun Pandit Nehru le a naunu Indira Gandhi chu All India Congress Party Working Committee hmang dingin Allahabad-ah an hung inzin a.  Chu ṭum chun lekha phêk nga laia sei, Hmar hnam harsatna ziekin, Nehru le Indira chu a vân hmupui a.  Pandit Nehru chun Delhi a inhmu zui dingin a fiel a, kalman ding khawm a pêk bawk a. 

       Hun remchâng hmasatak a chun, Prime Minister Nehru le inhmu ding chun, a ruolpa Mr. Chiten Jamir ṭhuoiin Delhi tieng an pan ta a.  February 12, 1954 zîng dar 9 chun,  Prime Minister In, Teen Murti-a chun Pandit Nehru leh an inhmu ta a.  Pandit Nehru chun, “Tuta hnung Hmar student-haiin scholarship thua harsatna an nei nawk ta ngai nawna dingin, Scheduled Castes and Scheduled Tribes Commission thar Chairman Dr. Kaka Sahib Kallelkar kuomah va fe la, sukfel vawng rawh,” a ta,  Kaka Kallelkar le inhmuna ding chun a Secretary chun appointment a siem pêk nghâl bawk a.  Chuongchun, chu ni la la chun, Hmar hnam chu, khawvêl um sûnga sukbo ta lo dingin India Sorkar lekhabua chun, chatuon chena dingin, ziek lût a hung ni ta a. Hienglai huna Rochunga Pudaite hlim hmel chu thil hmu chakum tak ning a tih. Tulai hun leh tekhi chun  mak tak el  a nit ah si.

       Rochunga Pudaite chun B.A. a zo char chun Prime Minister Nehru le inhmu dingin Delhi-ah a zu fe nawk a.  Nehru chun Dr. Verrier Elwin, Adviser to the Government of India for Tribal Affairs, Shillonga inthawka Delhi-a hung inzin le chun inhmuna a siem a, Regional Tribal Research Commissioner (Asst. Political Officer rank) sin, Dr. Elwin le thaw dingin a ruot a. Dr. Elwin chun Shillong-ah office a nei  a, North East Frontier Agency (NEFA), tuta Arunachal state-a hnamhai chanchin research thaw phawt dingin a ta.  Dr. Elwin le Delhi-a an inhmu hnung chun, Shillonga inhmu a, sinthaw dân ding hril tlâng dingin an intiem a.  Amiruokchu, Dr. Elwin chun “NEFA ramah Bible chawi thei naw ti nih,” a ti tlat leiin, ni khat khawm sin a thaw hma chun, inbânna lekha a pêk a.  Assam Governor Jairamdas Doulatram-in nasatakin a thlova chu, a nuom chuong naw a, Pathien thu lei chauva hieng chen tlung phâk ka ni lei hin, “Bible ṭhang lo chun thlai dawng kûng pakhat khawm tluk naw ningah,” tiin a dawn a. Mak takin, Governor  ditsakna  chu a zuol sawt  ti ding a um lem a.

       India rama mipawimaw  le inhmelhrietna nei ta si, thaw ding nei lo va um mei mei nekin tiin a  khuo tieng a fe a, Phulpui a hang tlung chun Hmar milûn Pherzawla Pu Saia rawi le Sartuineka Pu Thanga rawi chun, Compounder K. Luoia hung ṭhuoiin Hmar political party thar indina ṭhuoi dingin an hung fiel ta a.  Chulaichun Hmar puon chi khat  a buotsai (designed), tulaia  Hmar puon ei ti tak  le in ang  deu si  a laisen chu a designed chu,   a sangnu Lalkhawl ân khawng tir chu a lo zo fel chau  a ni thu a hril bakah, a nu le pa’n a’n lo  phûtna  angin Bible inlet a lo ṭan ta thu dam February 26, 2015 nia a Bangla, Sielmat-a kan inpawlnaah chun  a  mi hril.

       Hmar milûnhai (Mirawnkai/Miinlar) thurawn chu ngaithlain, Party thar indin a, Hmar district nawr dinga bawzui phawt dingin, Parbungah, July 16--18, 1954 chun inkhawmpui an kova.  Lungruol takin Hmar National Congress (Indian National Congress le inhrepaw zing dingin)  ṭan ding chun July 17 chun an sukthlûk ta a.  Rochunga Pudaite chu President dingin an thlang nghâl  a.  Chu ni vek chun Ngurdinglien pain  Hmar party thar lawmna din  vawk chal sûm ruk a that a. Zantieng chun tlangvâl pahni lekha pawimaw deudeu phur hi an hung tlung a. An lekha hung chawilaia pakhatna chu, Indira Gandhi-in, inkhawmpuina a hlawtling ngei a beisei thu le India ram ta dinga hmangruo ṭha a hung ni zui pei a dit thu a hrilna a na.  A pahnina chu, Sapram thirhrui (Cable) Pu Tlangval hung thawn a na.  An zuktiem chun, “My friends and I will provide for intensive Bible training in Glasgow or London Stop Cable decision,” (Kei le ka ruolhaiin Bible fîp taka in chûkna dingin Glasgow amanih London amanih i fena iengkim hung tum kan tih. I thu tlûkna hung hril nghâl rawh) ti a na.  A lungril chu namênin a buoi ta a.  A lekhathawn dawng zâna a thuhrilna ding meu khawm midang inhlânin, inngaituonain hun a hmang ta lem a.Inkhawm an ṭin a, in an tlung hnunga zâl an hang rem chun, a in thei ta naw a. Zân dâr sawm pahni hnung chun Parbung le Taithu inkâra tu ṭawpa chun ṭawngṭaiin Pathien rawl a nghâk a. Chuongchun zîng nisa suok hma met chun, a na dârah, “GLASGOW! GLASGOW! GLASGOW!” tiin vawithum a hung inri a.  Chu chu, Pathien kona ni ngeia ringin, mi hrilsiet le dem khawm pawisa lo dingin Lalpa kuomah a ṭawngṭaia ân hlân hnungin, a khuo tieng a pan nawk a. 

Pathien tieng rawngbawlna tienga kal pen ta dinga thutlukna a nei ta leiin  Hmar National Congress President a nina-a inthawk chun ân bâna, a aiawtu  ding chun a tupa, Mr. J. Lungawi, B.A. (L) chu an thlang nawk ta lem  niin a hril.

       Ni khat chu lekhathawn pakhat a dawng nawk a, chu chu lekhathawn chu Governor Jairamdas Doultram-in Hmar National Congress indin a ninaa a Pu Rochunga Pudaite kuoma lawmpuina thu a  nih.

       Sawtnawte hnung chun Imphal tieng a pan a, passport a ngaituo a.  Pu Thangkhawpao Kipgen chun kâr khat sûngin passport chu a sukfel pêk a.  Passport a nghâk laiin Hmar Bible Translation Committee chu Dr. Thanglung rawiin an indin a na, ama chu Convener le Chief translator dingin an ruot a, New Testament revision thaw a, London-a sut nghâl dingin an rêl a.  Chuongchun, Lalpa ṭhuoina ngei chun August 24, 1954 chun KLM Super Constellation vuongna lien chun London panin Calcutta-a inthawkin a vuong suok ta a.  Glasgow a chun Greek le Hebrai ṭawng inchûkin Hmar ṭawnga Bible inlet chu a ṭan ta a.  Thuthlung hlui Zawlneihai lekhabu-hai chu ân let ṭan nghâl bawk a.

       A kum nawk chun, 1955 chun Billy Graham in All Scotland Crusade ropui deu a nei a. Chun Counselor-in a ṭhang a.  Billy Graham ân hmupui a, ama chun Wheaton College Graduate School of  Theology-a lût dingin a fiel a.  A ruolpa Dr. Bob Pierce founder of World Vision-in chu-chu a lo hriet chun a college kainaa sum seng popo tum dingin lekha a hung thawn nghâl a.  Wheaton a chun M.A. in Biblical Theology le B.D. course an chuk kawp a, Bible inlet a thaw zui zing bawk a.  Thuthlung Thar London-a sut dingin a siem fel a.

       Kum 1957 chun Pu Tlangval, Watkin R. Roberts, chun Indo-Burma Pioneer Mission (IBPM) Organzing Secretary ni dingin a ruot a.  Kum 1958 kum bul chun IBPM Board chu ṭha tak indinin, Illinois State-ah registration fel takin a thaw zova.  Ama ngei chu IBPM Executive Director ni dingin Mission Board chun an ruot a.  Pu Tlangval ei ram hung sir dingin rem a ruotpui a, mawphurna po po chu, Pu Tlangval chun a kutah ân nghat ta a.  Ama khawm, chu kum chun India ramah a hung suok a, Sielmat Christian High School hawng dingin ân buotsai a, College hung ni pei dingin rem a ruot a. Hmar biela skul tam tak hawng dingin remruotna a siem a.  Lal K. Luoia ram pêk Sielmat hmun chu Mission hmunpui ding chun suknghet a hung ni ta pei a. Hun a hung fe peia nuhmei nei tula an lang le inzawmin  Lalpa kuoma a hni ang ngeiin, ama thlawptu dingin, nuhmei hmêlṭha tak le lekha thiem thei tak Khawlien, Mizoram-a Nk. Lalrimawi chu Pathienin a pêka. Lawmna famkim le beiseina insang tak leh America ram tieng an pan nawk ta a.

       Kum 1960 chun Hmar rama education movement nei nasat ṭûla a hriet leiin, Northern Illinois University-ah  Master of Science in Education Administration degree la ding chun ân admit nawk a.  Chutaka a thesis ziek chu, Education of The Hmar People ti a ni a, hi thesis ziek hi lekhabua insuoin a hung um ta pei a.  Amiruokchu a rawngbawl nuom dân le tum dân le ei ram Kohran ṭhuoituhai ngaidân leh ân ang naw leiin, hotu nina inchu theitu an lo um ve ta leiin, ei rama a rawngbawlna chu laina taka mâksan a, khawvêl lien lema rawngbawl tumna a nei a.  Sienkhawm ama dittu le ngainatu tamtakin mâksan lul lo dinga nasataka an phût leiin, education le damdawiin tieng thaw zui pei a, Kohran tienga khawm a thei anganga ṭhangpui dingin a lungril a siem ta a.  IBP Mission khawm Partnership Mission Society tiin a thleng a.  A puma chalaitu ni lova, partner (thlawptu) chau ni dingin lampui a zawng ta  pei a.
       Kum 1970 kum khan Hmar ṭawngin Bible pumpui ân let zova.  A Bible inlet laia Lalpa kuoma a hril rawp, “Tukhawma Bible vawikhat bêk a tiem hma chun thi naw raw se,” tia a ngên hlak chu sukpuitlingna dingin, Bibles For The World chu a nuhmei, Lalrimawi leh an indin thar a. Khawvêl pumpuia Bible semdar ding chun ṭhang an lâk ṭan a.  Hmar Bible an sut bâkah, khawvêl ram bung 110 chuong lai a Bible 16,000,000 chuong an sem dar ta a. Bible lo hmutuhaia inthawk chun lekhathawn maktaduoi khat nêka tam, “Bible ka tiema inthawkin ka hringna sukdanglamin a um,” tina lekha an hmu ta bawk a.  Chuonghai chu infuina nia ngaiin  BILLION BIBLE CAMPAIGN a lo thaw ta bawk a nih..

       Rochunga Pudaite hin lekhabu khawm iemani zat a ziek ta a. Chanchin |ha Johan Thlirna a ziek hmasa tak a. Tlangchar Tuihnar le Tienami a ziek nawk a.  Sapṭawng chun The Greatest Book Ever Written, ti dâm, The Book That Set My People Free ti dâm, The Dime That Lasted Forever ti dâm a ziek ta a.   Hmar ṭawng le Lusei ṭawng Pasalthra Pasarihai le Lawmna Thurûk ti a ziek a.  Chun a chanchin hi lekhabu pathum, God’s Tribesman, by James & Marti Hefley, Beyond The Next Mountain by Mawii Pudaite ziek le Fire On The Hills  Joe Musser ziekhai chu sutin an um ta a.  Chun a chanchin hi lekhabu pawimaw deu deu, Jerusalem to Inrian Jaya: Biographical history of the Church ti a le, Heroes of the Christian Faith ti volume III a chun Mother Teresa le Billy Graham inkârah an ziek bawk. Ka hring nun ti lekhabu a chanchin tiem hlawkum tak a ziek bakah a dang dang khawm a ziek bawk.

       Hollywood-in a chanchin Cinema, Beyond The Next Mountain ti an insuo ta a.  Kum 1976 khan Cambridge University chun Men of Achievement award an pêk a.  Kum 1977 khan Malone University chun Doctor of Laws ( LL. D.) an pêk a. Kum 1980 khan WHO’s WHO IN AMERICA lai an inṭhangtir a. Manmasi Year Book Vol.I & II  Who’s Who a khawm a chanchin hi inchuon a ni bawk.  Kum 2000 khan Dallas Baptist University chun Doctor of Divinity(D. D.) degree an pêk bawk.


February  26-27, 2015 ni khan Sielmat,Tuithaphai a ma chengna  Bangla- ah National Institute of Design ( Autonomous Institute under the DIPP, Ministry of Commerce & Industry, Govt. of India  hnuoia Researcher pali hieng - Arnab Senapati, Amishi Vadagama, Samridhi Thapliyal le Didini Tochhawng hai chun an subject -(Documenting the textile Traditions of the North Eastern states of India: A composite Design Satudy of Fabrics, Looms & Tools, Users and Cultural Indicators for  IGNICA) le inzawmin Hmar hnam puon  chi hrang hrang khawn khawmin Pi Buonzamawi, Pi Lawmi Pudaite, May Rose le Hmar Art & Culture Society  Chairman, Upa (Dr.) Rosiem Pudaite inrawina hnuoiah  thlalakna ni hni sung nei a ni bakah, zanah Pu Zosanghlei Joute, Seceretary,  Dr. Rosiem Pudaite le Buonzamawi le Pi Lawmi Pudaite hai inrawina hnuoiah  Hmar puon hai le an chanchin  hieng researcher pali hai kuomah hin hrilna nei a ni bawk. Hi designer pali hai hin sunah thlalakna an nei  lai chun  ka tupa Rochunga Pudaite chu Pu Ramneihlun Pakhuongte chun  car-in hung phurin kei ni lai chun a hung ṭhang ve ta a. Kan thil thaw hai chu a chanchin  ka lo hrilfie-a, a phur em em a, kei khawm chun hun remchanga ngaiin zawna siemin  thil tam tak a mi hril a, hril vawng hman ni naw sienkhawm a tlawm a zawng chu hei tarlang ka tih. Hmar thangsuopuon a lo design dan khawm fel takin a mi hril a. kan hohlimna ah chun Pathiena inthawka hnam an vawi zie chu uor takin a  mi la hril mawl mawl bawk.

       March 28,2015 a Hmar Inpui-in Retreat, Bethel, Happy Heart-ah hmang a tum khawm khan ram le hnam hmangaitu a ni leiin hun hawng tawngtaina le thucha tawi hril ding le hmang dinga ditsak taka fiel  a ni angin a taksa hratnawna  haiderin hun a hmang a. Hi nia a thuhril lungrila thi thei lo chu “ Pathien ṭi tak le thuawi taka ei um  chun  khawvel hmun hrang hranga ei umnahai hi ei ram a ni  thei  vawng a nih”  a ti  hi a nih.

       A thu hril lai hin ka lungril chun hieng ang khawpa a hrat ta’k naw hnung khawma, hnam ṭhuoituhai fielna  chu inzain hun a la hung hmang indik  hin hnam a ngaina de aw ti a min ngaituotir a.

       Ngaituona invak vel chun, kum 1984 laia  Sielmat Christian High school-a  ama zara  kai thei chau ka nina dam kha ka lungrilah a hung inlang ta zut zut a, lungriemin a mi thlak hiel chu!

A thuhril ngai zing puma ka ngaituona invakvel chun, kan ngaituo lungsieta,  a hring nun sei tak la dam dingin ka nuom takzet a.  A naupa Rev. John Pudaite-in thuhril tawi a hmang zo chun Stage-a inthawka wheel Chair-a hmanga an pafa’n an tum  chun ka en vawng vawng a, ka lunginsiet em em a, hril inhawi lo nisien khawm kan ring hman hmain ka mittui a lo tla hiel chu tie…Ka thaw thei nisien chu tleirawl deua hei siem  ka nuom ngawt chu tie!.!!!

       Thutlangkawm

       Ka pieng thla October 10, 2015 nia a thi thu ka hriet lem chun, ka sikhliem a puor a, hlilhai takin ka um a nih. Sum le paia ralna ropui taka thaw nuom lang khawm ka ngirhmunin a zir naw leiin, ka thaw thei tawk pu Rochung a puola hla pkhat ka ziek suok ve te hi a nel.  Hi hla hi Pu James songrolal Songate’n mawi tak a thluok khawm a siem a, sak nuomtuhai ta dingin phal zing a nih.

       America a’nthawka a ruong Delhi a hung tlunga, Delhi-a Hmar mipui haiin inro taka an hung thlaliem hnungin, Imphal Airport-ah a ruong  chu HYA, Imphal Jt. Hqrs.-in lo tuok-in hunser tawite hlu taka hmang a ni khan, Conductor Pu Zorisang Pangote, Secretary,HYA,Imphal Jt.Hqrs khawm conduct hlei thei lovin a hnukin a ul hiel a ni kha.

       Khan gang khawpa mipui ngainat le inpam kha… a ziek thiem deuin hei ziek sien chu tiem inhawi ngawt a tih.
A vuinia HYA, Rengkai Branch haiin salute, Hmar Pasaltha inthlaliema an inthla hai, tribal hnam thuoitu pop o ti ding hiela sunna le inpamna thu an hung hril le ralna an thawhai khan, a damlaia thil tha a lo thaw rawn zie a suklangchiengin ka hriet. Ka tupa a ni leia kan pak a ni nawh a, a nina ka hril lang chau lem a nih. Inzawt ding chu a tam ie, hril seng ni naw nih. A hla ziek suoka um khi tiem inla hun el lem raw se.

Ama, Rochunga Pudaite hi mi tumru le tairei pei tak, mi huoisen, Pathiena inthawka mani chi le kuong ngaisak mi tak, Mosie ang ela a hnampui hai hmasawn dan ding ngaituona   neia thilthawa suklang hlak a nih.

Rochunga Pudaite hin khawvêl ram bung hrang hrang 100 nêka tam a sir ta a, khawvêl vawiza le sawmnga a vêl suok ta bawk a.  Nau pathum a nei a, chuonghai chu: Paul Rozarlien, Ph.D.;  Rev. John Lalnunsang le Mary Lalsangpui an nih.  A hringnun dinga Bible châng high school-a a thlang suok chu Rome 8:32:  “Ama naupa ngei khawm hla lova ei rênga aia petu chun, thil dang po po khawm a
thlawnin  a mi pek naw ding am a nih” ti hi a nih.

Manmasi Digest editor Timothy Z. Zote le Rev. Dr. Rochunga Pudaite

1.Buonlei chang dinga muol i liem ni’n,
Thlavaiin  zaleng nau kan ṭap;
Sim le hmar sak le thlanga mi,
Tin tlangmi’n pam thu hril hi,
Kan bang thei nawh ie.

### Hnam pasalṭha mihrang fam ni aw,
Zaleng ruol luoithli nulin;Taplai reng kan bang thei nawh,
Rauthla chawlna ti’n kan ko ruoi ruoi;
I chanchin biethu khuoi ang thlum hi,
Phungruol hrilhai ṭin zai rel thiem lo.

2.I dam lai hringnun kalsiem  kha aw,
I ta ding chauva  hring lova;
Rethei hranau riengvai ding a,
I hun i lo inhlan kha;
Malsawmna a’n chang.

3. A hnung i zui Krista ta ding a,
Ringuma  i  nun }’n hlan hin;
I sukchieng pa’n a kona che,
Hril seng lo i nun pui hin,
Salut kan pek che.

4.    Hnam ta dinga i thilṭha thawhai,
Ro ang chul   ni reng nei naw nih,
A hlutzie ni ang hung tharin;
Nghil ni um thei  a tim maw?
Thang le thar  tawnah.

(Timothy Z. Zote’n pu Rochunga Pudaite thina puola date 21.10.2015 nia a phuok a nih) (25.02.2017)

Post a Comment

Comments not related to the news or article may be deleted.

Powered by Blogger.